Економија
Македонско-чешки бизнис-форум во Скопје: идентификувани сектори со најголем потенцијал за соработката

Македонски и чешки компании имаат долга историја на заедничка соработка со потенцијал за продлабочување, особено во секторите транспортна инфраструктура, енергетска индустрија и производство на медицинска опрема, беше истакнато на денешниот бизнис-форум, кој се одржа во DoubleTree by Hilton во Скопје, во организација на Сојузот на стопанските комори на Македонија и Амбасадата на Република Чешка.
На форумот учествуваа претставници на деловните организации од двете земји, кои ги презентираа своите интереси за соработка, инвестирање и зајакнување на деловните односи меѓу двете земји. По завршувањето на официјалниот дел, компаниите од двете држави имаа можност да остварат и директни бизнис-средби.
Едуард Муржицки, заменик-министер за индустрија и трговија на чешката влада, рече дека чешките компании нудат врвен квалитет на производи и услуги и искрено се заинтересирани за долгорочна и стабилна соработка.
„Се чини дека најголем потенцијал за идна соработка има во секторите транспортна инфраструктура или енергетска индустрија во сите нејзини сегменти вклучувајќи ги и обновливите извори на енергија. Гледам и голем потенцијал во областа на геолошките истражувања, еколошките технологии и управувањето со водите. Чешките компании може да му понудат на светот медицинска опрема со врвен квалитет. И, последно, но не и помалку важно, Чешка може да обезбеди разни технологии за развој на паметни и одржливи градови“, изјави Муржицки искажувајќи верување дека денешните деловни средби ќе имаат позитивно влијание врз развојот на економски односи меѓу двете држави.
Пред присутните се обрати и претставникот на Стопанската комора на Чешка, Јиржи Хансл, кој истакна дека чешките претприемачи ја гледаат Северна Македонија како перспективен партнер и идна земја членка на ЕУ.
„Чешка го поддржува нејзиниот пристап во ЕУ. Македонските, како и чешките компании, ќе имаат корист од многуте предности што ги нуди ЕУ и нејзиниот единствен пазар од 500 милиони потрошувачи. Верувам дека оваа деловна мисија ќе донесе нови можности за компании од двете земји, пред сѐ, во секторите како што се транспортот, инфраструктурата, енергетиката и здравството“, истакна Јиржи.
За да обезбеди соодветна рамка за зајакнување и интензивирање на соработката меѓу нашите земји, Сојузот на стопанските комори на Македонија и Стопанската комора на Чешка во рамките на форумот потпишаа меморандум за разбирање.
„Трговските врски меѓу двете земји имаат историја, а трговската размена е во нагорна линија, со потенцијал за унапредување и соработка со цел намалување на разликите во размената. Во исто време, на економски план за натамошен развој на соработката меѓу двете земји – ќе почнеме со интензивирање на деловните партнерства и промовирање на секторите со висок потенцијал“, изјави Ангелоски на потпишувањето на меморандумот.
Можностите и поволностите за инвестирање во нашата земја ги презентира заменик-министерот за транспорт и врски, Беким Реџепи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Економија
Димитриеска – Кочоска ќе го следи поскапувањето на бензините, не кажа дали тоа ќе повлече други поскапувања

Министерката Гордана Димитриеска – Кочоска по денешните најави за поскапување на бензините кажа дека Министерството за финансии ќе ја следи состојбата, но не даде конкретен одговор на новинарско прашање дали поскапувањето на бензинот кај нас ќе повлече и други поскапувања.
„Станува збор за берзански производ на кој не можеме да имаме никакво влијание, така што ќе следиме што ќе се случува. Сме имале години кога сме имале и многу високи цени, да се вратиме наназад да ги видиме, сега немаме некоја премногу висока цена на горивото меѓутоа да видиме што ќе се случува на берзанските производи. На тоа Владата не може да има влијание затоа што станува збор за цени кои се формираат на светските берзи“, рече министерката Димитриеска – Кочоска денес по состанокот со постојаната координаторка на Обединетите нации во земјава, Рита Колумбија, на кој се договорија амбасадите на координации во Министерството за финансии да ги договараат проектите за кои ќе одвојуваат средства во земјава, за да нема поклопување.
Регулаторната комисија за енергетика утрово извести дека од ноќеска по полноќ за 1,50 денар за литар поскапуваат бензините еуросупер 95, еуросупер 98 и дизелот, а мазутот е поскап за 1,293 денари по литар
Економија
Се зголемува цената на бензините и на дизелот

Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ) донесе Одлука со која се врши зголемување на малопродажните цени на нафтените деривати во просек за 1,63 % во однос на одлуката од 9.06.2025 година.
Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините за 4,088%, кај дизелот за 5,626%, кај екстра лесното масло за 5,127% и кај мазутот зголемувањето е за 5,691%.
Курсот на денарот во однос на доларот во изминатиот период по кој беа формирани цените со претходната пресметка е понизок за 0,6205%.
Малопродажните цени на бензините ЕУРОСУПЕР БС-95 и ЕУРОСУПЕР БС-98 и на ЕУРОДИЗЕЛ (Д-Е V) се зголемуваат за 1,50 ден/лит.
Малопродажната цена на Екстра лесното масло за домаќинство на (ЕЛ-1) се намалува за 1,00 ден/лит.
Малопродажната цена на Мазутот М-1 НС се зголемува за 1,293 ден/кг и сега ќе изнесува 39,779 ден/кг.
„Напоменуваме дека ова се максималните цени на нафтените деривати од 00:01 часот на 17.6.2025 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени“, велат од РКЕ.
Економија
Средба на гувернерот Славески со МБА: Стабилниот и одговорен банкарски сектор како неопходна потпора за економијата

„Во услови на светска неизвесност и постојани економски предизвици, воспоставувањето стабилен, добро капитализиран и одговорен банкарски сектор претставува суштинска потпора за граѓаните и за развојот на домашната економија.“ Ова беше една од централните пораки на средбата помеѓу гувернерот на Народната банка, д-р Трајко Славески и раководството на Македонската банкарска асоцијација (МБА) – претседателката, д-р Маја Стевкова Штериева и заменик-претседателот, м-р Бојан Стојаноски.
На средбата беше нагласено дека одржувањето на стабилноста на банкарскиот сектор е заеднички приоритет и предуслов за градење долгорочна доверба кај граѓаните и кај стопанството. Гувернерот Славески истакна дека банкарскиот сектор кај нас е добро капитализиран, со стапка на адекватност на капиталот од 19%, што овозможува отпорност и во услови на евентуални шокови. Воедно, беше потцртано дека Народната банка е активно вклучена во унапредувањето на регулативата преку свој придонес во подготовката на новиот Закон за банките, како и во доследното спроведување на Законот за решавање банки, заради понатамошно зајакнување на стабилноста и усогласеноста со европските стандарди.
„Народната банка преку добро поставените политики обезбедува стабилна и предвидлива средина. Тоа е предуслов за банките да ги исполнат очекувањата на граѓаните и компаниите – со сигурни, достапни и со квалитетни услуги“, рече гувернерот.
Посебен акцент беше ставен на потребата од натамошно унапредување на конкуренцијата во платниот промет, особено преку финтек-иновации и нови технологии. Во таа смисла беше отворено и прашањето за напредокот во пристапувањето на банките кон Единствената област за плаќања во евра (СЕПА). Беше нагласено дека крајниот рок за поднесување на барањата е 5 октомври оваа година и дека се очекува од банките да ги засилат активностите за навремено исполнување на оваа важна стратегиска цел, со која ќе се подобри интеграцијата и ефикасноста на прекуграничните плаќања.
Во однос на монетарната политика, гувернерот истакна дека Народната банка внимателно ги следи движењата на внатрешните и надворешните фактори на ризик. Секоја идна одлука за основната каматна стапка ќе биде донесена врз основа на детални макроекономски анализи, со цел да се зачува ценовната стабилност и да се поддржи економската активност.