Економија
Битиќи: Со соработка да го позиционираме регионот како атрактивна дестинација за нови инвестиции
Вицепремиерот задолжен за економски прашања Фатмир Битиќи присуствуваше и се обрати на првиот регионален „Иновациски бизнис-форум Пеперутка“ (Butterfly Innovation and Business Forum), кој е во заедничка организација на Регионалниот совет за соработка (Regional Cooperation Council – RCC) и универзитетот „Св. Кирил и Методиј“ и во соработка со Европската претриемачка мрежа (European Enterprise Network), INNO и Фондот за иновации и технолошки развој, а со поддршка на Европската Унија.
Обраќајки се на форумот, Битиќи посочи дека иновациите отвораат нови врати, при што се отвораат големи можности кои привлекуваат нови инвеститори, се креираат нови работни места и се генерираат дополнителни приходи за националните економии, но и за целиот регион на Западен Балкан. Развојот на иновативноста во земјите во регионот, во изминатите неколку години, го позиционира регионот на Западен Балкан на светската мапа за иновации, како атрактивна дестинација со забележлив технолошки развој и евидентен напредок.
„Северна Македонија има отворена и конструктивна комуникација со сите земји од Западен Балкан. Мило ми е што сите ние ги разбравме предностите коишто ги имаме како регион, а кои доколку се обединиме неминовно се поголеми и посилни. Како влади, создаваме политики кои ќе ги намалат границите меѓу регионалните партнери преку создавање пристапен дијалог за многу важни теми како што се дигитализацијата, иновациите и човечкиот капитал. Фондот за иновации и развој на технологија нуди многу инструменти кои ја поврзуваат Северна Македонија со нејзините регионални партнери, со перспектива да стане важен регионален стартап-центар кој не познава граници. Никогаш не сум се сомневал за важноста и придобивките од регионалната соработка, не само затоа што тоа е нашиот најинтелигентен начин да станеме посилни, туку можеби затоа што тоа е и нашиот најодржлив начин во однос на нашите ресурси“, нагласи Битиќи.
Вицепремиерот се осврна и на мерките на Владата за поддршка на иновативноста на домашните претриемачи, кои во голема мера се имплементираат преку инструментите на Фондот за иновации и технолошки развој.
„Северна Македонија сериозно влегува во дигиталната ера и ние постојано правиме нови чекори напред. Со задоволство можам да кажам дека во последните четири години нашиот Фонд за иновации и развој на технологија создаде разновидно портфолио од над 780 поддржани проекти, од кои околу 56% се стартап-претпријатија.
Со имплементирање на различните инструменти за поддршка на Фондот, ја покажуваме намерата да ги поддржуваме стартап-компаниите, кои имаат огромен потенцијал. Затоа, од година во година издвојуваме сè повеќе средства за поддршка на овие компании. Дозволете ми да споделам со вас дека во изминатите четири години преку инструментите на Фондот се реализирани инвестиции во вредност од над 88 милиони евра, а кофинансирањето од Фондот е 58% или околу 51 милион евра. Финансиската поддршка што Фондот ја понуди и продолжува да ја обезбедува на многу ентузијастички ориентирани претприемачи е од витално значење за солиден почеток. Горд сум што дизајниравме директен начин да им помогнеме на иновативните луѓе да ги претворат своите идеи во реалност. Ова е мотивирачко за стартап-заедницата и за целото општество, бидејќи сме сведоци на многу успешни приказни кои се изградени од нула и развиени со помош на инструментите на Фондот. Нашата главна цел е да создаваме можности и благодарен сум што го постигнавме и продолжуваме да го правиме тоа“, потенцираше во своето воведно обраќање вицепремиерот за економски прашања Фатмир Битиќи.
Освен вицепремиерот Битиќи, на отворањето на иновацискиот бизнис форум се обратија и ректорот на Универзитетот „Св. Кирил и Методиј“, проф. д-р Никола Јанкуловски, генералната-секретарка на Регионалниот совет за соработка, Мајлинда Брегу, заменичката генерална директорка на директоратот за истражување и иновации во Европската комисија, Сигне Рацо, и директорот на Европскиот иновациски совет и Агенцијата за поддршка на мали и средни компании во Европската комисија, Жан Давид Мало.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Комисијата за осигурување од автомобилска одговорност направи измени на тарифникот, Предлог-одлуката е доставена до Владата
Комисијата за осигурување од автомобилска одговорност денеска одржа нова седница на која ја разгледа Анализата за оправданоста и исправноста на донесените одлуки на друштвата за осигурување, подготвена и доставена до Комисијата од страна на Агенцијата за супервизија на осигурувањето, како регулатор на работењето на осигурителниот пазар.
По разгледување на Анализата, а врз основа на наодите, Комисијата за осигурување од автомобилска одговорност одржа седница и утврди потреба од измени на Тарифата за премии за осигурување и подготви Предлог-измени и дополнувања на Тарифата на премии со кои се доуредува член 3 во насока на заштита на корисниците, извести Министерството за финансии.
Предложените измени се насока на утврдување на опсег од 15% до 30% во кој друштвата за осигурување можат да го определат делот на премијата за вршење дејност на осигурување од автомобилска одговорност, а за секој износ на овие трошоци над 30% да побараат претходна согласност од Агенцијата за супервизија на осигурување. Ова значи враќање на цената на осигурувањето од автоодговорност на ниво од пред 25 април 2024 година.
Дополнително беше утврдено дека Комисијата најдоцна до 30 септември секоја година до Владата да доставува предлог за минимална и максимална стапка на техничка премија за осигурување за следната година.
Одлуката за донесување нова тарифа се заснова на Анализата на АСО со која се укажува дека на 23.04.2024 година, 11 друштва за осигурување кои вршат работи на осигурување во групата на неживотно осигурување доставиле известувања до Агенцијата за супервизија на осигурување за донесени одлуки на нивните органи на управување за зголемување на премиите за задолжително осигурување од АО, при што се повикуваат на одредбите од Тарифата на премии за осигурување од АО, објавена во „Службен весник на РМ“ бр. 191/2018, според кои одредби имаат можност самостојно да одлучат за висината на делот од премијата за спроведување на дејноста, односно т.н режиски додаток при одредувањето на крајната премија по договор за осигурување (член 3 од Тарифата). Притоа известувањата на друштвата до АСО не содржат финансиски анализи за изминати периоди, ниту пак конкретни проекции за очекуван развој на ризиците кои ги преземаат во осигурување. Единствен аргумент на кој се повикуваат друштвата за осигурување се растечките трошоци од работење, кои не се непосредно поврзани со настанување на ризиците, односно со настанатите и очекуваните штети, соопшти Министерството за финансии.
Дополнително, ставот на Комисијата е поткрепен со мислењето на АСО како регулатор дека ваквото постапување на Друштвата за осигурување влијае врз стабилноста, сигурноста и предвидливоста на функционирање на целиот систем на осигурување во насока на штета на осигурениците, односно сопствениците на моторни возила.
Предлог-одлуката што ја усвои Комисијата за осигурување од автомобилска одговорност на денешната седница е доставена на усвојување до Владата на РС Македонија.
Состојбите на пазарот ќе се следат и во наредниот период и ќе се преземаат соодветни одлуки, врз основа на анализи и во еден отворен и транспарентен процес. Во врска со донесените одлуки од страна на осигурителните компании за зголемување на висината на бруто-премијата за осигурување од автомобилска одговорност во втората половина од април 2024 година, Министерството за финансии ја свика Комисијата за осигурување од автомобилска одговорност која одржа седници на 26, 29 и 30 април и 02 мај 2024 година со цел да ги разгледа сите аспекти од носењето на овие одлуки, се додава во соопштението на Министерството за финансии.
Економија
Ковачевски: Поддршката за домашните компании продолжува, СДСМ нема да се откаже од подобра и европска иднина за државата
Претседателот на Социјалдемократскиот сојуз на Македонија, Димитар Ковачевски, денеска оствари средба со претседателот на Стопанската комора на Северозападна Македонија, Менди Ќура, и со членовите на комората, на која што се разговараше за ефектите од досегашните економски мерки, за идните мерки на СДСМ, како и за нивните предлози, за тоа што е потребно да се направи во следниот период за развој на приватниот сектор и економијата.
Ковачевски по средбата, во изјава за медиуми, речедека со сите стопански комори досега имало успешна соработка, потенцирајќи дека и во време на најтешки кризи се Владата предводена од СДСМ, носеше правилни мерки за заштита на економијата, ликвидноста на компаниите и стандардот на граѓаните.
„Во тоа време направивме девет пакети антикризни мерки, во кои што учествуваа секогаш и претставниците на Стопанските комори, вклучително и Стопанската комората на Северозападна Мкаедонија. На тој начин успеавме да спасиме 80.000 работни места во 20.000 компании. Подоцна продолживме со зголемување на минималната плата, за која што секогаш имаше поддршка од оваа комора меѓутоа и од другите, и до зголемување дојде и на просечната плата“, рече Ковачевски.
Во однос на поддршката за домашните компании, Ковачевски посочи дека тоа е еден од приоритети на СДСМ и дека преку Законот за финансиска поддршка на инвестиции, домашните компании за прв пат добија поддршка од држвата, која со новата четиригодишна програма на СДСМ и Коалицијата за европска иднина, ќе се зголеми.
„Во текот на изминатите години, како Влада имаме обезбедено 100 милиони евра финансиска поддршка за домашните компании. За наредниот четиригодишен мандат, планираме над 180 милиони евра, што ќе отвори нов циклус на инвестиции кај домашните компании“, рече Ковачевски.
На средбата, како што кажа Ковачевски, се разговарало и за клучните реформи во државата кои што се поврзани со евроатлантските интеграции на Северна Македонија, при што Ковачевски потенцираше дека СДСМ како партија не се откажува од интегрирањето на државата во ЕУ, согласно со преговарачката рамка која што е усвоена.
„Веќе оваа недела ќе биде усвоена реформската агенда која што е дел од Планот за раст на Западен Балкан, во кој што точно ќе бидат наведени реформите кои што ќе треба да се прават со цел да се повлекуваат траншите за Македонија. Тоа ќе бидат реформи во сите области од економијата, јавната администрација до правосудството и добрососедските односи“, истакна Ковачевски.
При тоа, Ковачевски потенцираше дека најголем дел од предлозите на Стопанската комора на Северо-западна Македонија, кои што беа дадени уште пред изборите, се веќе имплементирани во четиригодишната програма на СДСМ и Коалицијата за европска иднина.
„Значи тоа зголемување понатамошно на минималната плата, зголемување на просечната плата и секако поддршка нова на индустријата, особено на компании кои што се извозно ориентирани и определување на доволна сума на финансиски средства за капитални инвестиции во државата. Ние имаме предвидено 3,5 милијарди од кои што 2,7 милијарди се за инфраструктурни проекти во државата во наредниот четиригодишен период.Тука би го додал и земјоделството, предвидуваме поддршка во земјоделството во четиригодишниот период од 1,3 милијарди евра, што секако ќе значи зголемено производство на храна, зголемен извоз на храна и зголемен извоз на земјоделски производи“, исткана претседателот на СДСМ, Димитар Ковачевски.
Економија
АСО: Владата преку измени на тарифникот да ги намали цените на полисите за задолжително осигурување од автомобилска одговорност
Агенцијата за супервизија на осигурување (АСО) ја охрабрува Владата, согласно своите законски надлежности, да ги заштити правата на осигурениците и преку измени во Тарифникот да ги намали цените на полисите за задолжително осигурување од автомобилска одговорност.
АСО како регулатор на пазарот на осигурување уште еднаш јавно информира дека е целосно неоправдан и без основа потегот со кој осигурителните компании ги зголемија цените на осигурувањето од задолжителна автомобилска одговорност.
Клучните аргументи против зголемување на цената се наведени во анализата што е доставена до надлежната комисија при Министерството за финансии.
Зголемувањето на цената на осигурувањето не е во функција на јакнење на заштитата на осигурениците. Напротив, како што се додава, ова зголемување на цените е само и исклучиво во функција на покривање на трошоците за оперативно работење на компаниите за осигурување.