Македонија
(Видео) Василевска: Нема да дозволиме носење на штетен закон и целосна партизација во образованието

Четири дена тензии во Собрание и манипулации во јавноста од страна на СДСМ и ДУИ кои се со цел да се протурка штетен закон за продлабочување на партизацијата во образовниот процес, обвини пратеничката на ВМРО-ДПМНЕ, Иванка Василевска.
„ СДСМ шверцерски како и секогаш што прави, сака неделовнички на дневен ред во Комисијата за образование, наука и спорт, да се стави закон којшто има за цел целосна партизација на образованието. Лажни се тезите на пратениците од владејачкото мнозинство кои напразно се обидуваат да го одбранат овој штетен закон.
Со овој закон платите на просветните работници нема да се зголемат! Како што напоменав и претходно, овој закон има за цел само партизација во образованието. Со овој закон СДСМ и ДУИ предвидуваат укинување на еден од механизмите за контрола на квалитет во образованието, т.е. да се вработуваат наставниците и професорите на неопределено време без приправнички стаж.
А, со тоа трансформацијата на работниот однос да се решава помеѓу неколку луѓе, по партиски клуч, помеѓу градоначалникот, директорот на училиштето именуван од градоначалникот, училишна комисија, како и комисија за трансформација. Целосна партизација во образовниот процес.
Доколку СДСМ и ДУИ беа искрени во намерата, и сакаа зголемување на платите во образованието, требаше да го прифатат предлогот од ВМРО-ДПМНЕ и коалицијата, и да го прифатат амандманот поднесен на законот за минимална плата, со него се предвидува износот на коефициентите и вредноста на бодот на колективните договори на сите нивоа и во сите области да се усогласи со порастот на минималната плата.
Со овој амандман скалесто ќе се зголемуваа платите, каде основната вредност на најнискиот коефициент и бод се изедначува со износот на минималната плата.
Пратеничката група на ВМРО-ДПМНЕ и коалицијата нема да дозволи носење на штетен закон за образовниот процес и за целосна партизација во образованието. На Македонија и е потребено квалитетно образование“ порача Василевска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Познатиот црногорски пејач се прости од Панчо: Од првиот ден те гледав како брат

„Од првиот ден те гледав како брат. Знаеш кога луѓето се препознаваат на прв поглед, како да ги познаваш цел живот. Твојата љубезност, насмевка, љубов, ентузијазам и сила ме воодушевуваа на секоја средба и ме охрабруваа за секој нов ден“, напиша црногорскоот пејач, Сергеј Четковиќ на социјалните мрежи.
„Имавме многу планови, идеи… Многу работи да правиме, раскажуваме, создаваме…
Патувај, брате мој, одмори се. Нека ангелите те водат на подобро место и нека Господ ти го подари Рајот!
Те сака твојот брат“, додате Четковиќ.
Пејачот Владимир Блажев-Панчо почина вчера, седум месеци по трагедијата во Кочани.
Македонија
(Видео) Филипче од Битола: Економијата е заглавена, инфлацијата галопира – Мицкоски ја влече државата назад

Претседателот на Социјалдемократскиот сојуз на Македонија, д-р Венко Филипче, на вчерашната граѓанска трибина во Битола, посочи дека Владата на ВМРО-ДПМНЕ, за година и пол ја заглави економијата и го уназади напредокот на државата.
„Економијата е заглавена, инфлацијата галопира, а платите се замрзнати. Оваа власт не ги решава проблемите на луѓето туку ги игнорира.Оваа власт гази по солидарноста, човечноста, демократијата, напредокот и правичноста“, рече Филипче.
Но, не само во економскиот дел, со ВМРО-ДПМНЕ, како што рече Филипче, државата назадува и политички.
„Мицкоски не ја носи државата напред туку ја влече назад. Во конфликти, во реваншизам, во поделби. И секогаш кога е соочен со критика заради својата неспособност вината е кај некој друг. Ова е политички кукавичлук“, рече Филипче.
Во обраќањето пред граѓаните, Филипче порача дека 19 октомври е повик за враќање на нормалноста.
„На 19 октовмри одговорот е кај народот. Одговорот сте вие. Одговорот ќе дојде од секоја врата, од секое маало, од секое семејство кое веќе знае: доста беше. Време е за враќање на нормалноста. Време е за политика што носи резултати, не изговори. Време е за луѓе што се борат за другите, не за себе“, посочи претседателот на СДСМ, Венко Филипче.
Македонија
Мицкоски: Филипче и Заев имаат ист вирус, со рака на срце лажат, но за истиот има лек и тоа е народот

На вчерашниот митинг во Крива Паланка во рамките на кампањата со слоган „Вистинскиот избор! Со твојот човек! За твоето место! За твојата иднина!“ за локалните избори кои ќе се одржат во недела на 19 октомври, се обрати претседателот на ВМРО-ДПМНЕ, Христијан Мицкоски при што порача дека Паланка заслужува промени затоа што на овие избори се одлучува за иднината на вашата општина и добро се знае дека СДСМ не е никаква алтернатива, туку партијата која е длабоко заглавена во бизнис спрегите на тие што ја водат.
Мицкоски се осврна на тоа што го зборува Венко Филипче на митинзите на СДСМ, при што додаде дека не може да поверува дека тоа го слуша за што нема ни логично објаснување зошто вака зборува, како човекот да е нов и како прв пат да се занимава со политика, а заборава дека беше главна перјаница заедно со неговиот ментор и гуру, Зоран Заев во претходните влади на СДСМ кога се ограбуваше и уништуваше Македонија.
„Сега дошол овде и ни кажува како тој ја доживува реалноста. Не сфаќам како може човек без образ да зборува и да се прави дека е некој друг. Тоа во медицината го викаат патологија. Патологија својствена за еден човек што ставаше рака на срце кога се колнеше во македонската жица. Но, очигледно, тоа било заразно, па тој вирус денес го има фатено и овој нов претседател на СДСМ, Венко Филипче. Вирусот започнува со чувство на самодоверба. Расте, расте … додека не прерасне во чувство на божественост. Следниот симптом? – раката на срце! Човекот што го има вирусот, инстинктивно, што и да зборува, ја става раката на срце и се колне. Понекогаш звучи чудно, невообичаено, дури и непотребно … Но, симптомот е таков“, рече Мицкоски.
Додаде дека вториот симптом е да се прави како да не е од овде, како да е нов, чист, чесен, и како да не го познаваме.
„И што е најинтересно, понекогаш и самиот верува во тоа што го зборува. А кога не верува тој, верува тогаш оној што му дава насоки и му го пишува говорот. Потоа доаѓа втората фаза, а тоа е заборавањето. Заборава дека другите го знаат. Заборава дека имал шанса да направи нешто. И не само што ја прокоцкал, туку е директно виновен. За трагедии. За корупција. За предавства. За срам, којшто и го нанел на својата држава“, истакна Мицкоски.
Мицкоски понатаму, посочува дека еден од критичните, а можеби најкритични симптоми на вирусот, е јахтата, каде носителот на вирусот добива невидена желба за луксуз.
„Се вози на јахта, мисли дека плови над реалноста. А најсилниот симптом, тоа што не реагира на ниедна вакцина, е лажењето. Тоа е неверојатно! Што да каже човекот, апсолутно е невистина и лаже. Измислува реалност што му одговара и живее во неа како да е нормално“, рече Мицкоски и додаде дека „за овој вирус има две вакцини, каде првата делумно помага, а втората, целосно лекува“.
„Првата се вика Харис Џиновиќ. Кога ќе слушне негова песна, кај носителот на вирусот се појавува едно убаво чувство на еуфорија, што ги смирува симптомите за кратко време. Но, само за кратко. Вистинскиот лек е друг. Тој е сериозен, темелен, опасен за сите што се заразени со овој вирус. Лек што не заборава. Лек што не се потценува. Лек што го враќа човекот во реалноста со тресок, директно на земја. Таа вакцина е силна. Достоинствена и во согласност со сите демократски стандарди. Таа вакцина, тој лек се вика народот на Македонија и тој народ ќе им се случи за неколку дена од денес, на 19 октомври. Народот е лекот, лекот за да се освестат и да престанат да го потценуваат! Народот никогаш не заборава. Народот помни и помни добро, а помни за да не се повтори. Народот е лекот и со силата на тој лек, Македонија ќе победи. Ќе го победи вирусот што го зафати ова раководство на СДСМ, вирусот на ароганција, потценување, корупција и несфатливо однесување“, порача претседателот Мицкоски од Крива Паланка.