Додека се одвиваше промоцијата на авионската линија Скопје – Софија, претставници на домашните медиуми беа дистанцирани на стотици метри од настанот, без можност да земат изјава ниту, пак, да документираат кадри од случувањата, обвинуваат од новинарските здруженија ЗНМ и ССНМ.

„Во исто време, снимателите што се вработени во рамките на владините институции, како и новинари од Бугарија, имале пристап до самиот авион по слетувањето, како и до претставници од делегацијата“, се наведува во соопштението.

Здружението на новинарите на Македонија (ЗНМ) и Самостојниот синдикат на новинарите и медиумските работници (ССНМ) сметаат дека е неприфатлив ваквиот третман на медиумските екипи, кои биле уредно поканети и акредитирани за проследување на настанот.

„Потребно е да се сфати дека тие се таму на задача со цел да известуваат во име на јавноста и дека организаторите на настанот треба да обезбедат соодветни услови за работа“, се нагласува во реакцијата.

Во неа се потсетуваме дека ова не е прв ваков случај на скопскиот аеродром, каде што пред извесно време на настан поврзан со пристигнувањето бегалци од Авганистан владини службеници снимале видеа и ги емитувале на социјалните мрежи, а новинарските екипи биле дистанцирани и попречени да си ја работат својата работа.

Од Министерството за транспорт и врски, пак, упатуваат искрено извинување и велат дека станува збор за ненамерен пропуст со кој било ограничено движењето на присутните медиуми.

„Министерство за транспорт и врски како организатор на настанот во соработка со ‘ТАВ Македонија’ обебеди пристап на платформата според меѓународните безбедносни протоколи со ограничено движење“, се наведува во извинувањето на Министерството, од каде што посочуваат дека разбирлива е реакцијата на медиумските работници во однос на овој пропуст.