Европа
Лавров: Путин никогаш не одбил средба со Зеленски
Рускиот министер за надворешни работи, Сергеј Лавров, денеска изјави дека рускиот претседател Владимир Путин никогаш не одбил средба со украинскиот претседател Владимир Зеленски, но дека средбата треба да биде добро подготвена.
Во разговор за четири српски медиуми, а на прашањето на „Танјуг“ дали е можна средба меѓу Путин и Зеленски, Лавров рече дека би било контрапродуктивно само да се сретнеме и да разговараме.
„Би било контрапродуктивно да се сретнеме и само да размениме мислења“, рече Лавров додавајќи дека тие ги прифатиле преговорите веднаш штом украинската страна го побарала тоа откако Русија почна специјална воена операција.
Тој потсети дека преговорите со украинската страна ќе продолжат утре во Истанбул.
„Ние сме заинтересирани да постигнеме резултат, пред сѐ, да го запреме убивањето на жителите на Донбас, кое трае веќе осум години, а за кое западната јавност молчеше и никогаш не критикуваше додека цивилна структура беше бомбардирана и илјадници цивили беа убиени“, рече Лавров.
Според него, Русија укажала на тоа, но Западот молчел и тие само повикале да се почитува договорот од Минск.
Но, забележува тој, кога Киев рече дека нема да го спроведе Минскиот договор, Западот рече дека Русија треба да го почитува и исполни.
„Тоа е исмејување на здравиот разум и човековите права. Сега преговараме и мораме да се погрижиме цивилите никогаш повеќе да не страдаат во Донбас од украинскиот режим. Мораме да ја натераме Украина воено да се одвои од Западот и НАТО бидејќи ова е закана за Руската Федерација“, рече тој.
Шпекулациите за лошата здравствена состојба на рускиот претседател Владимир Путин и наводното исчезнување на министерот за одбрана, Сергеј Шојгу, се глупости што ги шират украинските служби, тврди рускиот министер за надворешни работи, Сергеј Лавров.
„Тоа се глупости што ги шират специјалните служби на Украина, но и неолибералите од Русија, кои се во странство и на кои им се даваат документи со упатства што треба да кажат тој ден“, рече тој.
Тоа го изјави Лавров во разговор со српските новинари одговарајќи на прашање на „Новости“ и посочи дека сите се живи, здрави и работат.
„Тоа може да се види секој ден на телевизија и на социјалните мрежи. Целата влада и претседателот работат на зачувување на руските интереси“, посочи тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Уапсени две млади момчиња: планирале напад со нож на верници во синагога во Германија
Германските власти денеска соопштија дека уапсиле двајца мажи осомничени дека планирале напад со нож врз верници во синагога во Хајделберг, на југозападот на земјата.
Осомничените, на возраст од 24 и 18 години, беа приведени за време на одделни полициски операции во покраината Баден-Виртемберг на почетокот на овој месец, соопштија државните обвинители и полицијата, пренесе АП.
Тие разговарале за убиство на еден или повеќе верници во напад на синагогата, по што ќе следуваше нивна „маченичка смрт“, а сакаа полицијата да ги убие, се вели во заедничкото соопштение на германските власти.
Осомничените се соочуваат со обвиненија за заговор за убиство.
Полицијата го открила заговорот со претрес на домот на повозрасниот осомничен на 3 мај.
При претресот, полицаецот пукал и ранил еден од осомничените откако се фатил за нож.
Доказите запленети за време на претресот вклучуваат размена на онлајн пораки меѓу двајцата осомничени во април, во кои тие разговарале за можен напад на синагогата, соопштија властите.
На 18 мај полицијата го приведе помладиот осомничен и изврши претрес во неговиот стан.
Двајцата осомничени се германски државјани, а 18-годишникот има и турско државјанство, соопштија властите.
Нивните имиња не се објавени.
Германските лидери предупредија на ризиците од напади врз Евреите и го осудија порастот на антисемитизмот по избувнувањето на војната меѓу Израел и Хамас.
Европа
Филипинка се породила на крузер и го сокрила бебето: тоа починало
Истражен судија во Гросето, Италија го отфрли обвинението за убиство против Чан Џенсел Пиа Салахид, 28-годишна Филипинка која се породила на бродот за крстарење „Сребрен шепот“ на 17 мај, а потоа беше уапсена за смртта на детето.
Истражниот судија го потврдил приведувањето, а младата жена останала во затвор, но под обвинение за напуштање дете кое починало. Нејзините двајца колеги, кои ја делеле кабината со неа и кои исто така биле уапсени поради смртта на бебето, биле ослободени.
Тие и помогнале да се породи и биле соучесници во прикривањето.
Како што пишува „Rai News“, по добивањето на резултатите од обдукцијата, судот ги отфрли обвиненијата за убиство. Засега не се знае за што точно ќе биде обвинета жената освен за напуштање на детето.
А, таа цело време пред истражителите, според италијанските медиуми, тврдела дека не сакала да го убие својот син, кого го нарекла Тејлор.
Само се плашела дека ќе остане без работа, па го сокрила. Секогаш кога можела, доаѓала да го дои, според исказите. Бебето го оставала во плакарот со подотворена врата за никој да не го види или слушне неговиот плач.
Европа
Состојбата на Фицо е стабилна, забележително е благо подобрување, велат од болницата
Состојбата на словачкиот премиер Роберт Фицо по минатонеделниот атентат е стабилна со благо подобрување, соопштија денеска од болницата каде што е сместен Фицо.
„Состојбата на премиерот е стабилна со благо подобрување. Веруваме дека напредокот ќе продолжи“, соопшти болницата на платформата Х (Твитер), пренесе Ројтерс.
Фицо минатата среда беше застрелан од 71-годишниот писател Јурај Цинтула, кој веднаш беше приведен од полицијата.
Словачкиот премиер во тешка состојба беше пренесен во болницата каде му беше извршена операција.
Словачкиот суд во саботата одлучи Цинтула да биде задржан во притвор, а тој се соочува со казна од 25 години до доживотен затвор.