Црногорскиот премиер Милојко Спајиќ најави дека земјата ќе воведе нов закон за оружје во рок од два месеца, кој ќе вклучува најригорозни проверки за сите дозволи за поседување оружје. Овој чекор доаѓа по трагичниот настан во Цетиње на 1 јануари, кога 45-годишен напаѓач со психијатриски проблеми уби 12 лица.

На вонредната седница на Советот за национална безбедност, која беше свикана по трагедијата, беа разгледани мерки за справување со нелегално оружје и зајакнување на националната безбедност. Премиерот Спајиќ ја опиша седницата како една од најтешките, но истакна важноста на единството во вакви ситуации.

„Трагедијата во Цетиње беше страшна, но важно е да останеме обединети и да се бориме против ова зло. Сите учесници во сообраќајот на овој проблем мора да бидат подложени на најстрогите проверки“, изјави Спајиќ.

Премиерот најави дека лицата кои поседуваат оружје ќе мора да ги поминат најстрогите контроли во Европа за обновување на нивните лиценци. Ова правило ќе се применува и за ловечките друштва, додека приватните стрелачки клубови ќе бидат затворени.

„Во однос на нелегалното оружје, кампањата ‘Почитувај го животот – врати го оружјето’ продолжува. Секој што нема да го предаде оружјето во рок од два месеца ќе се соочи со најстроги казни“, предупреди премиерот.

Според новиот закон, поседувањето или носењето нелегално оружје ќе се казнува со највисоки санкции, а премиерот додаде дека нема да има милост за прекршителите.

Годинава пензионерите во Србија ќе добиваат пензии повисоки за 10,9 отсто, објавија српските медиуми.

Со одлука на Владата на Србија, просечната пензија ќе биде зголемена од 390 евра на 436 евра. Во локална валута, просечната пензија од 45.700 динари ќе порасне за околу 5.000 динари (2,628 денари).

Од денеска започнува исплатата на пензиите преку поштарите на домашна адреса, додека пензиите исплатени преку банките ќе пристигнат најдоцна до 6 јануари.

Хрватска минатата година ја посетиле 21,3 милиони туристи, кои оствариле 108,7 милиони ноќевања, што е за 4,1 отсто повеќе во однос на 2023 година, соопшти денеска Министерството за туризам и спорт.

Податоците на Хрватската даночна управа покажуваат дека во тој период фискални сметки во вредност од близу 7,3 милијарди евра или 11,5 отсто повеќе од 2023 година се издадени во дејности поврзани со туризмот, објави „Јутарњи лист“.

Министерството забележува дека во 2024 година најголем дел од вкупниот број ноќевања, односно 103,3 милиони, е остварен на Јадранот, што е исто така еден процент повеќе од 2023 година, додека континенталниот дел од земјата со повеќе од 2,7 милиони ноќевања е на плус пет отсто, а приближно исто толку ноќевања се бележат и во главниот град Загреб, што е за шест отсто повеќе од лани.