Џихадистичките бунтовници од Исламската држава продолжија во четвртокот со жестоките напади врз Кобани, третиот по големина курдски град во Сирија, со стратешка важност на самата граница со Турција, и покрај воздушните напади на коалицијата предводена од САД, додека илјадници курдски бегалци и натаму се префрлаат на турска територија, со што Анкара се вовлекува во подлабок судир.
 

Џихадистичките бунтовници од Исламската држава продолжија во четвртокот со жестоките напади врз Кобани, третиот по големина курдски град во Сирија, со стратешка важност на самата граница со Турција, и покрај воздушните напади на коалицијата предводена од САД, додека илјадници курдски бегалци и натаму се префрлаат на турска територија, со што Анкара се вовлекува во подлабок судир.

Курдските борци од Работничката партија на Курдистан (РКК) која е прогласена за терористичка и забранета во Турција, се закани дека ќе ги прекине мировните преговори започнати минатата година со Анкара за окончување на четиридецениските судири во кои загинаа над 40 илјади луѓе, доколку на сунитските џихадисти од Исламската држава им се дозволи да извршат масакр во доминантно курдскиот град Кобани (Ајин ал-Араб, на арапски јазик). Тие се наоѓаат на само три километра од градот од три негови страни.

Борците на Исламската држава од пред десетина дена ја преземаа контролата над стотина села во околината на Кобани и околните возвишувања, од каде започнаа и со минофрлачки напади врз градот. Претходно седмицава бомбаш самоубиец во возило преправено како транспорт на хуманитарна помош успеа да се пробие во градот и да го активира експлозивот при што загинаа десетици луѓе. Од теренот пристигнуваат информации дека џихадистите ја користат стратегијата на заплашување со масовни свирепи егзекутирања и отсекување на глави за да го натераат населението на послушност или во бегство.

Коалициските сили предводени од САД, коишто ги бомбардираат позициите на Исламската држава во Ирак повеќе од две седмици а од минатата започнаа и со напади на територијата на Сирија, погодија ноќта кон четвртокот село јужно од Кобани а до утрото продолжиле со воздушните напади, соопштија курдски извори од градот. Меѓутоа, и нападите, напредувањето на џихадистите не е запрено.

Опозициската Сириска опсерваторија за човекови права (SOHR) чиешто седиште е во Лондон, а се повикува на извештаите од нејзините активист на теренот во Сирија, соопшти дека продолжиле жестоките судири меѓу Исламската држава и курдските борци на источните и во јужните рабови на Кобани во последните 36 часа. Според Опсерваторијата, околу полноќ кон четвртокот се слушнала силна експлозија во област ана браната Тишрин и градо Манбија, околу 50 километри јужно од Кобани.

Идриз, Насан, заменик министер за надворешни работи во локалната автономна курдска администрација, изјавил дека воздушните удари засега на ги запираат нападите на Исламската држава. „Не можам да ви кажам дека воздушните удари се ефикасни. Меѓутоа, сигурен сум дека долгорочно ќе бидат ефикасни“, изјави за Reuters.

Турскиот парламент подоцна во четврток ќе гласа за предлогот на владата кој ќе овозможи, всушност ќе го обнови мандатот, турските вооружени сили да преземаат прекугранични воени напади на териториите на Сирија и на Ирак, наводно во борбата против Исламската држава, иако Анкара и во средата повтори дека нејзина основна цел е соборување до власт на алавитот (шиитот) сирискиот претседател Башар ал-Асад. Со овој предлог, исто така, им се дозволува на коалициските сили да ја користат турската територија и воздушен простор.

Сепак, Турција стравува дека воздушните удари, доколку не бидат проследени со поширока политичка стратегија, би можеле да ги засилат позициите на Башар-ал-Асад, и на сириските Курди кои се поврзани со Курдите во Турција кои три децении се борат за автономија.

„Доколку обидот за масакр (на Курдите) ја постигне својата цел, тоа ќе стави крај на процесот (за примирје со Турција)“, изјави челникот на Работничката партија на Курдистан, (РКК), Абдула Очалан, во изјават којашто ја објави делегација на прокурдската парија која го посети во затворот на остров близу Истанбул каде што издржува доживотна казна со која под притисок на меѓународната јавност му беше заменета смртната./крај/мф/сн

Извор: AFP/Reuters