Главниот обвинител Коцевски да си даде оставка, секој поминат ден на позиција му измеќарува на СДС. Одамна главниот обвинител Коцевски нема кредибилитет во очите на народот, а сега кога СДС јавно застана да го брани во Собрание, му го уништи и тој кредибилитет што некогаш го имал, истакна на денешната прес-конференција Бране Петрушевски, пратеник на ВМРО-ДПМНЕ.

СДС, вели тој, го разголи главниот обвинител Коцевски, совршено е јасно чии насоки до сега извршувал, и зошто постапките против функционери на СДС се таму каде што се.

„Главниот обвинител Коцевски очигледно е целосно препуштен во прегратките на СДС, и таквиот однос, не само што не му пречеше, туку и го зема како последна сламка за спас.

Да имаше главниот обвинител Коцевски грам морал, тој немаше да чека СДС да го брани и ќе си поднесеше сам оставка.

Игнорирањето на мизерните 2% доверба од народот и интерпелацијата во Собрание, е јасен показател дека главниот обвинител Коцевски има друг приоритети, а тоа е да служи како гума за спасување на дел од функционерите од СДС блиски до Филипче и Заев од кривична одговорност за криминалите кои ги правеле“.

Според Петрушевски, доблест од Коцевски не може да се очекува, само чисто калкулантство и политичко профитерство.

За да нема прекин на воспитно образовниот процес на учениците кои имаат посериозни здравствени предизвици и се на болничко лекување повеќе од три недели, Министерството за образование и наука во соработка со Министерството за здравство и Здружението „САНО“ кое им помага на децата заболени од канцер или други малигни и хронични болести, од септември воведува формално образование во здравствените установи. Зависно од здравствената состојба, ќе можат да се вклучат онлајн на наставата во својот клас, да се организира индивидуална настава или пак, преку асинхрона комуникација да добиваат материјали и да ги решаваат домашните задачи.

Ова денес беше соопштено од страна на министерката за образование и наука Весна Јаневска, која заедно со министерот за здравство Азир Алиу и претседателката на „САНО“, Марија Вук ја посетија Клиниката за детски болести.

„Децата со сериозни здравствени предизвици, најчесто се соочуваат и со дополнителни, образовни предизвици. За жал, на Детската клиника секогаш има дечиња кои се наоѓаат на подолготрајно лекување поради што не можат да ја следат редовната настава. Но, за ова постои решение и новата Влада со поддршка од граѓанскиот сектор, го дефинираше и го уреди системски и отсега повеќе нема да биде како во минатото кога всушност и постоеше една неправда, па би рекла и дискриминација кон децата со сериозни здравствени предизвици“, рече Јаневска.

Министерката посочи дека секое дете на школска возраст кое е сместено на Клиниката за детски болести повеќе од три недели, додека трае учебната година ќе може онлајн да се вклучи во наставата во неговиот клас или пак, наставникот ќе организира индивидуална настава во зависност од здравствената состојба на ученикот и тоа по наставна програма прилагодена на неговата состојба. За оваа цел се користат истите дигитални алатки кои ги користат и останатите ученици, ЕДУИНО и платформата за дигитални интерактивни учебници. Училиштето каде е запишан ученикот може да му додели електронски уред, од фондот на таблет компјутери кои МОН ги има обезбедено и доставено до училиштата.

Доколку училиштето има доволен кадровски потенцијал, наставникот може и да го посетува ученикот во здравствената установа и таму да ја реализира наставата, но тоа повторно зависи од состојбата и можностите на ученикот.

Јаневска информираше дека за време на распустот се организираат обуки за ефикасна работа на наставниците на далечина.

„Сакам да потенцирам дека ниедно дете не смее да биде лишено од образование само затоа што се лекува. Болеста не значи изолација, прекин или заборавеност. Напротив – болеста е предизвик, а ние, како општество, им должиме поддршка, структура и надеж. Со инвестирање во нивното знаење, инвестираме во една поправедна, поемпатична и посилна иднина“, додаде Јаневска.

Министерот за здравство Алиу рече дека покрај пружање на највисоко ниво на здравствена заштита од терциерен карактер на клиниката, оваа иницијатива претставува значаен чекор кон целосна инклузија на болните деца и нивно побрзо враќање во училишните клупи.

„За нас, најважна е целосната грижа за децата – не само нивното оздравување, туку и нивниот образовен и психосоцијален развој“, рече Алиу.

За директорот на Клиниката за детски болести, Реџеп Мемеди вклучувањето на децата од болница во формалното образование значи половина здравје, односно полесно поминување на долготрајниот пат на лекување.

Марија Вук, претседателка на „САНО“ изрази благодарност што по повеќегодишна заложба за формално образование во здравствените установи, актуелното раководство на МОН ја прифати иницијативата, додавајќи дека граѓанското здружение започнува јавна кампања за подигнување на свеста за образованието на децата на подолготрајно лекување.

Хелсиншкиот комитет за човекови права изразува сериозна загриженост и го осудува националистичкото и политизирано скандирање за време на фудбалскиот натпревар меѓу ФК Шкендија и Карабах, кој се одигра вчера во Националната арена „Тодор Проески“ во Скопје.

„И покрај апелите од јавноста и институциите за фер и спортско навивање, од трибините се слушнаа повици за „Голема Албанија“, „Чамерија“ и „Илирида“ пораки кои се далеку од манифестирање на спортски дух и придонесуваат за поттикнување меѓуетнички поделби, ја нарушуваат меѓуетничката кохезија, а имаат потенцијал да предизвика и злосторства од омраза“, велат од Хелсиншкиот комитет.

Дополнително, велат од таму, загрижувачки е фактот што ваквите извици не доаѓале само од навивачката група „Балисти“, туку биле извикувани од дел од публиката и тоа во присуство на високи државни функционери.

Како што велат од Хелсиншки, на натпреварот присуствувале, претседателот на Собранието, Африм Гаши, вицепремиерот Изет Меџити министерот за економија, Валон Дурмиши, како и партиските лидери Али Ахмети и Арбен Таравари.

„И повторно ниту еден од овие високи функционери, за време на натпреварот не реагирал по повод навредувачките скандирања“, се наведува во соопштението.

Според Хелсиншкиот комитет, особено е дискутабилна изјавата на претседателот на Собранието, кој од една страна вели дека не ги слушнал повиците додека бил присутен на натпреварот, а од друга страна јавно им честитал на навивачите нарекувајќи ги „достоинствен пример за националните вредности“.

„Овие контрадикторни ставови испраќаат опасна порака за толеранција на говорот на омраза и политичко навивање на спортски терени. Осудата на говорот на омраза од страна на политичарите е еден од клучните фактори против ширењето на оваа појава бидејќи говорот на омраза произведува уште повеќе говор на омраза, а има потенцијал да предизвика и злосторства од омраза“, се наведува во соопштението.

Хелсиншкиот комитет апелира до Министерството за внатрешни работи и надлежните институции итно да постапат во согласност со најавените мерки за санкционирање на ваквите испади. Според нив, селективната примена на законите, во зависност од етничката или политичката припадност на сторителите е неприфатлива и дополнително ја нарушува довербата на граѓаните во институциите.

„Спортските натпревари мора да бидат место на взаемно почитување, фер игра и градење на соживот. За говорот на омраза и националистичките пораки нема место ниту на трибините, ниту во јавниот дискурс“, велат од Хелсиншкиот комитет.