Европа
Германските медиуми коментираат: Путин ја врати Студената војна
Германскиот печат го коментира признавањето на Путин на самопрогласените народни републики и намерата за испраќање војници во источна Украина. Која е стратегијата зад овие потези? Што навистина сака Путин, се прашуваат коментаторите, а пишува „Дојче веле“.
Германскиот јавен сервис АРД го нарекува испраќањето руски војници во источна Украина дел од „циничниот план на Путин за ескалација на конфликтот“: „Признавањето на сепаратистичките области Донецк и Луганск цинично наречени народни републики и испраќањето војници следи по брутална калкулација и прецизен план – и ова можеби не е последниот потег на Путин во обидот повторно да го воспостави подрачјето на моќ на Советскиот Сојуз“.
АРД на својот портал Tagesschau.de додава дека постои страв оти овие постапки нема да го задоволат „гладот за територија“ на Путин, односно дека постои оправдано сомневање оти Русија сега работи на сценарио во рамките на кое би „откинала“ и некои други украински региони со цел да создаде „коридор до Крим“.
„Хенделсблат“ пишува дека „лутиот говор“ на Путин е историска цензура за Европа: „Рускиот претседател не само што го закопа мировниот процес во Минск, туку и ја врати Студената војна“. Германскиот весник забележува дека говорот на Путин бил говор во кој тој се обидел да го оправда сето она што ја води Европа на работ од војна и сето она што сè уште може да го загрози континентот натопен во крвта на двете светски војни.
„Ханделсблат“ пишува дека вчерашниот говор на Путин бил „полн со презир кон Западот, полн со повредена гордост за поранешната големина на Русија, полн со нескриени закани за враќање на она што на Русија, по негово мислење, историски ѝ припаѓа“.
Многу нешта се акумулирале и сето тоа мораше да излезе на виделина, се забележува во коментарот на весникот кој излегува во Дизелдорф.
Минхенскиот „Зидојче цајтунг“ во коментар вели:
„Признавајќи ги таканаречените народни републики и испраќајќи војници во тие области, рускиот претседател го прекрши меѓународното право. Тој по втор пат во осум години ги менува границите во Европа, го нарушува државниот суверенитет и се заканува како некој насилник кој чека во темен агол на улицата. 190.000 војници чекаат со вклучени мотори. Идеолошката историска лага на Путин ќе им послужи како наредба за акција. Рускиот претседател пушти во оптек историски уникатен фалсификат, кој ги храни сите оние кои веруваат во него, ги храни со мизерно оправдување на гласната неправда“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Во Киев се урива споменик кој ја слави блискоста меѓу Русија и Украина
Властите на Киев во вторникот почнаа да го отстрануваат споменикот од советската ера што ја означува врската меѓу Русија и Украина, повеќе од две години откако Москва започна инвазија врз Украина.
Неколку дена ќе бидат потребни за целосно уривање на споменикот од црвен гранит, кој се состои од дваесетина поединечни елементи, соопшти градската управа.
Тоа е всушност група статуи кои прикажуваат украински Козаци кои го опкружуваат лидерот Богдан Хмелницки и московскиот амбасадор.
Статуите ќе бидат префрлени во воздухопловниот музеј.
Споменикот е изграден во 1982 година за да го одбележи „обединувањето на украинскиот народ со братскиот руски народ“ во 1654 година, кога Хмелницки склучил сојуз со рускиот император во борбата против полско-литванскиот сојуз.
Советските историски книги го романтизираа како почеток на нераскинливо пријателство меѓу Украина и Русија.
Европа
Белоруските спортисти одат на Олимписките игри, Лукашенко: Победете ги противниците
Белорускиот претседател Александар Лукашенко денеска им порача на белоруските спортисти кои учествуваат на Олимписките игри во Париз под неутрален статус „да ги победат своите противници“.
„Ако сте избрале и одите таму под неутрален статус, истепајте ги, покажете им дека сте вистински Белоруси“, рече Лукашенко во соопштението за печатот на претседателството.
За време на посетата на регионот Могилев во Белорусија, жителите го прашале Александар Лукашенко што мисли за ова учество под неутрален статус, се вели во извештајот објавен на веб-страницата на белоруското претседателство.
„Спортистот треба да избере. Доколку одлучи да учествува на Олимписките игри, ќе биде уште пожесток. Затоа што разбирате дека состојбата на умот и гневот не се од мала важност во спортот“, реагира Лукашенко. „Вие сте Белорусија и кога ќе излезете како победници, тоа е добар начин политички да ги удрите во лице“.
Лукашенко, кој е на власт од 1994 година, ги искорени сите форми на опозиција во неговата земја, потиснувајќи мирно масовно движење во 2020 година. Тој е навикнат и на широки изјави и испади, како на пример кога парадираше со калашников во раката пред демонстрантите кои се противат на неговото владеење, нарекувајќи ги „стаорци“. Во февруари 2022 година, тој ја отвори Белорусија за руската армија за да може да ја нападне Украина од север.
Белорусија беше исклучена како земја од Игрите поради нејзината поддршка за руската инвазија на Украина, а нејзините спортисти се натпреваруваат под неутрален статус, без химна, знаме или национални обележја.
Европа
(Видео) Полицијата го бркаше убиецот со меч низ Лондон, објавена е снимка
Би-би-си објави снимка на која се гледа лондонската полиција која го брка напаѓачот со нож, кој денеска уби 13-годишно момче и повреди неколку други.
На снимката се слушаат полицајците како им викаат на граѓаните: „Заклучете ги вратите“.
Полицијата смета дека не се работи за терористички напад.
Полицајците уапсија маж вооружен со меч по извештаите за сериозен инцидент со прободување во североисточен Лондон.
Со електрошокер бил совладан 36-годишниот маж кој мавтал со меч.
„Со голема тага можам да потврдам дека 13-годишното момче кое беше избодено, почина во болница набргу откако му биле нанесени убодите“, изјави началникот на лондонската полиција Стјуарт Бел.
Уште две лица и двајца полицајци се во болница поради убодни рани и се надвор од животна опасност.
„Не мислиме дека постои закана за пошироката заедница, полицијата не бара други осомничени и се чини дека овој инцидент не е поврзан со тероризам“, рече Бел.