На денешниот настан во рамки на Минхенската безбедносна конференција наменет за пристапот на Балканот кон ЕУ, премиерот, Христијан Мицкоски, истакна дека македонскиот пат кон ЕУ започна многу пред да започне евроинтегративниот процес на Албанија, дури и пред Хрватска, но за нас системот на заслуги е бајка.

„За нас бајката стана подвижна мета. Ние сме жртви на билатеризација или да бидам попрецизен, нашето придвижување кон ЕУ е многу комплексна. Наместо да ја донесеме Европа до Балканот, ние го донесовме Балканот во Европа. За жал има земји членки на ЕУ кои доаѓаат од Балканот кои донесоа билатерални спорови заедно со нив во Брисел, наместо бриселските вредности да ги донесат на Балканот“, рече премиерот Мицкоски на Минхенската безбедносна конференција

„Промената на името не беше единствен пример за мешање во внатрешните работи на суверена држава. Да ве потсетам тука беше и промената на знамето. Наш маркер е и останува да биде, да станеме дел од ЕУ, без сомнение. Слушам некои коментари тука дека имало говор во текот на првиот ден од американскиот заменик-претседател Венс и дека тој говор значел големо мешање во внатрешните работи. Промената на името, промената на знамето, промената на валутата, што се? Не се мешање во внатрешните работи. Колку долго треба да патиме од двојните стандарди? Ние тука не зборуваме за процес заснован на системот на заслуги, ние зборуваме за билатерални спорови кои не треба да имаат ништо заедничко со европските вредности“, дополни Мицкоски.

„Ние како држава имаме целосно усогласена надворешна и одбранбена политика со ЕУ. Ние сме меѓу петте земји најголеми донатори на Украина по глава на жител исто го исполнивме условот од 2% за одбранбени трошоци на годишно ниво. Ние сме целосно усогласени со барањата за надворешната и одбранбената политика. Морам да го истакнам ова прашање, кога Русија го напаѓа и го негира украинскиот идентитет, за што и претседателот Зеленски зборуваше вчера, ние сме сите гласни, критикуваме, се бориме за правата на украинскиот народ и против оваа невидена агресија, но кога парламент на една земја членска од ЕУ го напаѓа и го негира македонскиот идентитет и мојот македонски мајчин јазик, тогаш сите молчат“, заклучи Мицкоски и дополни дека Европа нема да биде обединета без сите европски земји. Овој процес ќе трае додека сите аспиранти земји не станат дел од заедничката маса со останатите земји членки на ЕУ.

До локалните избори сигурно нема да има спојување на Влен, а по нив може да се случи евентуално спојување на сите четири партии во една партија, вели за РСЕ лидерот на Алијанса за Албанците и министер за здравство Арбен Таравари.

Тој најави жалба до Апелација по одлуката на тетовскиот суд за тоа кој е претседател на Алијансата за Албанците. Според него важно е кој ги има членовите, а не кој како ќе се нарекува.

Таравари се осврна и на уставните измени.

„Нормално дека ние како Влен инсистираме и ќе продолжиме да инсистираме, меѓутоа, секогаш мора да се убеди и ВМРО, бидејќи без ВМРО не можат да се случат уставните промени. Значи невозможно е, нема формула која што може да ги направи уставните промени без тоа да има согласност од ВМРО“, изјави Таравари.

Целиот разговор на линкот.

Изгоре магацин за  производство на полиестер во општина Врапчиште.

Магацинот се состои од три објекти, при што два се целосно изгорени, додека третиот е делумно изгорен.

Итната медицинска помош од Гостивар извести дека еден пожарникар паднал од скали и се здобил со повреди поради што е однесен во Ургентниот центар во Клиничката Болница во Гостивар.

Според информациите од Центарот за управување со кризи, пожарникарите од Гостивар излегле на терен 45 минути по полноќ.

Противпожарните возила интервенирале во текот на целата ноќ, а им се приклучиле и колегите од Тетово. Пожарот е локализиран во 05:30 часот, но сеуште има жар и чад поради што пожарната од Гостивар се’ уште се на терен.

Засега нема информации што го разгорело пожарот.