Европа
Во два дена пронајдени мртви двајца руски олигарси и нивните сопруги и ќерки
Двајца руски олигарси се пронајдени мртви во два дена, заедно со нивните сопруги и ќерки.
Владислав Авајев, поранешен потпретседател на „Гаспромбанк“, бил пронајден мртов со прострелна рана во неговиот стан во Москва во понеделникот, јави руската државна новинска агенција ТАСС.
Одделот за истраги во Москва не ги наведе имињата на жртвите во својата јавна објава за случајот, но ТАСС пренесува дека неименуван извор го потврдил нивниот идентитет, пишува „Бизнис инсајдер“.
Истражителите во своето соопштение посочиле дека ја застапуваат теоријата оти Авајев ги убил сопругата и ќерката, а потоа и себеси.
На повеќе од 3.000 километри подалеку, во Шпанија, друг олигарх, Сергеј Протосења, бил пронајден обесен, а неговата сопруга и ќерка избодени до смрт, објави шпанскиот ТВ канал „Телесинко“. Неговото тело е пронајдено во вторникот, пишува шпанското списание El Punta Vui.
До телото на Протосења имало крвав нож и секира, јави „Телесинко“.
Тој бил поранешен потпретседател и главен финансиер на „Новотек“, голема компанија за гас која, според „Бизнис инсајдер“, имала блиски деловни врски со „Гаспромбанк“.
Протосења со сопругата и ќерката престојувал во изнајмена луксузна вила во Лорет де Мар, каталонски крајбрежен град во близина на Барселона, за време на велигденските празници, наведува „Телесинко“.
Полицијата ја алармирал неговиот син, кој од Франција неуспешно се обидел да стапи во контакт со семејството.
Каталонската полиција во вторникот потврди дека истражува три смртни случаи, без да објави имиња. И тука постои теоријата дека Протосења си го убил семејството пред да си го одземе животот.
Тој не оставил порака, а на неговото тело немало траги од крв, објави El Punta Vui, без да се повикува на извори. Неговото богатство се проценува на околу 4,3 милиони долари, според „Телесинко“.
За овие двјаца руски олигарси не биле воведени санкции од западните земји.
*Фотографијата е од вилата во која, според шпанските медиуми, е пронајден мртов рускиот олигарх
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Украина: Русите го нападнаа Харков, уништени се згради, меѓу повредените има и дете
Украина ги уништи сите 10 беспилотни летала во руски напад во текот на ноќта, но две лица се повредени, а станбени згради во регионот Харков беа зафатени од пожар, соопштија денеска украинските власти.
Воздухопловните сили на „Телеграм“ соопштија дека Русија лансирала и две противвоздушни наведувани ракети. Портпаролот на украинските воздухопловни сили во телевизиски пренос изјави дека руските ракети, најверојатно, биле насочени кон североисточниот град Харков.
Гувернерот на регионот Харков, Олех Синехубов, рече дека три станбени куќи биле запалени, а десетици биле оштетени како резултат на рускиот напад, чија цел, според него, биле и инфраструктурата и станбените области. На фотографиите што ги објави Синехубов на „Телеграм“ се гледаат големи пламени јазици од станбените згради.
„Две лица, меѓу кои и едно 11-годишно дете, се ранети во нападот и се на медицинска помош“, рече Синехубов на апликацијата „Телеграм“.
„Ројтерс“ сè уште не ја потврди независно оваа вест. Москва негира дека цели на цивили во овие „легитимни напади врз воената, енергетската и транспортната инфраструктура на Украина“.
Европа
Повредени двајца полицајци во Париз кога маж им го украл пиштолот и пукал во нив
Двајца полицајци се повредени во престрелка во полициската станица во Париз, кога на еден од нив му бил одземен пиштолот од маж кој претходно бил приведен поради напад со нож врз жена.
„Полицијата интервенираше и го донесе овде, во полициската станица, и тој потоа му го грабна пиштолот на полицаецот“, изјави началникот на полицијата Лорен Нунес.
Обвинителството соопшти дека еден од полицајците е во тешка состојба, пренесува „Монд“.
Полицијата возвратила, а напаѓачот се здобил со повреди во пределот на градниот кош, по што бил пренесен во болница.
Како што информираат од болницата, животот на напаѓачот не е во опасност.
Европа
Путин го избра премиерот
Рускиот претседател Владимир Путин предложи повторно именување на Михаил Мишустин за премиер во неговиот нов претседателски мандат, изјави утрово претседателот на Државната дума, долниот дом на рускиот парламент.
Откако Путин во вторникот положи заклетва за нов шестгодишен претседателски мандат, тамошната влада, според одредбите на рускиот Устав, поднесе оставка.
И додека во последните денови се шпекулираше дека може да има промени на некои важни и суштински позиции, а руските независни медиуми споменуваа евентуално заминување на Михаил Мишустин од премиерската позиција, Путин повторно го предложи за таа функција.
„Претседателот Владимир Владимирович Путин достави до Државната дума предлог за кандидатурата на Михаил Владимирович Мишустин за функцијата премиер. Денеска претставниците ќе донесат одговорна одлука за ова прашање во име на нивните гласачи“, изјави претседателот на Думата, Вјачеслав Володин на апликацијата Телеграм.
Ова е петти мандат на Путин на власт, а тој го номинираше Мишустин за премиер за прв пат во јануари 2020 година, кога Владата предводена од Дмитриј Медведев поднесе оставка по најавените важни уставни промени во политичкиот систем на земјата од страна на претседателот.
Мишустин, кој ќе зборува во Думата пред гласањето, мора да одговори како ќе реши низа задачи што Путин и ги постави на владата, вклучително и „зголемување на одбранбената способност на нашата земја“, рече Володин.