Македонија
Активно вклучување на научните сознанија и кадровските капацитети од високообразовните институции при креирање на јавните политики
Американскиот универзитет на Европа – ФОН во рамките на активностите за одбележување на 19 години од своето постоење, денеска организираше дебата на тема „Улогата на Факултетите за правни и политички науки во иницирање, креирање и евалуација на јавните политики во Република Северна Македонија” на која учествуваа претставници од приватните и државните факултети за правни и политички науки, како и од Институтот за политички науки, медиуми и комуникација при Правниот факултет „Јустинијан Први“.
На дебатата, беше заклучено дека е неопходна поголема видливост и активно вклучување на факултетите за правни и политички науки, искористување на научните сознанија и кадровски капацитети во процесите на креирање, иницирање и евалуација на јавните политики кои се донесуваат во рамките на политичкиот систем во Република Северна Македонија“.
Раководителот на Институтот за политички науки, медиуми и комуникација при Правниот факултет „Јустинијан Први“, Иван Дамјановски во своето излагање посочи дека постои недостаток на сеопфатна државна стратегија за креирање на јавни политики и вклучување на научните сознанија во тој процес, лимитиран капацитет на човечки ресурси, недостаток на политички интерес и непостоење на база на податоци за досегашните спроведени истражувања.
Деканот на Факултетот за правни науки при Универзитетот „Св.Климент Охридски”, Горан Илиќ ја посочи потребата од зголемување на соработката помеѓу високообразовните институции со цел да се иницира постигнување на регистер на наставници и научници од сите факултети за правни и политички науки, регулирање на професијата дипломиран политиколог, како и издвојување на поголем буџет за истражување и наука.
Директорката на Институтот за социолошко правно-политички истражувања при Универзитет „Св. Кирил и Методиј”, Бојана Наумовска потенцираше пак, дека во државата воопшто не се прават системски истражувања и дека улогата на истражувачи на јавното мислење во последните години ја презеле невладините организации.
„Научните институции сè единствениот гарант на интересите на граѓаните и општеството. Затоа мораме да се избориме за регулатива, која што ќе обезбеди достоинствена положба на високообразовните институции кои можат многу да го подобрат квалитетот на јавните политики“, додаде Наумовска.
Според Јадранка Денкова, професор од универзитетот „Гоце Делчев” од Штип, Министерството за образование и наука како централна институција за валоризација и организирање на науката, знаењето и истражувањето, треба да воспостави механизми за креирање на база на податоци за спроведени истражувања и база на наставен кадар којшто може активно да се вклучи во процесите на креирање, иницирање и евалуација на јавните политики.
„Науката во нашата држава константно тоне, а од година во година опаѓа и финансирањето од државниот буџет. Во 2018 се издвоени само 0,36 отсто од БДП за наука и истражување, што е спротивно на трендовите во Европската унија каде што инвестирањето е во висина од 2,03 отсто“, потенцираше на денешната дебата Сејдефа Џафче, деканка на Факултетот за правни и политички науки при Американскиот универзитет на Европа – ФОН.
Според Билјана Пулеска Јанушевска в.д. ректорка на Американскиот универзитет на Европа – ФОН, високообразовните институции како големи и влијателни oрганизации во граѓанското општество и во државата имаат носечка улога во процесите на афирмација на општествените вредности и справување со општествените предизвици.
„Високообразовните институции со меѓусебна соработка и вмрежување треба секогаш да придонесуваат кон креирање на јавните политики, но и да понудат рационална и
навремена анализа и вреднување на сите сегменти на општествено-економскиот живот. Тоа е важно за демократизација на општеството и подобро планирање и исполнување на јавните потреби“, потенцираше ректорката Пулеска.
Во оваа насока и Башким Селмани, шеф на катедра за политички науки при Тетовскиот државен универзитет повторно укажа на потребата од поголема меѓусебна соработка помеѓу факултетите и издвојување на поголеми буџетски средства за наука и истражување.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ЦУК: 1.764 повици на бројот за итни случаи 112 во последното деноноќие
Центарот за управување со кризи (ЦУК) информира дека имало вкупно 1 764 повици на Единствениот повикувачки број за итни случаи 112 во ЦУК во последното деноноќие, од коишто „реални“ повици биле 52,44%, а 47,56% биле за други потреби на граѓаните што не биле итни. Кон Полиција биле упатени 62,93%, кон Итната медицинска помош 33,59%, а кон пожарникарите 2,32% од реалните повици кон 112 во ЦУК. Инаку, имало 842 повика за итни случаи на 112 за во ЦУК, што се вкупен збир од тие што биле за комбинирано решавање од „реалните“ повици (1,16%) и на тие што се именувани како „неитни повици“(47,56%). Сите тие биле предмет на примање, на обработка во ЦУК, а и на директно координирање за нивно решавање со институции и служби во Системот за управување со кризи (СУК).
Во последното деноноќие немаше евидентирани пожари на отворен простор. Имало само урбани.
Сите итни случаи се пријавуваат на Единствениот повикувачки број за итни случаи 112 во ЦУК, особено кога граѓаните имаат животозагрозувачки ситуации. Истовремено, ЦУК информира дека е потребно и е корисно да се следат препораките и информациите од медиумите за превенција, а и за реагирање при итни случаи.
Македонија
СДСМ: 27 април е крвав потсетник на режимот на ДПМНЕ
27 април е најцрниот датум во историјата на македонската демократија, 27 април е крвав потсетник на режимот на ДПМНЕ, велат од СДСМ.
„Вооружени насилници на 27 април 2017 година, поттикнати од ДПМНЕ, упаднаа во Собранието обидувајќи се да убијат пратеници, да повредат новинари и вработени во парламентот, да го загрозат уставниот поредок, ја доведоа државата пред амбис, на раб на граѓанска војна. Сеќавањата на крвавите лица на пратениците, нападнати со шипки и столици, влечењето за коса, дивеењето на насилниците, кои кршеа и уништуваа се пред себе во храмот на демократијата, се свежи и по седум години. Насилниците поддршка имаа и од Христијан Мицкоски, кој тој ден беше пред македонското собрание. Наместо извинување и осуда, Мицкоски стои во одбрана на осудените насилници за крвавиот четврток“, пишуваат од партијата.
„Ништо не е сменето во ДПМНЕ. Тоа е истата партија која сака одново да гази врз слободата, врз демократијата, да се пресметува со неистомисленици, да шири омраза и поделба меѓу граѓаните. СДСМ, заедно со граѓаните нема да дозволи да се заборави 27 април, нема да дозволи никогаш да се повтори. Со глас за СДСМ и Коалицијата на 8 мај граѓаните гласаат за слобода, демократија и европски вредности“, се вели во соопштението на СДСМ.
Сервисни информации
Сончево со мала до умерена облачност, од пладневните часови со услови за локална нестабилност со краткотраен пороен дожд
Времето денеска, ќе биде сончево со мала до умерена облачност. Од пладневните часови ќе има услови за локална нестабилност со краткотраен пороен дожд и појава на грмежи. Ќе дува слаб ветер од јужен правец. Минималната температура ќе биде во интервал од 3 до 10, а максималната ќе достигне од 17 до 23 степени.
Во Скопје сончево со мала до умерена облачност и во делови од регионот со услови за краткотарен пороен дожд. Минималната температура ќе се спушти до 6, а максималната ќе достигне до 22 степен.
Од недела следува период на стабилно и топло време, а дневните температури ќе бидат повисоки за 3 до 5 степени.