Македонија
(Видео) Мицевски: На власта ѝ се брза да го наполни Уставниот суд со партиски кадри
На власта ѝ се брза да го наполни Уставниот суд со партиски кадри. Ова можеше да биде тест на демократските капацитети на власта, но очигледно решаваат да се движат по патот на поларизација, партиски комбинаторики и ова што се прави е апсурд, изјави пратеникот од ВМРО-ДПМНЕ, Никола Мицевски, на денешната собраниска седница по предлогот на власта за разрешување на пратеникот Фадил Зендели од Беса од Комисијата за прашања за избори и именувања.
Мицевски на потписниците од власта на овој предлог им честита „Среќна Нова ’49“ потенцирајќи дека ова што се прави е преседан и власта со сила ја поларизира работата на Собранието.
„Потписниците се повикуваат врз основа на член 114 и 118 од Деловникот, но член 114 вели дека Собранието врши избори, именувања и разрешувања на носители на јавни и други функции на начин утврден во согласност со Уставот и законот. Кој носител на јавна функција се разрешува од веќе формирана комисија? Се разрешува пратеник што е назначен и кој се назначува на првата пленарна основачка седница на Собранието. Членот 118 вели формирање работни тела. Од ова што се гледа тука изгледа како да сакаат да го разрешат Фадил Зендели од пратеник“, истакна Мицевски.
Тој нагласи дека Комисијата е функционална и комплетна, но власта брза со разрешување на Зендели за да може што побргу да назначи партиски уставни судии.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Доцни платата за вработените во Јавното претпријатие „Улици и Патишта“
Вработените во Јавното претпријатие Улици и Патишта не ја добиле платата за август која им се исплатува во септемри, иако рокот за исплата е до 15-ти во месецов. Во отвореното писмо до јавноста, вработените тврдат дека се под константни притисоци и се плашат да штрајкуваат, а како главен виновник за состојбата со платите го посочуваат директорот на претпријатието. Тие тврдат и дека претпријатието има пари, но плати нема.
„Платата за месец септември не е исплатена иако постои информација дека Град Скопје пред десетина дена префрлил повеќе од 40 милиони денари. Новоназначениот ВД директор, Ванчо Умленски, наводно го преземал компјутерот од секторот за Финансии и сите средствата ги пренасочил на добавувачи, меѓу кои и 19 милиони денари на „Пуцко Петрол“, иако на вработените им се потребни 15 милиони денари за исплата на платите„, велат Вработени во ЈП Улици и Патишта.
Од Град Скопје тврдат дека парите за плати треба да ги обезбеди самото претпријатие.
Македонија
Свежо утро, а преку ден сончево и релативно топло
Утрово посвежо, а преку ден, времето ќе биде сончево и релативно топло со мала облачност и со слаб променлив ветер. Минималната температура ќе биде во интервал од 3 до 13, а максималната ќе достигне од 22 до 28 степени, информираат од Управата за хидрометеоролошки работи.
Во Скопје, исто така, утрото посвежо, преку денот сончево и релативно топло време. Според најавите, минималната температура ќе се спушти до 7, а максималната ќе достигне до 27 степени.
Слично време нѐ очекува и утре, додека за во вторник и во среда, најавено е преодно наоблачување со локални врнежи од дожд, наместа поројни, со услови за појава на грмежи.
Македонија
Од денес започнува есента
Есента во земјава и на северната хемисфера почнува денеска во 14:43 часот. Во исто време на јужната полутопка на Земјата ќе настапи пролетта.
Првиот есенски ден е 266-иот ден во годината и ќе трае 12 часа и девет минути. Сонцето во Скопје изгреа во 6 часот и 21 минута, а ќе зајде во 18 часот и 30 минути. До карјот на годинава остануваат уште 100 дена.
Есента ќе трае 89 дена, до 21 декември во 10 часот и 20 минути, кога календарски започнува зимата.
Синоптичарите на првиот ден од есента најавуваат посвежо утро, а преку ден, сончево и релативно топло време со мала облачност и со слаб променлив ветер.