Македонија
ВМРО-ДПМНЕ: СДСМ жали што на законит начин е сменет некадарен партиски директор на градинка

И по 120 дена ниту еден градоначалник на СДСМ и ДУИ не излегоа со отчет за сработеното, посочуваат од ВМРО-ДПМНЕ.
„Наместо тоа СДСМ денес најави скандал, а во реалноста не видовме ниту жижалица, а не пак петарда или бомба. Видовме како СДСМ жали што на законит начин е сменет некадарен партиски директор на градинка од овластен ревизор. По теркот на тоа што сме навикнати од СДСМ денес не видовме како некој договара бизнис од 200 илјади евра како што тоа пред камера го правеше лидерот на СДСМ Зоран Заев, евро за него евро за вицето. Не видовме ниту грабање на туце пари како што тоа го направи директорот на власта Ден Дончев кој го пуштија да избега. Не видовме ниту договарање и продажба на софтвер сам на себе како тоа што го правеше Рашкоски“, реагираат од опозициската партија на одржаната прес-конференција од страна на СДСМ каде беа изнесени информации за незаконско работење на градоначалникот на ВМРO-ДПМНЕ во Гази Баба.
„Видовме бајат случај, каде СДСМ се жали што е сменет директор нивен партиски кадар кој несовесно си ја работел работата. Истиот тој ревизор за кој СДСМ вели дека е спорен бил претходно ангажиран од нивниот градоначалник Борче Горгиевски за кого исто така правел ревизија. Притоа СДСМ жали за тоа што е сменет нивен партиски кадар од позицијата директор, а не ги кажува прекршувањата на правилата, престапите и злоупотребите што биле правени од истиот тој директор. Ова не е ништо другу туку дефокус од актуелните скандали за претходниот кадар на СДСМ и градоначалник на Гази Баба, Борче Горгиевски против кого има повеќе активни истраги и кривични пријави, и за кого и државната антикорупциска комисија побара да се поведе кривична одговорност за изградбата на парцелата на Електроелемент“, е истакнато во нивното соопштение.
Главната болка, додаваат од ВМРО-ДПМНЕ е што за само 100 дена општината Гази Баба и градоначалникот Боби Стефковски отпочнал низа капитални проекти, и реализирал значајни градежни зафати со кои, како што велат, решава децениски проблеми за граѓаните на Гази Баба.
„Тоа нема да ги поколеба градоначалниците на ВМРО-ДПМНЕ и покрај силните опструкции од Централната власт да престанат да работат. Промените започнаа, и тие ќе донесат иднина“, стои во писмената реакција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сите основни училишта во Карпош добиваат фотоволтаични системи, извести Општината

Општина Карпош информира дека континуирано работи на зголемување на енергетската ефикасност и искористувањето на обновливи извори на енергија на својата територија, водејќи грижа за комфорот и условите за престој на децата во детските градинки и основните училишта.
Во таа насока, минатиот викенд започна поставувањето на фотоволтаични панели во општинските основни училишта „Војдан Чернодрински“ и „Владо Тасевски“. Поставувањето на овие он-грид фотоволтаични системи со капацитет од 20 KW, претставува огромен чекор кон заштеда на енергија, намалување на трошоците и зачувување на животната средина. Проектот е реализиран со поддршка од повеќе институции, вклучувајќи ја Владата на РСМ, Министерството за образование, како и Бирото за регионален развој и Скопскиот плански регион, велат од општина Карпош.
Во петокот исто така беа поставени фотоволтаици во ООУ „Братство“ со капацитет од 25 KW, а за оваа интервенција Општина Карпош издвои парични средства од својот буџет во висина од 1.000.000 денари. Во таа насока, општинскиот Сектор за екологија и енергетска ефикасност деновиве ќе подготви стручна анализа, со која прецизно ќе се утврдат заштедите кои би се акумулирале од поставување на фотоволтаичните системи во училиштата, информираат од општината.
– Со ова училиштето ќе има заштеда на енергија поготово во летниот период кога нема настава, што значи дека тие ќе приходуваат на својата сметка за да ги намалат трошоците за струја во зимскиот период. Покрај оваа иницијатива, се заложивме сите училишта да имаат вештачка трева на своите спортски терени, во сите училишта ќе имаме по една компјутерска сала, а исто така сите основци во Карпош од петто до осмо одделение ќе работат на смарт панели. Сите училишни установи на наша територија ќе бидат реновирани, што значи дека целосно сме се посветиле на подобрување на условите за престој и работа на наставниците и учениците, истакна градоначалникот Јакимовски.
Досега, Општина Карпош со сопствени средства постави вакви фотоволтаични системи со капацитет до 40КW во основните училишта „Јан Амос Коменски“, „Лазо Трповски“, „Димо Хаџи Димов“, „Петар Поп Арсов“ и „Вера Циривири Трена“. Во рамки на годишната Програма на Секторот за екологија и енергетска ефикасност и Акциониот план за ЛЕАП 3, оваа година ќе се постават фотоволтаични системи и во останатите две основни училишта, „Аврам Писевски“ и „Христијан Тодоровски Карпош“. Со тоа сите основни училишта во општината ќе бидат целосно опремени со сопствени фотоволтаици, што ќе ги направи енергетски ефикасни и финансиски одржливи институции, се наведува во соопштението на општина Карпош.
Македонија
Викендов казнети 2.324 возачи, половина од нив за брзо возење

Во изминатиот викенд (12/13.04) продолжувајќи со засилените сообраќајни контроли на патиштата низ земјава, полициските службеници од сите сектори за внатрешни работи издале вкупно 2.324 платни налози за сторени прекршоци од страна на учесниците во сообраќајот по однос на Законот за безбедност на сообраќајот на патиштата, информира Министерството за внатрешни работи.
Во рамки на изречените санкции овој пат радарските контроли покажале дека дури 1.132 возачи не ја почитувале пропишаната брзина на движење, додека пак за неправилно паркирање евидентирани беа 271 прекршок, како и 191 прекршок заради управување на возило без возачка дозвола.
Покрај ова евидентирани се и 92 учесници во сообраќајот кои што не користеле сигурносен појас, заедно со 105 возачи на мотоцикл кои што не носеле заштитна кацига, а 45 санкции се изречени за користење на мобилен телефон при возење. Исто така, 78 возачи се отстранети од сообраќај за возење под дејство на алкохол, а 16 минале на црвено семафор.
Во врска со прекршоците од Законот за возила од сообраќај се отстранети вкупно 64 возила од кои заради техничка неисправност осум а заради неважечка сообраќајна дозвола 56 возила.
„Сообраќајните контроли продолжуваат и во наредните денови. Апелираме до граѓаните да ги почитуваме сообраќајните правила и прописи за да ја зголемиме безбедноста во сообраќајот и заедно да придонесеме за посигурни патишта“, велат од МВР.
Македонија
„СДС да не се бламира, туку да се информира за истрагата за случајот во Кочани“, реагира ВМРО-ДПМНЕ

„Во СДС очигледно сонуваат навечер и кога ќе станат од досада решаваат да напишат соопштение, односно во истото да го раскажат сонот. Тоа е потврда и денеска, или пишуваат за случајот Кочани како немало истрага, како се било фарса“, реагира ВМРО-ДПМНЕ на соопштениетo на СДСМ.
„Нема да им ги раскажуваме деталите, бидејќи надлежните институции на дневна основа информираат, секако за она што не може да влијае на истрагата.
СДС сега можат само да седат слушаат, поточно да се информираат за истрагата, прво за тоа што го пропуштиле па потоа за тоа што тековно ќе се случува.
Јасно им е на сите во каква состојба е СДС, ама барем нека не се бламираат дополнително, туку нека се информираат и нека почнат за добро на државата барем за оние малкумина верни што им останаа“, се додава во реакцијата на ВМРО-ДПМНЕ.