Квалитетот на мазутот ќе се испитува за два часа во новата лабораторија што денеска ја промивираа министерот за економија, Крешник Бектеши, директорката на Бирото за метрологија, Мерита Мустафаи, и в.д. директорката на Државниот пазарен инспекторат, Анета Симеска-Димоска.

Како што истакна Бектеши, оваа нова лабараторија е опремена со автоматизирана опрема со седум мерни инструменти и екипирана е со стручен кадар обучен за тестирање повеќе од 10 параметри на мазутот. Опремувањето чини 24 милиони денари, а резултатите од анализите ќе се добиваат во кус временски период и во промет ќе се пуштаат само горива со проверен квалитет.

„Резултатот од повеќемесечна посветена работа е оваа лабораторија, опремена со комплетно автоматизирана мерна опрема, со нови мерни инструменти, на кои ќе се тестираат мостри од мазут, земени од терен. Ова е мерна опрема, со која целосно се задоволуваат барањата на стандардот МКС Б.Х2.430 за тестирање на квалитетот на маслата за горење. Несомнено, оваа лабораторија редовно ќе ги следи барањата на европските и меѓународните стандарди и прописи и редовно ќе учествува во меѓулабораториските испитувања рамо до рамо со европските лаборатории затоа што Бирото за метрологија секогаш се ставало во функција на корисниците на услуги, а со тоа и на развојот на економијата во целост“, изјави министерот Бектеши.

Директорката на Бирото за метрологија, Мерита Мустафаи, истакна дека лабораторијата е опремена со автоматизирана мерна опрема, 7 нови мерни инструменти, со кои ќе се тестира квалитетот на мазутот, а е екипирана и со стручен кадар, обучен за тестирање повеќе од 10 сет параметри на мазутот, со што целосно се задоволуваат барањата на стандардот МКС Б.Х2.430 за квалитетот на маслата за горење.

„Тоа се светски признати методи за тестирање, засновани на ASTM, ISO и EN-стандардите, усвоени од Институтот за стандардизација на Република Северна Македонија, со кои ќе може да се одреди содржината на сулфур, кокс, пепел, вода и механички примеси во мазутот, но и други квалитативни својства на маслата за горење, пуштени во промет на домашниот пазар (дестилација, густина, точка на палење, кинематички вискозитет, точка на течење и топлинска моќ)“ рече директорката на Бирото за метрологија.

Директорката на Државниот пазарен инспекторат, Анета Симеска-Димоска, истакна дека со оваа набавка на новата лабараторија за анализа на квалитетот на мазутот ќе се овозможат еднакви услови за работа на сите економски оператори и ќе се регулира незаконското работење, пред сѐ, во делот на контрола на безбедност на производите и контрола на квалитетот на производите што се пуштаат на пазарот.

„Постојано вршиме контрола на мазутот при увоз во државата заедно со Царинската управа и исто така во периодот кога имаме земено мостри, во два случаја имаме пронајдено дека не соодветствува со квалитетот и преземени се соодветни мерки, меѓутоа во последниот период сите анализи што ги земаме покажуваат дека мазутот е со соодветен квалитет. Во наредниот период со новата лабараторија ќе можеме резултатите од земените мостри да ги добиеме во најкус можен рок“, потенцира Симеска-Димоска.