Македонија
(Видео) Лазаревска: ВМРО-ДПМНЕ против поголеми плати на 4.700 наставници и нивно трајно вработување
Цела година ВМРО-ДПМНЕ го блокира законското решение за трансформација на работниот однос на 4.700 наставници во образованието од определено на неопределено работно време. Го блкокира и покачувањето на нивните плати, преку усогласување според минималната плата, изјави пратеничката на СДСМ, Жаклина Лазаревска.
Таа истакна дека десктруктивното однесување на ВМРО-ДПМНЕ е на директна штета на наставниците, стручните соработници и работниците.
„Трансформацијата на работниот однос освен што ќе обезбеди трајно вработување, ќе обезбеди и повисоки плати, како на овие 4.700 наставници и стручни соработници, така и на сите наставници и стручни соработници. МОН и репрезентативниот синдикат склучуваат спогодба, со која се утврдува износoт на вредностa на бодот за пресметување на платите на наставниците и стручните соработници.
Вредноста на бодот за пресметување на платите на наставници и стручни соработници се усогласува со процентот на пораст на минималната плата, со зголемување на минималната плата, се зголемува и платата на наставниците и стручните соработници“, рече Лазаревска.
Таа ѝ порача на опозицијата предводена од ВМРО-ДПМНЕ да престане со, како што рече, неодговорното постапување и да се откаже од блокадите на ова, но и на другите законски решенија кои носат придобивки за граѓаните.
„СДСМ и ова мнозинство ја зголеми минималната плата од 8.800 денари во време на ВМРО – ДПМНЕ на 18.000 денари. СДСМ се грижи за работниците. Ние како парламентарно мнозинство ќе сториме сè блокадите да бидат надминати и измените на важните закони да бидат донесени. Остануваме посветени на мерки и решенија кои го подобруваат економскиот стандард и носат придобивка за сите граѓани“, додаде Лазаревска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Тошковски во посета на Секторот за компјутерски криминал и Одделот за прекршоци: во фокусот, задржување на постојниот и привлекување на нов кадар
Министерот за внатрешни работи Панче Тошковски денес оствари работни посети во Секторот за компјутерски криминал и Одделот за прекршоци каде одржа работни состаноци со раководствата на овие организациски единици на министерството.
Секторот за компјутерски криминал има специфичен делокруг на работа и постапува по неколку кривични дела како што се загрозување на сигурноста по пат на информатички систем, злоупотреба на лични податоци, прикажување на порнографски материјал на малолетник, производство и дистрибуција на детска порнографија, намамување на обљуба или друго полово дејствие на малолетник кој не наполнил 14 години и други.
„Имајќи ги предвид квалификациите што се потребни за кадарот кој работи во овој Сектор и конкуренцијата на пазарот на труд, потребно е во најбрзо можен рок да се преземат соодветни мерки со цел задржување на постојниот и привлекување на нов кадар во овој дел.
Во однос на Одделот за прекршоци исто така има недостаток на соодветен кадар кој треба да исполнува посебни услови согласно Законот за прекршоци заради ефикасно извршување на големиот обем на работа кој го имаат. Во иднина треба да се размислува за олеснување на процедурите во делот на прекрошочната постапка, дигитализација и користење на бенефитите кои ги нудат современите софтверски решенија“, истакна Тошковски.
Сервисни информации
Поради протест, во прекин сообраќајот на патот Битола – Новаци
Сообраќајот на регоналниот пат Битола – Новаци е во прекин во двата правци поради протест, информираат од АМСМ.
Сообраќајот на државните патишта се одвива непречено, по претежно суви коловози.
Интензитетот на сообраќај на патните правци надвор од градските средини е умерен. На граничните премини од македонска страна нема подолги задржувања за влез и излез од државата.
АМСМ препорачува приспособена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде што има можност од појава на одрони. Ова особено се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
ЗНМ: Осуда за обидот за цензура од страна на директорката на Клиниката за токсикологија
Здружението на новинарите на Македонија (ЗНМ) го осудува обидот за цензура и ограничување на правото на говор од страна на Бесија Иљази, организациски директор на Клиниката за токсикологија во Скопје.
Според денешната пријава од членови на ЗНМ, на влезот на Клиниката за токсикологија во Скопје јавно била истакната наредба со која им се забранува на вработените да имаат контакти со новинари или медиуми.
Во наредбата од 20.5.2024 година се вели дека во согласност со член 30 и 31 од статутот на ЈЗУ Клиника за токсикологија – Скопје се забранува неовластено присуство, давање изјави за јавност преку интервјуа и свикување прес-конференции, со што би се нанело штета на интересите и угледот на клиниката.
Ваквата наредба претставува грубо прекршување на слободата на говор и професионалното новинарство, спротивно на Уставот. Цензурата во Македонија е забранета со член 16 од Уставот на РСМ.
Јавните здравствени установи и сите јавни институции во државата треба да обезбедат јавност во своето работење и да информираат за своите одлуки и работа, а не да забрануваат информирање за теми од јавен интерес.
Новинарите се должни да објавуваат информации што содржат сомнеж за злоупотреби на сите носители на јавни функции бидејќи на тоа ги обврзува новинарскиот Кодекс, кој јасно наведува дека новинарот ќе ги почитува законите, но нема да објави или скрие ништо што е во спротивност со јавниот интерес, велат од ЗНМ.
ЗНМ формално ќе се обрати до ресорното министерство и ќе бара одговорност од директорката на Клиниката за токсикологија и од сите инволвирани во донесувањето на оваа наредба. Дополнително, ЗНМ ќе инсистира за итно повлекување на наредбата и на воспоставување транспарентност во работењето на клиниката, со цел да се осигурат слободата на говор и правото на новинарите да информираат за прашања од јавен интерес.