Економија
Битиќи: Со соработка да го позиционираме регионот како атрактивна дестинација за нови инвестиции

Вицепремиерот задолжен за економски прашања Фатмир Битиќи присуствуваше и се обрати на првиот регионален „Иновациски бизнис-форум Пеперутка“ (Butterfly Innovation and Business Forum), кој е во заедничка организација на Регионалниот совет за соработка (Regional Cooperation Council – RCC) и универзитетот „Св. Кирил и Методиј“ и во соработка со Европската претриемачка мрежа (European Enterprise Network), INNO и Фондот за иновации и технолошки развој, а со поддршка на Европската Унија.
Обраќајки се на форумот, Битиќи посочи дека иновациите отвораат нови врати, при што се отвораат големи можности кои привлекуваат нови инвеститори, се креираат нови работни места и се генерираат дополнителни приходи за националните економии, но и за целиот регион на Западен Балкан. Развојот на иновативноста во земјите во регионот, во изминатите неколку години, го позиционира регионот на Западен Балкан на светската мапа за иновации, како атрактивна дестинација со забележлив технолошки развој и евидентен напредок.
„Северна Македонија има отворена и конструктивна комуникација со сите земји од Западен Балкан. Мило ми е што сите ние ги разбравме предностите коишто ги имаме како регион, а кои доколку се обединиме неминовно се поголеми и посилни. Како влади, создаваме политики кои ќе ги намалат границите меѓу регионалните партнери преку создавање пристапен дијалог за многу важни теми како што се дигитализацијата, иновациите и човечкиот капитал. Фондот за иновации и развој на технологија нуди многу инструменти кои ја поврзуваат Северна Македонија со нејзините регионални партнери, со перспектива да стане важен регионален стартап-центар кој не познава граници. Никогаш не сум се сомневал за важноста и придобивките од регионалната соработка, не само затоа што тоа е нашиот најинтелигентен начин да станеме посилни, туку можеби затоа што тоа е и нашиот најодржлив начин во однос на нашите ресурси“, нагласи Битиќи.
Вицепремиерот се осврна и на мерките на Владата за поддршка на иновативноста на домашните претриемачи, кои во голема мера се имплементираат преку инструментите на Фондот за иновации и технолошки развој.
„Северна Македонија сериозно влегува во дигиталната ера и ние постојано правиме нови чекори напред. Со задоволство можам да кажам дека во последните четири години нашиот Фонд за иновации и развој на технологија создаде разновидно портфолио од над 780 поддржани проекти, од кои околу 56% се стартап-претпријатија.
Со имплементирање на различните инструменти за поддршка на Фондот, ја покажуваме намерата да ги поддржуваме стартап-компаниите, кои имаат огромен потенцијал. Затоа, од година во година издвојуваме сè повеќе средства за поддршка на овие компании. Дозволете ми да споделам со вас дека во изминатите четири години преку инструментите на Фондот се реализирани инвестиции во вредност од над 88 милиони евра, а кофинансирањето од Фондот е 58% или околу 51 милион евра. Финансиската поддршка што Фондот ја понуди и продолжува да ја обезбедува на многу ентузијастички ориентирани претприемачи е од витално значење за солиден почеток. Горд сум што дизајниравме директен начин да им помогнеме на иновативните луѓе да ги претворат своите идеи во реалност. Ова е мотивирачко за стартап-заедницата и за целото општество, бидејќи сме сведоци на многу успешни приказни кои се изградени од нула и развиени со помош на инструментите на Фондот. Нашата главна цел е да создаваме можности и благодарен сум што го постигнавме и продолжуваме да го правиме тоа“, потенцираше во своето воведно обраќање вицепремиерот за економски прашања Фатмир Битиќи.
Освен вицепремиерот Битиќи, на отворањето на иновацискиот бизнис форум се обратија и ректорот на Универзитетот „Св. Кирил и Методиј“, проф. д-р Никола Јанкуловски, генералната-секретарка на Регионалниот совет за соработка, Мајлинда Брегу, заменичката генерална директорка на директоратот за истражување и иновации во Европската комисија, Сигне Рацо, и директорот на Европскиот иновациски совет и Агенцијата за поддршка на мали и средни компании во Европската комисија, Жан Давид Мало.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Се зголемува цената на дизелот

Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ) донесе Одлука со која се врши зголемување на малопродажните цени на нафтените деривати во просек за 0,93 % во однос на одлуката од 2.06.2025 година.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините за 1,833%, кај дизелот за 3,057%, кај екстра лесното масло за 3,388% и кај мазутот зголемувањето е за 3,088%.
Курсот на денарот во однос на доларот во изминатиот период по кој беа формирани цените со претходната пресметка е понизок за 0,5243%.
Малопродажните цени на бензините ЕУРОСУПЕР БС-95 и ЕУРОСУПЕР БС-98 не се менуваат.
Малопродажните цени на ЕУРОДИЗЕЛ (Д-Е V) и на Екстра лесното масло за домаќинство на (ЕЛ-1) се зголемуваат за 1,00 ден/лит.
Малопродажната цена на Мазутот М-1 НС се зголемува за 0,624 ден/кг и сега ќе изнесува 38,486 ден/кг.
„Напоменуваме дека ова се максималните цени на нафтените деривати од 00:01 часот на 10.6.2025 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени“, велат од РКЕ.
Економија
Објавени повици за самовработување, за млади до 29 години грант до 10.000 евра, а за невработени над 29 години грант до 7.000 евра

Министерот за економија и труд, Бесар Дурмиши, заедно со директорот на Агенцијата за вработување на Република Северна Македонија, Селајдин Белули, денеска официјално го објавија отворањето на јавниот повик за Мерка 1.1 и Мерката 1.2 во рамки на Оперативниот план за вработување за 2025 година, кои имаат за цел поддршка на самовработувањето на невработените граѓани регистрирани во Агенцијата за вработување.
Мерката 1.1 е наменета за лица над 29 години и обезбедува финансиска поддршка од 430.500 денари односно 7.000 евра за основање на нов бизнис, а Мерката 1.2 се однесува за млади до 29 години, кои имаат можност да добијат поддршка до 615.000 денари или 10.000 евра за основање сопствен бизнис.
Двете мерки, исто така, вклучуваат обука за претприемништво, подготовка на бизнис план и менторство за 6-месечен период за целните групи, вклучувајќи ги и лицата со попреченост, припадниците на ромската заедница и жените од руралните средини.
„Овие мерки не се само финансиска помош, туку се директна инвестиција во потенцијалот на граѓаните и во развојот на локалната економија“, истакна министерот Дурмиши на прес-конференцијата.
Економија
(Видео) Мицкоски: Порано растеа само платите на функционерите, а денес растат платите на работниците

Од последни во Европа по странски инвестиции, минатата година која што беше половина наша година, од наша влада, ја завршивме со рекордно ниво на директни странски инвестиции, од милијарда 255 милиони евра што ја прави државата прва во Европа, по странски инвестиции по глава на жител. Тоа значи прва во регионот, од последни- први за само шест месеци, истакна премиерот и лидер на ВМРО-ДПМНЕ, Христијан Мицкоски на Конференцијата на Унијата на млади сили на партијата што денеска се одржува во Велес.
„Сетете се само на двоцифрените бројки на инфлација. 18-20-22-23 проценти инфлација. За да денес, во март објавиме ниво на инфлација од 2,7% едно од најниските во Европа. Порано растеа само платите на функционерите, а денес растат платите на работниците 9 – 10 проценти на годишно ниво. индустриското производство кое што беше длабоко во минус, денес во март изнесува 5.2 проценти и е најголемо индустриско производство, раст на индустриско производство, не само во регионот туку и во Европа. Од автопат Кичево Охрид кој стагнираше, и беше најважно подизведувачите да се ако кажат оние од Кичевски Зајас или струмичко до автопат кој се гради и кој за една година ќе биде готов. Затоа што нема повеќе тендери во 4 очи, денес има работа, пот , одговорност и посветеност. Тоа е оваа влада на ВМРО-ДПМНЕ. Од руинирани и запустени студентски домови, до студентски домови кои се реновираат, кои се градат. И најавувам изградба на еден таков, нов студентски дом во Штип, по склопот на новата зграда на медицинскиот факултет, по склопот на новиот клинички центар, кој што е го почнеме како резултат на Договорот а стратешко партнерство со Велика Британија, 200 нови најмодерни најсовремени легла за нашите млади, за нашите студенти, за идните доктори. Од срамни и штетни, предавнички договори до договори за стратешко партнерство со Обединетото Кралство. Од одземена и обезличена држава до држава која е повторно ваша, и кажува што сака и за што се бори.“, кажа премиерот.