Фудбалерот на Престон, Милутин Осмајиќ, е суспендиран на девет натпревари, бидејќи како што утврди ФА, на расна основа го навредил играчот од средниот ред на Барнли, Ханибал Межбри.

Инцидентот се случил за време на натпреварот без голови помеѓу Престон и Барнли во февруари, во Чемпионшип.

Осмајиќ ќе ја отслужи казната до 29 декември, кога неговиот Престон ќе гостува кај Рексам. Напаѓачот е казнет и со парична казна од 21.000 фунти.

Црногорецот ги негираше обвиненијата, по истрагата што беше започната во март, додека рочиштето беше одржано во септември.

ФА објави дека по рочиштето е докажано дека имало прекршување на правилата, бидејќи Осмајиќ користел „навредливи и/или погрдни зборови што се однесувале на бојата на кожата и/или расата“ на Межбри.

Престон објави дека е многу разочаран од пресудата и ја повтори својата осуда на сите форми на дискриминација.

Контроверзниот натпревар беше прекинат неколку минути во второто полувреме, кога Межбри реагираше бурно на нешто што му го кажал Осмајиќ. Потоа, тој имаше долг разговор со судијата Ендру Кичен.

Две недели подоцна, тимовите повторно се сретнаа во петтото коло од ФА Купот, каде што Осмајиќ го постигна вториот гол за Престон и гестикулираше кон навивачите на Барнли во знак на прослава.

Ханибал не беше во тимот на Барнли за тој натпревар по одлука на тренерот Скот Паркер, а играчите на актуелниот член на Премиер лигата одбија да се ракуваат со Осмајиќ пред почетокот на натпреварот во кој Престон победи со 3:0.

Ова е втора долга суспензија за Осмајиќ во претходниот период: во сезоната 2024/25 беше суспендиран на осум натпревари, откко го гризна на играчот на Блекбурн Роверс, Овен Бек, во септември 2024 година.

Тогаш ја призна вината по обвинението за насилно однесување, а беше казнет и со 15.000 фунти.

Осмајиќ е член на англискиот клуб од летото 2023 година.

Претседателот на Наполи, Аурелио де Лаурентис, даде интересна изјава зборувајќи за стадионот „Диего Армандо Марадона“, каде што игра актуелниот шампион на Италија.

Де Лаурентис го нарече стадионот „депонија“, тврдејќи дека на Неапол му е потребен нов и модерен стадион, но дека градските власти го блокираат тоа.

Тој ги спореди приходите од натпреварите на Наполи со оние на клубовите од Милано, велејќи дека Милан и Интер би можеле да заработат 14 милиони евра од Лигата на шампионите, додека приходите на неговиот тим се многу поограничени.

„Можеме да добиеме само до три милиони во таа депонија на Марадона. Тоа е голема разлика, нели?“ рече Де Лаурентис.

Италија работи напорно на реновирање на постојните или изградба на нови стадиони за Европското првенство во 2032 година, кое ќе биде ко-домаќин со Турција.

Наполи, кој двапати беше шампион на Италија во последните три сезони, има стара зграда, која е реновирана шест полни години, но сепак е непрофитабилна.

„Би сакал стадион со 70.000 седишта, 120 ВИП ложи и 8.000 паркинг места. Ни требаат 30 хектари за да изградиме прекрасен стадион“, заклучи Де Лаурентис.

Пеп Гвардиола се подготвува за својот 1000-ти натпревар во тренерската кариера, а судбината сакаше противник да биде Ливерпул, клубот на неговиот најголем ривал Јирген Клоп.

Во пресрет на неделното дерби, стратегот на Манчестер Сити призна колку му недостигаат дуелите со германскиот тренер, кој минатата година го напушти „Енфилд“ и тренерската работа.

Гвардиола со Клоп водеше некои од најжестоките битки за титулата, а тие дуели ги вбројува меѓу најважните моменти во неговата кариера.

„Ако требаше да изберам еден ривал за оваа лична пресвртница, која сакам да ја споделам со многу луѓе, би ги одбрал нив. Ливерпул, особено со Јирген, беа најголемите ривали во оваа земја и не можеше да биде подобро, искрено. Судбината така одлучи и убаво е да се живее со тоа“, рече Гвардиола и додаде:

„Што се однесува до тимот на Јирген или тимот на Пеп, мислам дека се почитувавме еден со друг. Чувствував дека Јирген ми даде многу и ми недостига. Ми даде многу во однос на тоа да го победам тој човек, колку треба да размислувам, да работам и да правам, за да бидам подобар.“