Кривична пријава за загрозување со опасно орудие против „Командант Коки“ ќе поднесе СВР Скопје до надлежното Обвинителство, информираше во среда Министерството за внатрешни работи

Триесет и петгодишниот Н.Ѓ., познат по прекарот „Командант Коки“, во вторник околу полноќ преку телефон го повикал М.М. на паркинг просторот пред Машинскиот факултет во Скопје. Кога пристигнал, Коки излегол од возилото и со влечење и грубо малтретирање го исфрлил М.М. од возилото и удирајќи му два шамари му наредил да седне на скалите кои биле во непосредна близина. Потоа од возилото извадил дрвена безбол палка и му наредил да ја испружи десната рака, заканувајќи му се дека ќе му ја искрши.

Откако М.М. не го послушал, Н.Ѓ. почнал да го испрашува кој го финансира него и неговите приврзаници кои ги бараат промените и реформите во Социјалдемократскиот сојуз на Македонија, при што со упатени сериозни закони по животот на М.М. му наредил во иднина да го информира за секоја понатамошна активност. Потоа сите тројца влегле во возилото и заминале кон Олимпискиот базен, каде М.М. го оставиле, а двајцата се упатиле во непознат правец.

М.М. случајот го пријавил во службените простории на СВР Скопје, по што е распишана телеграма за потрага по Н.Ѓ., кој истиот ден е приведен од припадниците на ПМЕП-БПК. При претресот на возилото „Алфите“ ја пронашле дрвена безбол палка со која се претпоставува дека Н.Ѓ. му се заканувал на оштетениот.

Инаку, Н.Ѓ. и досега е познат на полицијата, односно против него се поднесени три кривични пријави за насилство и учество во толпа, за што надлежен суд му изрекол условна осуда. /крај/со/мф