Регион
ЕУ: Црногорските лидери мора брзо да пристапат кон формирање нова влада
Црногорските лидери мора брзо да пристапат кон формирање на нова влада и да назначат претседател на парламентот. Ова го соопштија известувачот на ЕУ за Црна Гора, Тонино Пицула, и претседателот на собраниската Комисија за стабилизација и асоцијација, Владимир Билчик.
„Ние континуирано го следиме развојот на политичките настани во Црна Гора и ги поздравуваме мирните и уставните транзиции. Повикуваме на континуирано почитување на демократските процеси, норми и стандарди во овие времиња“, рекоа европските претставници.
Тие нагласуваат дека создавањето пат кон стабилно парламентарно мнозинство и напредокот на Црна Гора во реформскиот процес е клучно прашање.
„Политичката неактивност ја ограничува реформската агенда на земјата и последиците од нејзината амбиција за ЕУ. Црна Гора напредуваше најмногу меѓу кандидатите за ЕУ и веќе е дел од НАТО. Потребно ѝ е предвидливо и стабилно парламентарно мнозинство и проевропска влада за да ја внесе во ЕУ“, велат во заедничката изјава на Пицула и Билчиќ, пренесе „Побједа“.
Пред неколку дена црногорскиот Парламент изгласа недоверба на Владата на Здравко Кривокапиќ, со што и престанува мандатот на Владата. За уривање на Владата гласаа сите опозициски партии предводени од Демократската партија на социјалистите на Мило Ѓукановиќ и членовите на досегашната владејачко мнозинство Граѓанското движење УРА и Цивис.
Според Уставот на Црна Гора, владата на Кривокапиќ ќе продолжи да работи до изборот на нова влада. А со изгласувањето недоверба се отвора процесот на преговарање за формирање нова влада.
Собранието на Црна Гора на вонредна седница синоќа го разреши претседателот на Собранието Алекса Бечиќ. За неговото разрешување гласаа 43 пратеници на опозицијата и на коалиција „Црно-бело“, додека против беа 36 пратеници.
Пратеникот на ДПС Даниел Живковиќ рече дека партијата ќе гласа за отстранување на сите сегменти од власта кои не сакаат да учествуваат во решавањето на проблемот, со цел да се деблокираат институциите и да се забрза процесот на пристапување на Црна Гора во Европската Унија. Според него, разрешувањето на владата на Здравко Кривокапиќ дефинитивно го доведе во прашање легитимитетот и на претседателот на Собранието. Тој рече дека претходните 14 месеци се изгубени за Црна Гора. Бечиќ во завршниот збор изјави дека напишаното во иницијативата за негова смена е неосновано.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Повредени и загинати при судир на воено и цивилно возило на патот Краљево-Рашка
Борбено возило „ПАСАРС“ на војската на Србија денеска околу 13 часот и 10 минути се судрило со цивилно возило кај градот Ушќе на патот Краљево-Рашка, соопшти Министерството за одбрана.
Борбеното возило – противвоздушен самооден артилериско-ракетен систем во колона под придружба на воената полиција се движело кон Рашка.
Според првите информации има повредени и загинати, се вели во соопштението на Министерството.
Регион
(Видео) Maж падна од опасна карпа на Паг и почина, спасена алпинистка
При искачување на опасна карпа на Паг, еден маж почина, а една жена беше спасена во голема операција на хрватската служба за спасување.
„Добивме пријава во 13 часот и 32 минути дека две лица наводно се качувале на карпа кај Метајна. Едното лице паднало и починало. Другото е на карпата. Засега не може да им се пристапи од копно“, рекоа од полицијата.
Покрај полицијата, на местото на настанот има и други служби за итна помош – брза помош, пожарникари.
Малку по 17:00 часот од карпите е спасена жена, откако спасувачите со чамци се приближиле до карпата од морската страна.
Регион
Додик: Нема да ја почитувам одлуката на Уставниот суд
Српскиот лидер во Босна и Херцеговина, Милорад Додик, изјави дека нема да ја почитува одлуката на Уставниот суд на таа земја, кој го оспори изборниот закон за ентитетите и покрај тоа што неговата партија ќе учествува на претстојните локални избори, кои се одржуваат според одредбите на друг државен изборен закон.
„Изборниот закон на Република Српска е уставен и овој правен акт ќе се применува“, изјави Додик за Радио-телевизија на Република Српска реагирајќи на вчерашната одлука на Уставниот суд на Босна и Херцеговина.
Тој суд оцени дека со донесувањето на Изборниот закон на Република Српска е прекршен Уставот на Босна и Херцеговина. На овој начин се оспорува улогата на Централната изборна комисија на БиХ, која е задолжена за организирање и спроведување на изборите.
На ваков потег се одлучија откако високиот меѓународен претставник, Кристијан Шмит, наметна измени во Изборниот законик на Босна и Херцеговина.
Сепак, Додик тврди дека само ќе го почитува Изборниот законик за ентитетите бидејќи тој не бил оспорен од Уставниот суд на Република Српска. Но, државниот е.
И покрај приговорите и отфрлањето на одлуките на Уставниот суд на БиХ, кои властите на Република Српска ги нарекуваат скратени затоа што двајца српски судии не учествуваат во неговата работа, партиите на власт од тој ентитет сепак ќе учествуваат на претстојните локални избори организирани од државната Централна изборна комисија.
Овие избори ќе се одржат на 6 октомври, а ќе се изберат нови свикувања на градските и општинските совети и раководители на 141 општина и град.