САД имаат подобро разбирање за условите под кои Русија би била спремна да ја заврши војната во Украина откако претставникот на претседателот Доналд Трамп, Стив Виткоф, се сретна со рускиот претседател Владимир Путин, изјави вчера американскиот државен секретар Марко Рубио.

„Можеби за прв пат откако оваа администрација ја презеде функцијата, имаме некои конкретни примери за работите што Русија би ги барала за да ја заврши војната“, рече Рубио во интервју за емисијата „Кудлоу“ на Фокс бизнис мрежата, додавајќи дека клучните елементи на секој договор би вклучувале територија.

Рубио рече дека сè уште има многу работа пред евентуалната средба меѓу Трамп и неговиот руски колега Владимир Путин за ставање крај на војната во Украина.

„Денес беше добар ден, но сè уште има многу работа пред нас. Има многу пречки што треба да се надминат и се надеваме дека ќе го постигнеме тоа во наредните денови и часови, можеби дури и недели“, рече тој.

Претходно, американскиот претседател изјави дека е отворен за таква средба со Владимир Путин, како и со украинскиот претседател Володимир Зеленски, според Белата куќа.

По посетата на Москва од неговиот специјален пратеник Стив Виткоф, за која се вели дека била продуктивна, американскиот претседател информираше неколку европски лидери дека има намера лично да се сретне со својот руски колега, можеби уште следната недела, а потоа да одржи средба со украинскиот претседател, објавија Њујорк Тајмс и Си-Ен-Ен.

Американскиот пратеник се сретна со Путин во Москва два дена пред истекот на американскиот ултиматум до Русија, кој бара ставање крај на конфликтот во Украина.

„Претседателот сака да ја заврши војната“, повтори Рубио.

„Во следните неколку дена ќе разговараме со нашите европски сојузници и Украинците за да видиме каков напредок можеме да постигнеме на тој фронт“, објасни тој. „А потоа, се надеваме, работите ќе продолжат да напредуваат и многу наскоро ќе има можност претседателот да се сретне и со Владимир Путин и со претседателот Зеленски во одреден момент, се надеваме во блиска иднина.“

„Но, очигледно многу работи треба да се случат пред тоа“, рече американскиот државен секретар. Кога станува збор за евентуален нов пакет санкции на САД против Русија, тој рече дека Трамп ќе донесе одлука за тоа во следните еден или два дена.

Соединетите Американски Држави ќе воведат царина од околу 100 проценти за чипови и полупроводници увезени од земји кои не произведуваат во Америка или не планираат, изјави претседателот Доналд Трамп.

Трамп им рече на новинарите во Овалната соба дека новата царинска стапка ќе се применува на сите чипови и полупроводници што доаѓаат во Соединетите Американски Држави, но нема да се применува на компании кои се обврзале да произведуваат во Соединетите Американски Држави.

„Значи, царина од околу 100 проценти за сите чипови и полупроводници што доаѓаат во Соединетите Држави. Но, ако сте се обврзале на производство (во САД) или ако сте во процес на производство (во САД), како што се многумина, нема царина“, рече Трамп.

Во 2022 година, Конгресот создаде програма за субвенции од 52,7 милијарди долари за производство и истражување на полупроводници. Минатата година, Министерството за трговија, под претседателот Џо Бајден, ги убеди сите пет водечки компании за полупроводници да лоцираат фабрики за чипови во САД како дел од програмата.

Минатата година, министерството соопшти дека САД произвеле околу 12 проценти од светските полупроводнички чипови, во споредба со 40 проценти во 1990 година.

По новите националистички скандирања на спортските трибини, претседателката Гордана Сиљановска-Давкова со јавна реакција на социјалните мрежи. Таа порача дека сцените од синоќешниот натпревар меѓу Шкендија и Карабах се реприза на неодамнешната кумановска трагедија и предупреди дека селективното реагирање на вандализмот води кон лицемерие и цинизам.

„Сеопштата осуда на навивачкиот примитивизам на сите ни влеа надеж за цврста решеност за справување со овој неспортски феномен. Но, хипокризија и цинизам е селективното реагирање на неспортскиот вандализам. Само со заедничка, доследна и бескомпромисна битка со шовинистичките изблици, без оглед чии се, ќе градиме здраво општество“, напиша таа.

Фејсбук статусот следи по уште еден спортски настан на кој, наместо фер плеј, доминираа националистички скандирања, меѓу кои и повици за „Голема Албанија“, „Чамерија“ и „Илирида“. Иако Фудбалската федерација на Македонија (ФФМ) апелираше за спортско навивање и воздржаност од провокации, дел од навивачите на натпреварот Шкендија – Карабах упатија навреди што предизвика осуди и реакции од јавноста.

Министерството за внатрешни работи информира дека веќе е започната постапка за идентификација на учесниците во инцидентот:

„Постапуваме врз основа на обезбедена видео и фото-документација. Со јавниот обвинител координираме следни чекори со цел целосно расчистување на случајот“, информираа од СВР Скопје.

Од Основното јавно обвинителство Скопје потврдија дека постапуваат во координација со МВР.

Дополнително загрижи фактот што натпреварот беше следен од повеќе високи функционери од власта и опозицијата, меѓу кои и вицепремиерот Изет Меџити, претседателот на Собранието Африм Гаши, но и лидери на опозициски партии – Али Ахмети и Арбен Таравари.

Гаши, кој пред три дена остро ги осуди сличните скандирања во Куманово, овој пат преку Фејсбук упати честитка до навивачите, нарекувајќи ги „достоинствен пример за националните вредности“.

Хелсиншкиот комитет реагираше дека говорот на омраза не смее да се игнорира и побара од МВР и надлежните институции итно и неселективно да го применат законот.

Спортските натпревари сè почесто стануваат место каде доминира говорот на омраза, а не спортскиот дух. Обвинителството веќе води постапка за националистичките повици на натпреварот во Куманово на 2 август.