Македонија
(Видео) Арсовски: Иако Владата знаела дека ќе има криза, изминативе месеци потрошиле 2 милиона евра

СДСМ е директен виновник што државата и граѓаните не може да се справат со економската криза, изјави портпаролот на ВМРО-ДПМНЕ, Димче Арсовски.
„Иако знаеле дека ќе има економска криза, не презеле ништо. Не предвиделе антикризни мерки, кои требало да ја ублажат кризата што во моментот ја чувствуваат и живеат граѓаните. Наместо антикризни мерки, изминативе неколку месеци, иако знаеле дека ќе има сериозна економска криза, продолжиле од Владата со непродуктивни трошења. На пример, изминативе неколку месеци потрошиле 2 милиона евра на луксуз. Само вчера презентиравме дека за кафиња, златен прибор за јадење, хотелски сместувања, телефонски услуги и за режено цвеќе се потрошиле над половина милион евра“, истакна Арсовски.
„На пример, претпријатието ‘Железници’, иако е на работ на банкрот секој месец во годината, повторно потрошило над 7 милиони денари за канцелариски материјал и кондуктерски чанти. И ако некој ги праша вработените таму, самите ќе кажат дека можеби баш сега и не им се потребни чантите и дека имало претходно набавка, односно дека поважно им е редовно да земаат плата. Републичкиот совет за безбедност при сообраќајот, на пример, одвоил околу 5 милиони денари за услуги за печатење. Да беа свесни дека ќе има економска криза, иако знаеле, ќе сфатеа дека тие пари би било попаметно да ги потрошат на некоја друга ставка или за нешто друго“, нагласи Арсовски.
Додаде дека ЈП за стопанисување со станбен и деловен простор во време кога знаеле дека ќе има криза, за процена на деловен простор одвоиле 4,7 милиони денари.
„Ако сакале да заштедат и ако сакале да превенираат со трошење пари, ќе искористеле некоја од државните институции која може да направи процена на деловниот имот и ќе ја направеле процената, а претпријатието ќе ги заштедело овие 4,7 милиони денари. И, така, милионски суми се трошат непродуктивно изминативе месеци, иако од Владата знаеле дека ќе има економска криза. Нема ниту една антикризна мерка и она што се обидуваат да го наметнат дека го донеле изминативе неколку денови како антикризни мерки е задоцнето и нема да го даде резултатот за граѓаните да ја преживеат оваа економска криза“, рече Арсовски.
Според него, политиката на СДСМ е добро позната и се вели купи ден – помини, а тие самите, како што рече, живеат и уживаат во луксузот со парите на граѓаните.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мисајловски – Бардуани: Остануваме посветени на регионалната безбедност и стабилност

Денеска во Министерството за одбрана, министерот Владо Мисајловски се сретна со командантот на НАТО мисијата на Косово, КФОР, генерал-мајор Енрико Бардуани со кого разговараше за значајната улога на оваа мисија во зацврстувањето на безбедноста и стабилноста на Косово, а со тоа и на целиот регион.
„Оваа НАТО мисија е исклучително значајна за уште постабилен и побезбеден регион. Остануваме посветени на нашиот придонес кон КФОР и логистичката поддршка која ја даваме на оваа мисија и во иднина“, рече министерот на средбата.
Мисајловски порача дека во време на сериозни геополитички промени и нестабилност, сигурен и безбеден регион е од приоритетно значење за нас, додавајќи дека земјата ќе продолжи да биде столб на безбедноста на Балканот.
Имајќи предвид дека мандатот на генералот Бардуани како командант на КФОР завршува наскоро, министерот Мисајловски му се заблагодари за одличната соработка и координација поврзана со македонскиот контингент во оваа мисија.
Генералот Бардуани, пак, посочи дека македонските војници секојдневно покажуваат врвен професионализам и целосна посветеност на своите задачи и обврски. Тој изрази благодарност за континуираниот придонес на нашата држава во мисијата КФОР, нагласувајќи ја важноста на соработката во одржувањето на мирот и безбедноста во регионот.
Во рамки на посетата, генералот Бардуани се сретна и со началникот на Генералштабот на Армијата, генерал-мајор Сашко Лафчиски.
Македонската Армија во оваа мисија придонесува од 2020 година.
Македонија
Професорот Горан Марковски ќе се кандидира за градоначалник на Скопје

Професорот Горан Марковски, декан на Градежниот факултет, ќе биде независен кандидат за градоначалник на град Скопје, соопшти граѓанската платформа „Независни заедно“.
„Заедно да му дадеме шанса на градот, шанса да го водат стручни лица со храбро лидерство и визија за поубав град по мерка на човекот“, велат од платформата.
Кандидатурата на професорот е поддржана од граѓанската платформа „Независни“ заедно, составена од „Шанса за Центар“, „Зелените за Гази Баба“ и „Групација 389“.
Македонија
ДУИ нуди ветинг со меѓународен мониторинг: Нека се истражи имотот на секој политичар и на секоја политичка партија

ВМРО-ДПМНЕ е последната партија која има право да држи лекции за борбата против корупцијата, криминалот и политичките влијанија, затоа што денес, од позиција на власт, јасно демонстрира дека има само една цел: целосно да ја зароби државата, особено правосудството, велат од ДУИ.
Според нив, под водство на оваа влада, политиката отворено се меша во Обвинителството, Републичкиот судски совет и Советот на јавни обвинители, со класични политички сценарија за ставање на правдата под контрола.
ДУИ, додаваат од таму, не се плаши од независно правосудство ниту од транспарентност.
„Напротив, ние нудиме конкретно решение: ветинг со меѓународен мониторинг, за целосно чистење на политичката и јавната сцена од секое коруптивно влијание. Нека се истражи имотот на секој политичар и на секоја политичка партија. Нека се истражи најголемиот корупциски процес во државата – приватизацијата, која создаде недопирливи олигарси со монополи во клучни економски сектори, кои денес прават сè за да го блокираат европското интегрирање, од страв од фер конкуренција“.
ДУИ бара истрагата да се прошири и на институциите на државната безбедност и нивните вработени од 1945 година до денес, затоа што, како што велат, само така може да се затвори едно темно поглавје од минатото и да се изгради држава каде никој не е над законот.
„Тие што немаат што да кријат – го прифаќаат ветингот.
Времето на моноетнички проекти и етничка супериорност е завршено. Северна Македонија може да се гради само заедно, во духот на мултиетничноста и еднаквоста, а не под плаштот на „борба против корупцијата“ да се реализираат агенди кои ја поткопуваат државата и ја заробуваат за да спроведат моноетнички цели.
ДУИ останува цврсто определена да ја води државата напред кон европската интеграција, со чисти институции, со независно правосудство и со општество кое става крај на бескрајниот транзициски период“, истакнуваат од партијата на Ахмети.