Македонија
Османи – Фико: Итното почнување преговори со Македонија нужно ќе го зацврсти кредибилитетот на ЕУ

Министерот за надворешни работи Бујар Османи имаше средба со претседателот на долниот дом на италијанскиот парламент, Роберто Фико.
На средбата беше изразено задоволство од традиционалните пријателски односи меѓу двете држави, културните врски и блиската соработка на разни нивоа на институционално партнерство.
Министерот Османи нагласи дека високо ја цени континуираната поддршка од официјален Рим за нашата земја, а особено улогата на италијанскиот парламент, чија Комисија за надворешна политика минатата година донесе две резолуции со силна поддршка за евроинтегративните перспективи на земјите од Западен Балкан.
„Ме радува цврстата решеност на Италија како гласен подржувач на нашиот евроинтегративен процес да се заложи за итен почеток на пристапните преговори на Северна Македонија со оглед на новите геополитички реалности во Европа“, истакна министерот Османи.
Спикерот Роберто Фико го повтори ставот на Италијанската Република дека итното почнување преговори со нашата држава нужно ќе го зацврсти кредибилитетот на Европската Унија, а притоа ќе се упати недвосмислена порака дека иднината на регионот е само европска.
Соговорниците разговараа за можностите од искористување на потенцијалот што го нуди парламентарната дипломатија, продлабочувањето на економските врски и мултилатералната соработка, а разменија мислења и за актуелната состојба во Украина.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Цените повторно растат, а Владата реши да ги покачи платите само на функционерите, велат од СДСМ

Македонија повторно се соочува со огромен раст на цените и инфлацијата, а Владата реши да ги покачи платите на функционерите. За работниците и граѓаните, повторно нема ништо. Според последните податоци од Државниот завод за статистика, годишната инфлација во мај 2025 изнесува 3,3%, што е скок во споредба со април, кога беше 2,6%. Дополнително, месечната инфлација од 1,5% е највисока оваа година, велат од СДСМ.
„Ова значи едно, животот е сѐ поскап, а власта нема ниту план, ниту капацитет да го заштити стандардот на граѓаните. Но, секако, има добар план да си ги покачува сопствените плати.
СДСМ повеќепати предупредуваше: цените растат и ќе продолжат да растат ако не се преземат мерките кои ги понудивме. Мицкоски се обидува да ги убеди граѓаните дека платите им растеле, но факт е дека единствено растат платите на неговите во Владата и институциите, додека народот едвај преживува“.
Оваа влада, додаваат од опозициската партија, нема економска визија, нема стратегија и нема емпатија. Оваа влада, според СДСМ, има само лични интереси и работи само за себе, и за никој друг.
СДСМ бара итна интервенција, конкретни мерки за заштита на стандардот, а не како што велат, лажни ветувања и манипулации.
„Граѓаните не може повеќе да бидат жртви на неспособноста и ароганцијата на оваа власт“.
Македонија
Без струја делови од неколку скопски општини

Од ЕВН Македонија АД известуваат дека поради технички зафати во електродистрибутивната мрежа денеска ( Вторник ) без електрична енергија ќе останат:
· во период од 09.00 до 10.00 часот, корисниците од ул. 20 во С.Бразда ( општина Чучер Сандево )
· во период од 09.00 до 12.00 часот,корисниците од ул 10 и дел од ул.134. ( општина Сопиште )
· од 09.00 до 14.00 часот, дел од корисниците на ул.Иван Цанкар. ( општина Карпош)
· од 11.30 до 15.30 часот, дел од корисниците на ул.101 во село Волково( општина Ѓорче Петров )
· и од 12.00 до 15.00 часот, корисниците околу ресторан Теферич и дел од ул.Мариовска( општина Кисела Вода )
Македонија
Сончево со мала до умерена облачност, попладне со услови за краткотраен дожд и грмежи

Времето денеска, сончево со мала до умерена облачност. Попладне ќе има услови за локален развој на нестабилна облачност со краткотраен пороен дожд и грмежи. Ќе дува слаб ветер од променлив правец. Минималната температура ќе биде во интервал од 10 до 18, а максималната ќе достигне од 26 до 34 степени.
Во Скопје, сончево со мала до умерена облачност. Ќе дува слаб ветер од северен правец. Минималната температура ќе се спушти до 15, а максималната ќе достигне до 32 степена.
Во среда во попладневните часови ќе има развој на нестабилна облачност со локален пороен дожд и грмежи. Потоа ќе преовладува претежно стабилно време, а дневните темпетаури ќе бидат без значителни промени.