Македонија
Лукаревска: Родовата рамноправност не познава политичка припадност
СДСМ како партија е пионер во она што значи унапредување на позицијата на жената и ставање на пиедестал на она што значи женски права, истакна заменик-претседателката на СДСМ, Сања Лукаревска, на трибината „Еднакви, активни, гласни“, во организација на Форумот на жените на СДСМ.
Лукаревска посочи дека СДСМ во изминатиот период реализирал доста мерки и политики што значат унапредување на правата на жените.
„Се гордеа што како партија донесовме огромен број мерки што значат подобар животен стандард, се гордеам затоа бевме дел од многу женски стратегии и декларации со кои СДСМ направи огромен број промени во интерес за жените. Едно е сигурно, родовата рамноправност не познава ниту политичка, ниту верска ниту социјална припадност, тоа мора да го решаваме сите жени заедно, чекор по чекор“, порача Лукаревска.
Потсети дека СДСМ прв вовел принцип на коносители и принцип 50-50 на пратеничките листи,
„Во СДСМ имаме целосна рамноправност 50 отсто жени во сите тела и органи во партијата, тоа значи дека рамноправно се слуша нашиот глас, дека знаеме да носиме одлуки што овозможуваат придобивки за сите граѓани. Меѓутоа, она што е битно и сега и во иднина е женската солидарност во политиката и во нашата партија и воопшто во политиката. Сигурна сум дека успешен политички дијалог може да почнеме токму ние жените. Ќе се бориме и понатаму да нема машки и женски професии, туку да има успешно менаџирање на самата професија, да нема машки и заеднички перспективи, туку да има реални заеднички можности. Ќе се бориме да нема веќе машки и женски прашања, туку прашања од општествен интерес“, заклучи Лукаревска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Дојде ВМРО-ДПМНЕ и Мицкоски и платите почнаа да паѓаат, обвинува Тренчевска
Економските политики на Христијан Мицкоски и владата на ВМРО-ДПМНЕ потфрлија и за прв пат, после седум години постојан раст, сведоци сме на пад на просечната плата кај нас – намалена е за 1.000 денари, рече на прес-конференција Јована Тренчевска од СДСМ.
Според официјалните податоци на Државниот завод за статистика, просечната месечна плата по вработен, во јули годинава изнесувала 40.961 денар. или за 1.000 денари помалку од платата во месец јуни кога изнесуваше 41.939 денари.
„Ова не е само статистика. Ова намалување на просечната плата ги одразува погрешните политики на Мицкоски и ВМРО-ДПМНЕ од една страна и претставува удар врз стандардот на граѓаните од друга страна. Пад од 1.000 денари значи помалку пари во џебот на народот, помалку пари за храна на трпезите, помалку можности, намален квалитет на живот, понизок стандард. Политиките на владата потфрлија во клучната сфера, платите на луѓето, токму онаму каде граѓаните најмногу очекуваа и каде најмногу им е потребно. Наместо да поттикнуваат раст и зголемување на платите ВМРО-ДПММНЕ ја враќа политиката од минатото владеење каде работниците беа евтина работна сила. Ова намалување на просечната плата е јасен показател дека нивното економско управување не е само несоодветно – тоа е и штетно. СДСМ во изминатите години ја зголемуваше просечната плата во континуитет и во време на кризи и достигна над 41.000 денари. Во времето на ДПМНЕ, во 2015 година, просечната плата изнесуваше само 20.853 денари. Платата постојано растеше со СДСМ со години наназад, во 2020 година просечната плата беше 28.294 денари, во 2022 година беше 34.364 денари а во 2024 година достигна над 41.000 денари. Дојде ВМРО-ДПМНЕ и Мицкоски и платите почнаа да паѓаат. Неприфатливо е која било влада да дозволи тоа да се случи, особено кога семејствата се борат со секојдневните поскапувања. Бараме владата на Христијан Мицкоски да ја промени оваа погрешна политика и да ги зголеми платите. СДСМ ќе продолжи да се бори за поголеми плати, правични плати и подобри услови за живот за сите наши граѓани“, додаде Тренчевска.
Македонија
ВМРО-ДПМНЕ: Лага e тврдењето на Николовски дека хотелите во САД во кои престојувал биле евтини
„Љупчо Дон Николовски, очигледно, кога станува збор за народни пари не памети колку каде дал, секако сеедно му е. Лага e тврдењето на Дон Николовски дека хотелите во САД во кои престојувал биле евтини. Хотелите во САД се платени неколку стотина евра од вечер, потврда за тоа се и документите кои самиот Дон Николовски ги доставил во сметководството на МЗШВ“, велат од ВМРО-ДПМНЕ.
„Дон Николовски ништо не го вади од одговорноста, дека додека земјоделците тука мака мачеле со откуп и пласман, тој ноќевал по скапи хотели платени неколку стотина евра. Дон Николовски раскалашено се однесувал со народните пари. Дон Николовски е лицемерен, никој повеќе не му верува„, се вели во реакцијата на ВМРО-ДПМНЕ.
Македонија
Доцни платата за вработените во Јавното претпријатие „Улици и Патишта“
Вработените во Јавното претпријатие Улици и Патишта не ја добиле платата за август која им се исплатува во септемри, иако рокот за исплата е до 15-ти во месецов. Во отвореното писмо до јавноста, вработените тврдат дека се под константни притисоци и се плашат да штрајкуваат, а како главен виновник за состојбата со платите го посочуваат директорот на претпријатието. Тие тврдат и дека претпријатието има пари, но плати нема.
„Платата за месец септември не е исплатена иако постои информација дека Град Скопје пред десетина дена префрлил повеќе од 40 милиони денари. Новоназначениот ВД директор, Ванчо Умленски, наводно го преземал компјутерот од секторот за Финансии и сите средствата ги пренасочил на добавувачи, меѓу кои и 19 милиони денари на „Пуцко Петрол“, иако на вработените им се потребни 15 милиони денари за исплата на платите„, велат Вработени во ЈП Улици и Патишта.
Од Град Скопје тврдат дека парите за плати треба да ги обезбеди самото претпријатие.