Американскиот претседател Барак Обама во интервју за магазинот The Economist го минимизираше значењето на Русија, велејќи дека тоа е нација којашто „ништо не произведува“ и истакна дека Западот мора да биде „многу цврст“ кон Кина во период кога Пекинг настојува да го прошири своето влијание во светската економија.

Американскиот претседател Барак Обама сака да го задржи фокусот на американската надворешна политика на Азија како одговор на јакнењето на кинеската економска и воена моќ. Меѓутоа, последните години во тоа го попречуваат другите светски кризи, вклучително и украинската за којашто ја обвинува Русија. Русија е третиот најголем производител на нафта и втор произведувач на природен гас во светот. Европа значително зависи од увозот на рускиот гас, што го компликува одговорот на Западот за украинската криза. Обама настојува да го намали влијанието на Русија во светот, а за рускиот претседател Владимир Путин вели дека е челник кој поради моментални политички поени предизвикува краткорочни проблеми кои долгорочно ќе ѝ наштетат на Русија.„Мислам дека е важно да се задржи перспективата. Русија ништо не произведува. Имигрантите не трчаат во Русија во потрага по подобар живот. Очекуваната животна возраст на мажите во Русија е 60 години. Населението е во опаѓање“, тврди Обама.Натаму во интервјуто за The Economist, американскиот претседател вели дека „не се чувствува разочаран“ од природата на сегашните односи со Русија, одговарајќи на прашањето за неговата идеја од 2009 година да ги „ресетира“ односите со Русија и натаму да ги развива билатералните односи. „Не се чувствувам разочаран. Имавме многу продуктивни односи со (поранешниот) претседател (Дмитриј) Медведев. Направивме многу, што требаше да се направи“, убеден е американскиот претседател. Притоа Обама ја опишува Русија како „Јанус со двете лица“, „гледајќи истовремено и на Запад и на Исток“. Говорејќи за Путин, Обама признава дека на кус рок рускиот претседател „може да ужива политичка популарност дома и да предизвикува сериозна загриженост во странство“, Сепак, смета дека Путин „претставува силен фактор на напнатост“ кој „во долгорочна перспектива може да биде опасен за Русија“. Обама се осврнува во интервјуто и на моменталната ситуација во Русија, допирајќи теми како што се животниот стандард и проблемите на регионалната безбедност, Американскиот претседател тврди дека Русија „претставува регионален предизвик“ кон кој САД „се одлучни решително да реагираат“. „Мораме да бидеме сигурно дека тие предизвици нема да доведат до остра ескалација на тензиите“ и „нуклеарното оружје нема одново да стане предмет на дискусија во меѓународната политика“, вели Обама.Обама минатата седмица изјави дека САД регистрирале дека Русија го крши договорот за нуклеарните ракети од кус и среден дострел од 1998 година со кој треба да се елиминираат крстосувачките балистички ракети кои се лансираат од земја. Москва веднаш одговори дека токму Вашингтон со постројките за вакви лансирни рампи во Полска и во Романија на границите со Русија го прекршува споменатиот договор. Американскиот претседател тензиите во односите со Кина ги карактеризира како „надминливи“ Кина е во територијални спорови со соседите во Јужнокинеското Море кое е богато со нафтени наоѓалишта, а со САД има недоразбирања во врска со прашањата како што се заштитата на интелектуалната сопственост или кибернетичкото шпионирање. „Една работа сакам да кажам за Кина, а тоа дека со нив морате да бидете многу цврсти, бидејќи ќе ги буткаат работите до крај, сѐ додека не се соочат со отпор. Тие немаат сентимент и не ги интересира апстракцијата. И затоа повикувањето на меѓународните прописи не е доволно“, истакнува Обама. Вели и дека трговските спорови ќе се смират кога Кина „ќе престане да биде глобална фабрика на евтини производи“, а нејзините компании ќе започнат да произведуваат поскапи производи коишто бараат заштита на интелектуалната сопственост. „Мора да постои механизам кој ќе биде остар кон нив кога сметаме дека ги прекршуваат меѓународните прописи, а од друга страна ќе им ги покаже потенцијалните долгорочни ползи“, истакнува Обама./крај/мф/сн

Извор: Макфакс