Американскиот претседател Барак Обама му соопшти на украинскиот колега Петро Порошенко во телефонскиот разговор од понеделникот навечер, откако Москва најави дека во содејство со меѓународните организации ќе испрати хуманитарна помош, дека каква и да е руска интервенција во источна Украина без согласност на Украина би била „неприфатлива“ и би претставувала кршење на меѓународното право, објави Белата куќа.

Како што се наведува во соопштението на Белата куќа што го пренесуваат агенциите, украинскиот претседател Петро Порошенко во телефонскиот разговор рекол дека не престануваат гранатирањата на украинска територија од руската страна на границата, што Москва категорично го демантира. Американскиот челник Барак Обама, пак, го повикал Порошенко на воздржаност во воените операции за да се избегнат цивилни жртви.Западните сојузници на Киев во понеделникот со големо сомнение гледаа на руската најава дека во соработка со Меѓународниот комитет на Црвениот крст ќе испрати конвој со хуманитарна помош во Луганск и Ддонецк каде што се заканува хуманитарна катастрофа, сметајќи дека тоа може да биде параван за воена инвазија. Порошенко, исто така, го информирал Обама за консултациите со Меѓународниот комитет на Црвениот крст, за да се обезбеди хуманитарна помош за населението во источна Украина. „Претседателот (Обама) ја истакна итноста од слични хуманитарни напори и го повика претседателот Порошенко да продолжи да покажува воздржаност и претпазливост во воените операции за да се избегнат жртви меѓу цивилното население“, се наведува во соопштението на Белата куќа. Притоа Обама и Порошенко се согласиле дека „секоја руска интервенција во Украина без формална и јасна согласност и одобрување на украинската влада би била неприфатлива и би го прекршила меѓународното право“.Двајцата челници се согласиле и „дека сите страни треба да им дадат првостепено значење на дипломатските напори во барањето решение на кризата“. Си истакнува и дека Обама „ја изразил својата сериозна поддршка на суверенитетот и територијалниот интегритет на Украина“.Претходно во понеделникот рускиот претседател Владимир Путин изјави дека Русија ќе испрати хуманитарна помош во источна Украина и покрај пораките од Западот дека не би смеела со хуманитарна помош да прикрива инвазија.Украина соопшти дека наводно има сознанија дека Русија распоредила 45 илјади војници на нејзината граница, па дури и го прецизираше бројот на тенкови, авиони, борбени хеликоптери и ракетни лансери, додека НАТО тврди дека постои „голема веројатност“ од руска воена агресија во источна Украина. Претседателот на Европската комисија Жозе Мануел Баросо објави дека на рускиот претседател Путин во телефонски разговор му порачал „да не тргнува во еднострана воена акција во Украина, под никаков изговор, па ниту под хуманитарен“. Во соопштението за истиот разговор на Кремљ, пак, се наведува дека покрај разговорите за актуелните економски проблеми меѓу ЕУ и Русија, било јасно кажано дека Москва ќе испрати хуманитарна помош во соработка со меѓународните организации во рускојазичните украински региони. Порошенко изјави дека го поддржува доаѓањето на хуманитарна мисија, но и дека тоа мора да биде меѓународна акција под покровителство на Црвениот крст, како и дека покрај Русија мора да учествува и Европската унија./крај/мф/сн

Извор: Макфакс