Македонија
(Видео) Арсовски објаснува: Еве како одела една цела постапка за местење тендер
Местењето тендери во СДСМ, односно од кадрите на СДСМ што се во институциите, не е ништо ново, тоа го говориме 4 години, а сега веќе презентираме и докази, но, за жал, ЈО и антикорупциската се глуви и слепи, обвини на прес-конференција портпаролот на ВМРО-ДПМНЕ, Димче Арсовски.
Тој денеска рече дека ќе објасни како одела една цела постапка за местење тендер, најпластично објаснето, за да може, како што рече, сите граѓани да разберат.
„Најпрвин фирмата што е договорена од страна на кадрите на СДСМ дека треба да го земе тендерот ја пишувала техничката спецификација и ја давала кај градоначалникот, потоа градоначалникот го објавува тендерот, фирмата веќе ги знае работите што ќе се работат и што ќе се набавува и за работите што ќе се набавуваат става енормно високи цени, а тие што нема да се работат става цени од 1 денар и кога ќе извади просечна цена, односно понуда на тендерот, излегува најниска оваа понуда, токму на фирмата што е договорена и таа фирма го добива тендерот што подоцна треба да го работи. За возврат им носеле пари во кеш, односно процент од заработката на градоначалниците што ги местеле тендерите. Полесни и побрзи пари на грбот на граѓаните нема никаде да најдат“, посочи Арсоски.
Партискиот портпарол потоа презентира понуда, односно техничка спецификација за Општина Гази Баба за одржување и реконструкција на јавното улично осветление.
Фирмата „Дигитал“ ДООЕЛ добила тендер за оваа работа, и тоа со следниве цени:
– набавка и вградување кабел од 1 kw со дебелина 4×16 мм2 обем, цената е 300 денари, а за кабел 4×35 мм2 обем, што е логично да е цената повисока бидејќи се работи за подебел кабел, замислете – цената е само 12 денари;
– рачно кршење асфалт и бетон со дебелина 15 см, цената за кршење на 1 м2 чини само 1 денар. Рачно кршење бетон чини 1 денар за 1 м2. Ова, почитувани, е навредување на интелигенцијата на граѓаните дека некој човек ќе искрши рачно 1 квадрат бетон или асфалт со дебелина 15 см за само 1 денар. Во тој случај 1.000 квадрати бетон или асфалт со дебелина од 15 см би им требало неколку луѓе да искршат за една недела рачно и за тоа да бидат платени, внимавајте, само 1.000 денари. Надвор од здрав разум;
– набавка и вградување асфалтна маса за асфалтирање работа со дебелина од 7 см и плус подлога, цена 1 денар за 1 м2. Или тоа значи дека за 100 м2 асфалт, треба да чини 100 денари ова асфалтирање. Повторно надвор од здрав разум;
– замислете, ископ на дупки за изработка на фундаменти, со шалување и бетонирање и пластична цевка фи 70 мм, дупка да ископаат, односно да подготват со димензии 50x50x60 см, чини 2.000 денари, а тоа што знаеле дека нема да се работи, на пример, истиот принцип на работа, но двапати поголема димензија на дупка 1.000×1.000×120 см, која треба да е двојно поскапа, чини само 500 денари. Затоа што знаеле што ќе се работи, а што нема да се работи и затоа биле такви цените“, нагласи Арсовски додавајќи дека ова се само дел од цените и начинот од кој, како што рече, има простор за сомневање за предност во добивање на тендерот од страна на оваа фирма.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Уапсен врховен судија поради сомненија за примање поткуп
Врховниот судија Наке Георгиев е уапсен поради сомнеж за примање поткуп.
„Денеска 20 мај, лишен од слобода е судија од Врховниот суд поради сомневања за сторено кривично дело Примање награда за противзаконито влијание. Судијата е лишен од слобода на лице место при извршување на кривичното дело. Се чекаат натамошни насоки од надлежен јавен обвинител“, велат од МВР.
Засега не е позната локацијата каде што е приведен судијата, ниту пак, за колкава сума станува збор.
Македонија
Сиљановска доби честитка од кралот Чарлс
Претседателката Гордана Сиљановска Давкова денеска го прими амбасадорот на Обединетото Кралство на Велика Британија и Северна Ирска, Метју Лосон.
На средбата беа разменети мислења за севкупните билатерални односи меѓу двете држави, при што претседателката Сиљановска Давкова истакна дека нашата држава придава особено значење на развојот на пријателските односи и соработката со Обединетото Кралство, вклучувајќи го сојузништвото во НАТО алијансата. Претседателката Сиљановска Давкова посочи на нејзината подготвеност за натамошно унапредување на билатералната соработка со Обединетото Кралство во сите сфери од заемен интерес.
Претседателката Сиљановска Давкова истакна дека како држава особено ја цениме британската поддршка во исполнувањето на стратешката цел – членство во Европската Унија, која продолжи и по Брегзит.
Амбасадорот Лосон на претседателката Сиљановска Давкова и предаде честитка од Кралот Чарлс Трети по повод нејзиното стапување на функцијата, во која упатува најискрени честитки за нејзиниот избор.
„Уверен сум дека ќе го вложите целиот Ваш капацитет за време на Вашиот мандат како Претседател за справување со големите предизвици на нашето време, почнувајќи од справувањето со климатските промени до продлабочувањето на евроатлантската интеграција на Северна Македонија. Многу сум задоволен што нашите две земји имаат воспоставено цврсти трговски и безбедносни односи. Оттука, се надевам дека за време на Вашиот мандат како Претседател односите, кои се веќе толку блиски, уште повеќе ќе се продлабочат“, се вели во честитката од Кралот Чарлс Трети.
Македонија
Сиљановска Давкова се сретна со украинската амбасадорка Дир
Претседателката Гордана Сиљановска Давкова денеска ја прими амбасадорката на Украина, Лариса Дир.
На средбата, беше изразено задоволство од традиционалните пријателски односи, засновани на заемна почит и меѓусебно разбирање. Претседателката Сиљановска Давкова ја нагласи нејзината заложба за продлабочување на соработката во сите области од заеднички интерес, реафирмирајќи ја поддршката за Украина против руската агресија, со која се поткопува европската глобална безбедност и стабилност.
Двете соговорнички разменија мислења и за стратешките определби и перспективите на двете земји, истакнувајќи ја потребата од натамошна заемна помош, споделување искуства и експертиза. Претседателката Сиљановска Давкова ја нагласи македонската поддршка за Украина на нејзиниот пат кон Европската Унија и НАТО.
Амбасадорката Дир, упатувајќи честитки за изборот на претседателката Сиљановска Давкова ѝ посака успешно извршување на функцијата.