Европа
Зеленски оптимист пред преговорите: Бараме мир без одлагање

Претседателот на Украина, Володимир Зеленски, изјави дека одлуката да се одржи нова средба на преговарачките делегации на Русија и Украина во Истанбул не е лоша.
„Следува нова рунда преговори бидејќи бараме мир, навистина, без одлагање. Како што сум информиран, постои можност и потреба за средба лице в лице во Турција. Ова не е лошо. Да го видиме резултатот“, рече тој во видеообраќањето објавено од неговиот кабинет доцна во неделата.
Тој додаде дека се познати приоритетите на Украина во преговорите, кои, како што рече, несомнено се суверенитетот и територијалниот интегритет на Украина. Зеленски истакна дека ефективните безбедносни гаранции за Украина се задолжителни.
„Нашата цел е очигледна – мир и што побрзо враќање на нормалниот живот во нашата матична земја“, додаде Зеленски нагласувајќи дека санкциите против Русија, против агресија, се потребни сѐ додека руските војници останат на територијата на Украина.
Претседателот на Република Турција, Реџеп Таип Ердоган, во разговор со рускиот лидер Владимир Путин во неделата се договорил следната средба на преговарачките делегации на Русија и Украина да се одржи во Истанбул.
Дирекцијата за комуникации при кабинетот на турскиот претседател соопшти дека Ердоган и Путин телефонски разговарале за актуелната ситуација и за преговорите во врска со војната меѓу Русија и Украина.
Во соопштението се вели дека Ердоган ја истакнал потребата да се прогласи прекин на огнот, да се воспостави мир и да се подобри хуманитарната ситуација во регионот што е можно побргу.
Ердоган рече дека Турција ќе продолжи да ја дава целата потребна поддршка во тој процес.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Зеленски пристигнува на погребот на папата

Украинскиот претседател Володимир Зеленски ќе присуствува на погребот на папата Франциско, пренесе АФП повикувајќи се на извор од украинскиот претседателски кабинет.
Според истиот извор, канцеларијата на Зеленски ја подготвува неговата посета на Рим за Зеленски лично да се прости од поглаварот на Католичката црква.
Како што претходно беше најавено, погребот на папата Франциско ќе се изврши в сабота, 26 април, во 10 часот по локално време. Досега Трамп и Макрон потврдија дека ќе бидат на погребот, но се очекува да присуствуваат многубројни светски лидери и стотици илјади верници.
Европа
Украина: Русите го зголемуваат военото присуство во Мариупол

Руските сили продолжуваат да го зголемуваат своето воено присуство во привремено окупираниот град Мариупол. Како што соопшти денеска на „Телеграм“ градскиот совет на Мариупол, во градот веќе се формирани две воени бази.
„Руските окупатори го прошируваат своето воено присуство во Мариупол“, се вели во соопштението.
Според Центарот за проучување на окупацијата, во текот на март и април 2025 година се појавиле две нови воени бази: една во областа Калмиус на северозапад од градот и логистичка база во областа Ливобережњи, во станбената зона Шхидни. Втората база, како што се наведува, главно се користи за сместување персонал и воена опрема.
„На овој начин руските окупатори постепено го зголемуваат своето присуство во Мариупол. Центарот за проучување на окупацијата нагласува дека ова е план за трансформирање на градот во главна и полноправна логистичка и воена база не само за стоки туку и за опрема и персонал, со широка мрежа на паркинзи, бази за поправка и точки на трајно и привремено распоредување персонал. Ова е олеснето и со развојот на железничките и пристанишните врски што ги спроведуваат окупаторските власти“, се вели во соопштението на градскиот совет на Мариупол.
Европа
Знамиња со кукасти крстови се појавија во Стокхолм на роденденот на Хитлер, полицијата почна истрага

Три нацистички знамиња со кукасти крстови беа поставени на влезот на автопат во областа Есингеледен во Стокхолм, главниот град на Шведска, на 20 април, на роденденот на Адолф Хитлер.
Портпаролот на полицијата во Стокхолм, Матс Ериксон, изјави дека започнале истрага за злосторство од омраза.
Ериксон нагласи дека не е соодветно да се случуваат такви работи во Шведска. Тој посочи дека на влезовите на автопатите често се појавуваат транспаренти со политички пораки.
„Конкретно активистите споделуваат политички пораки бидејќи тука има густ сообраќај. Не е убаво да се споделуваат такви пораки“, рече Ериксон.
Тој додаде дека нацистичкото знаме најверојатно било поставено за да го одбележи роденденот на нацистичкиот диктатор Адолф Хитлер, кој е роден на 20 април.