Кошаркарите на Минесота го совладаа Далас со 105:99 во еден од петте НБА натпревари закажани како дел од божиќниот специјал во најсилната лига во светот.

Најголема грижа на Далас пред овој меч беше состојбата на Лука Дончиќ, но Словенецот се опорави од повредата на петата (контузија) и го започна мечот, но заработи нова повреда (левата потколеница) и ја напушти играта на две ипол минути до крајот на втората четвртина. До тој момент Дончиќ постигна 14 поени.

Далас во тој момент веќе имаше двоцифрен минус, Минесота ја презема контролата, на полувреме имаа предност од 17 поени. Во третиот период на Рендл, Едвардс и Гоберт им се приклучи и Дивиченцо, Минесота дојде до највисоката предност од 28 поени, а третиот период го заврши со водство 90:68.

Но, со неверојатна поддршка од публиката, кошаркарите на Далас предводени од Кајри Ирвинг, не само што се вратија во натпреварот, туку на 48 секунди до крајот имаа само минус од два поени (101:99), и напад, но Ирвинг промаши тројка.

Потоа на сцена стапи Едвардс, погоди два пати во низа и го постави конечниот резултат.

Ентони Едвардс ја предводеше Минесота до победата со 26 поени, осум скока, пет асистенции, две украдени топки и една блокада. Џулиус Рендл постигна 23 поени, 10 скока и 8 асистенции, додека Руди Гоберт забележа 14 поени, 10 скока и две блокади.

Кај Далас Кајри Ирвинг постигна 39 поени, Лука Дончиќ со 14, Клеј Томпсон 12 и Квентин Грајмс 10 поени.

Фото/ makfudbal.mk

Кикбоксерот Бобан Илиоски и таеквондистката Милијана Рељиќ се избрани за најдобри спортисти на Македонија во 2024 година, на манифестацијата во организација на Министерството за спорт.

Таеквондо федерација на Македонија е избрана за најдобра спортска федерација за годината што изминува.

Најуспешен тренер/селектор за 2024 година е предводникот на машката ракометна репрезентација на Македонија, Кирил Лазаров.

За млада спортистка на годината е избрана ракометарката Ива Младеновска, додека најдобар млад спортист е кикбоксерот Силвио Мировски.

Најуспешен женски национален тим за 2024 година е ракометната репрезентација, а ракометарите беа избрани за најдобри во машка конкуренција.

За најдобар спортист со инвалидитет е прогласена Оливера Наковска Бикова, спортско стрелаштво.

Посебна награда доби најдобрата ракометна судиска двојка Ѓорѓи Начевски/Славе Николов.

Брилијантен натпревар во култниот „Медисон Сквер Гарден“ на Божик одиграа Њујорк Никс и Сан Антонио Спарс. Натпреварот кој Никс го добија со 117:114 го обелажаа Виктор Вембањама на едната и Микел Бриџис на другата, со 42, односно 41 поен.

Се чинеше дека Французинот ќе ги доведе Спарс до голем пресврт и триумф, се додека Бриџис не се „запали“ во последната четвртина и речиси сам не го реши овој меч.

Сан Антонио беше во голема серија во последната четвртина и имаше водство од 102:94.

Сепак, тогаш Бриџис со помош на Џош Харт ја презеде контролата врз играта и Њујорк го презеде водството кое го одбрани со серија од 6-0 во последната минута.

Микел Бриџис со 41 поен (17-250, четири асистенции, две украдени топки и две блокади, без загубени топки го предводеше Њујорк. Карл-Ентони Таунс имаше 21 поен и девет скока, Џејлен Брунсон 20 поени, седум скока и девет асистенции, а Џош Харт имаше 12 поени, 12 скока, шест асистенции и две украдени топки.

Блескаше на спротивната страна Виктор Вембањама, кој стана првиот играч во историјата на божиќните натпревари со 40+ поени, 15+ скокови и 5+ постигнати тројки. Тој постигна 42 поени (10/15 за два, 6/16 за три, 4/4 слободни фрлања), заедно со 18 скока, четири асистенции, украдена топка и четири блокади за 40 минути на паркетот.

Кај Спарс се истакнаа и Џереми Сохан со 21 поен, девет скока и две асистенции, како и Крис Пол со 13 поени, шест скока и седум асистенции и Девин Васел со 11 поени и пет асистенции.