Македонија
(Видео) Мицевски: СДСМ и ДУИ гласаа против зголемување на пензиите за 20%

Денеска на пленарна седница имавме можност да го видиме односот на СДСМ и ДУИ, односно како владејачкото мнозинство се однесува кон сите категории граѓани, особено кон пензионерите, категорија на граѓани која најтешко ги поднесува овие кризи и состојби во државата, изјави Никола Мицевски, координатор на пратеничка група на ВМРО-ДПМНЕ.
Тој додаде дека имаме пораст на цените на одредени производи, како и на електричната енергија поради тоа пензионерите може да западнат во една критична група на граѓани коишто тешко го поминуваат месецот.
Од таа причина пратеничката група на ВМРО-ДПМНЕ поднесе законско решение со кое бара зголемување на вкупниот износ на исплата на сите видови пензии за април за 20%.
Мицевски истакна дека по реакции на одредени групи граѓани, односно пензионери, размислуваат на комисиска расправа да дискутираат за можноста за зголемување на пензијата линеарно по 3.000 денари за секој граѓанин, за да нема голема разлика во зголемувањето на пензиите.
„Меѓутоа, за жал, овој материјал или овој закон владејачкото мнозинство го изгласа против, за да не може за истиот да се дискутира на пленарна седница денес.
Со жалење можам да констатирам дека владејачкото мнозинство едно зборува, а друго прави. Можноста да изгласаме законско решение и почеток на разговори за законско решение за зголемување на пензиите на пензионерите за 20% беше денес пред пратениците, меѓутоа пратениците од СДСМ и ДУИ гласа против ова законско решение“, изјави Мицевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) СДСМ обвинува: Влада на ВМРО-ДПМНЕ фатена во голем скандал со назначувањето на директорката за Еразмус+

СДСМ обвинува дека Владата на ВМРО-ДПМНЕ е фатена во голем скандал со назначувањето на в.д. директорката на Националната агенција која располага со средствата од Еразмус+.
Претседателот на Комисијата за образование и наука на СДСМ, Јованче Манасков, истакна дека Ана Михајлов, првиот човек на агенцијата е под активна истрага на ОЛАФ, Европската канцеларија за борба против измами. Според СДСМ, ова ја урива довербата на младите во институциите.
СДСМ тврди дека назначувањето било направено „во координација“, но без согласност од Европската унија, која експлицитно го оценила огласот како нелегитимен и барала повторно објавување за нови кандидати.
Според свиркачите, причината за тоа е кандидатурата на Ана Михајлов, која од 2014 до 2017 година, заедно со Дорина Ѓорчева, доделила преку 8 милиони евра, што според СДСМ е предмет на истрага за можна проневера на европски средства.
Манасков исто така го спомена Бошко Нелкоски, првиот директор на агенцијата и ментор на новата в.д. директорка, како и поврзаноста со фирмите „Силвер Лион Сервисес“ и „Агронимија Органика“.
СДСМ бара Владата веднаш да ја разреши Ана Михајлов и да обезбеди услови истрагата на ОЈО да продолжи, а Обвинителството да постапи по наодите на ОЛАФ и сите инволвирани во скандалот да одговараат.
Македонија
Скопјанец под истрага за илегално држење и продавање марихуана

Скопското Обвинителство донесе Наредба за спроведување истражна постапка против едно лице за неовластено производство и пуштање во промет наркотични дроги.
Осомничениот 23-годишник, во автомобил „опел корса” неовластено држел 57 пакувања марихуана со вкупна нето маса од околу 72 грама, наменети за натамошна продажба.
Автомобилот бил во негова сопственост и одреден период оставен на паркинг на булеварот „Митрополит Теодосиј Гологанов”. По претходна пријава возилото било обезбедувано под надзор на полициски службеници.
На 27 јуни осомничениот се доближил до автомобилот и бидејќи не можел да си ги пронајде клучевите, насилно го скршил задното стакло, по што извлекол црна најлонска вреќа со повеќе пакувања марихуана и дигитална вага. Веднаш бил забележан од полицијата, па ја фрлил вреќата и се дал во бегство.
Не бил достапен на органите на прогонот до 11 август кога сам се пријавил во полициска станица, што за јавниот обвинител е потврда на ризикот осомничениот со бегство да го избегнува кривичниот прогон.
Исто така постојат особени околности кои укажуваат на опасност да го повтори делото, па јавниот обвинител до судијата на претходна постапка од Основниот кривичен суд Скопје достави предлог за определување мерка притвор.
Македонија
Лимани: Конечно го деблокиравме процесот на полагање стручни испити за добивање лиценци за работа во детските установи

Министерот за социјална политика, демографија и млади Фатмир Лимани денеска во изјава за медиуми го најави започнувањето на полагањето за стручни испити за добивање лиценци за работа во детските установи, процес кој беше во застој од 2023 година.
Во своето обраќање пред медиумите тој истакна дека лиценцата за работа за воспитувачи, негувателки, стручни работници, соработници и директори е задолжителен предуслов за вработување во градинките.
„Поради нефункционален електронски систем за полагање, голем број кандидати не можеа да пристапат кон испитот, што предизвика застој токму кога имавме најголема потреба од кадар во градинките на национално ниво. Со цел надминување на оваа ситуација, извршивме измени во Законот за заштита на децата, со кои се овозможи стручниот испит да се спроведува во хартиена форма како привремено решение, до 1 јануари 2026 година. По тој рок, процесот на лиценцирање ќе продолжи електронски,“ истакна Лимани.
Денеска полагаат околу 350 лица, а до крајот на овој месец, уште 350 кандидати ќе имаат можност да го завршат овој важен процес и да се стекнат со соодветна лиценца за работа.
„Сакам да нагласам дека сите пристигнати барања за стекнување со лиценца детално се разгледуваат, и секој барател ќе биде исконтактирано од страна на Комисијата. Министерството останува посветено на создавање фер, инклузивен и ефикасен систем на детска заштита,“ посочи Лимани.
Министерот истакна дека со законската измена се создаваат услови за нови вработувања и се поддржуваат млади професионалци кои ќе придонесат во градењето на иднината на нашите најмлади генерации.