Европа
Руските авиони практично веќе не можат да летаат во Европа, еве каде сè имаат забрана
Од Германија до Шведска, преку Франција и Италија, сè поголем број европски земји го затвораат својот воздушен простор за руските авиокомпании поради руската инвазија на Украина, а денеска кон ова се приклучи и Канда.
Во недела во 14 часот, германското Министерство за транспорт објави забрана за летови на руски авиони и оператори на авиони во германскиот воздушен простор. Берлин појасни дека оваа забрана важи три месеци, но дека не се однесува на хуманитарни летови.
Откако на почетокот изгледаше колеблива, Франција околу пладне објави слична мерка: „Франција од оваа вечер (недела) го затвора својот воздушен простор за сите руски авиони и авиокомпании. Европа одговара на руската инвазија на Украина со целосно единство“, објави на „Твитер“ функционерот од Министерството за транспорт, Жан Батист Џебари.
Истата одлука набрзо дојде од Ирска, потоа од Шпанија, Белгија, Холандија, Италија, Малта, Австрија и Македонија.
Владата на Луксембург, исто така, објави дека од недела ги подготвува неопходните инструкции за затворање на нејзиниот воздушен простор за руските компании.
Во северна Европа, вакви мерки во неделата најави Финска, која со Русија дели граница од повеќе од 1.300 километри, а истото го најавија и Шведска, Данска, Норвешка и Исланд.
Сите наведени земји им се придружија на Полска, Чешка, Естонија, Бугарија, Молдавија и Обединетото Кралство, кои вакви мерки усвоија претходниве денови.
Хрватскиот премиер Андреј Пленковиќ најави дека забраната за летови за руските компании ќе стапи на сила најверојатно утре (понеделник).
Надвор од Европа, ваква одлука најави и Канада, втората по големина земја на планетата.
Имајќи предвид дека многу земји веќе го затворија или најавија затворање на нивниот воздушен простор, рускиот воздушен сообраќај се соочува со многу широка зона на забранети летови, поради што авионите мора да прибегнуваат кон заобиколување на воздушните коридори.
Неколку европски земји, вклучувајќи ги Франција, Италија, Данска и Шведска, побараа паневропска забрана за руските авиони.
Како одмазда, Москва почна да забранува летови над нејзина територија на авиони поврзани со европските земји кои таквата одлука ја објавија во последните денови.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
(Видео) Украинците објавија снимка: Го уништивме рускиот систем Бук, не можеа да го изгаснат пожарот
Украинските сили за специјални операции тврдат дека го уништиле лансерот на рускиот противвоздушен ракетен систем Бук на линијата на фронтот во регионот Суми.
Според извештаите, операторите во украинската единица забележале руски противвоздушен ракетен систем Бук-М1 додека изведувале борбени операции на фронтот.
Операторите потоа користеле нападни беспилотни летала за да ја нападнат целта. Русите неуспешно се обиделе да го изгаснат пожарот и да ја спасат својата опрема, тврдат Украинците. Тие споделија и видео на кое се гледа експлозијата и последователниот пожар.
Украинците наведуваат дека лансерот со шест проектили бил уништен со прецизен удар. Инаку, Украинците во вторникот пријавија и уништување на два Бука на истиот дел од бојното поле.
Европа
Грузија сака да донесе закон за „странски агенти“, oфицијален претставник на ЕУ: Неприфатливо
Висок функционер на Европската унија денеска ја предупреди грузиската влада дека предложениот закон за „странски агенти“ е неприфатлив и ќе претставува пречка во напорите на земјата да се приклучи кон ЕУ, доколку биде усвоен во сегашната форма.
Грузискиот парламент вчера го усвои законот во второто читање, за кој опозицијата вели дека е инспириран од Кремљ, додека полицијата употреби солзавец и шок-бомби за да ги растера толпата демонстранти.
Владата смета дека законот е неопходен за да се гарантира транспарентно странско финансирање на невладините организации.
Секоја вечер, речиси еден месец, се поголем број демонстранти излегуваат на улиците. Вчера десет илјади демонстранти го блокираа центарот на Тбилиси на најголемиот антивладин митинг организиран досега.
Герт Јан Купман, директор на Управата за проширување на Европската комисија, за новинарите во главниот град на Грузија изјави дека Брисел ја следи ситуацијата и е загрижен за тоа што се случува.
„Гледаме загрижувачки случувања кога станува збор за законодавството. Законот за транспарентност, кој беше усвоен во второ читање, е неприфатлив во сегашната форма и ќе создаде сериозни пречки на патот кон пристапување во ЕУ“, рече Купман.
„Но, има уште време. Во септември ќе излеземе со препораки дали да ги започнеме пристапните преговори со Грузија и да објавиме извештај во октомври и ноември, така што има уште време. Но, сега топката кај владата“, додаде тој.
Грузискиот парламент се очекува да го разгледа законот во третото читање за околу две недели.
Европа
Русија: Не ја гледаме поентата на мировната конференција во Швајцарија
Русија објави дека не ја гледа поентата на конференцијата за прекин на огнот во Украина што Швајцарија ја планира за средината на јуни и на која Москва не беше поканета. Швајцарската влада соопшти дека Русија „во овој момент“ не е меѓу десетиците поканети земји, додавајќи дека е отворена за нејзино учество, но дека Москва не е заинтересирана. Берн го најави собирот во јануари, велејќи дека го организирал на барање на украинскиот претседател Володимир Зеленски.
Портпаролот на Кремљ, Дмитриј Песков, нагласи дека Москва не ја смета за веродостојна иницијатива.
„Не разбираме каква пресвртница би била таа мировна конференција“, им рече тој на новинарите. „За каква конференција зборуваме, за каква сериозна конференција со сериозни очекувања дека ќе има некакви резултати, без учество на Русија?
„Тоа е целосно невозможно и јасно е дека тоа е некаква иницијатива која не е фокусирана на резултати“, заклучи тој.
Швајцарската влада соопшти дека „мировниот процес не е можен без Русија. Украина, од друга страна, ги доведува во прашање придобивките од руското учество на состанокот што ќе се одржи во близина на градот Луцерн.
„Знаеме дека нема смисла да ја имаме Русија на маса ако не можете да се осигурате дека таа ќе дејствува со добра волја“, рече шефот на украинската дипломатија Дмитро Кулеба минатата недела во интервју за магазинот „Форин полиси“.
Кулеба смета дека создавањето дополнителен притисок врз Русија на бојното поле и обединувањето на земјите „кои ги делат принципите“ ќе помогнат Русија да биде подготвена да учествува во дијалогот.