Регион
ДПС со поддршка на малцинската влада, Ѓукановиќ : Поголемиот дел од условите се исполнети
Главниот одбор на Демократската партија на социјалистите (ДПС) ѝ даде поддршка на малцинската влада на Црна Гора, пишуваат медиумите во Црна Гора.
„На вечерашната седница на Главниот одбор, ДПС одлучи да ја поддржи малцинската влада, бидејќи се исполнети повеќето услови што ги побаравме за нејзино формирање“, рече лидерот на ДПС, Мило Ѓукановиќ на прес-конференција по седницата, пренесуваат тамошните гласила.
Тој додаде дека во наредните денови ќе ја информира јавноста за нивните одлуки.
„Друга одлука, која се однесува на претходниот период од две години, е дека ДПС се потврди како патриотска и политичка вертикала на Црна Гора“, кажал тој.
Лидерот на ДПС рекол дека партијата покажала демократски капацитет на 30 август и ги признала изборните резултати.
„Тоа е показател за виталноста на ДПС. Каде се тие што лицитираа дека ќе паднеме на 15% поддршка и ќе доживееме партиска поделба. Рејтингот на ДПС е стабилен. Што стана со плановите за анексија на Црна Гора преку проектот на српскиот свет? Вложиле големи суми пари, но не можеле. ДПС беше премногу тврд орев. Застанавме на нивниот пат кон Цетиње и Никшиќ“, изјави Ѓукановиќ.
Тој додал дека го исполниле ветувањето и ја урнале владата во парламентот.
„Третата порака е дека ова е првиот чекор кон обнова на државно-политичката релевантност. ДПС покажа сила и решителност да се избори надвор од нешто понеповолниот опозициски статус. Ќе продолжиме со овој тренд. ДПС е најтрајната основа на црногорската одбрана на вредностите. Нема дилема дека по следните избори ДПС ќе го заземе местото што и припаѓа“, изјавил Ѓукановиќ, пренесуваат медиумите во регионот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Земјотрес со јачина од 4,7 степени во Хрватска, почувствуван и во БиХ
Земјотрес со јачина од 4,7 степени според Рихтеровата скала утрово во 05:38 часот е регистриран во Хрватска, објави Европскиот медитерански сеизмолошки центар (ЕМСЦ).
Според информациите од Европскиот медитерански сеизмолошки центар, земјотресот бил на 92 километри јужно од главниот град Загреб и на 14 километри од границата со Босна и Херцеговина, кај Тржачка Раштела.
Земјотресот бил на длабочина од 10 километри.
Земјотресот најмногу бил почувствуван во централна Хрватска и во дел од Босна и Херцеговина со интензитет од V-VI степени според Европската макросеизмичка скала.
Засега нема извештаи за повредени лица или за предизвикана материјална штета.
Регион
На таткото на момчето убиец од Србија му е продолжен притворот за уште 60 дена, има сомнение дека може да го повтори делото
Вишиот суд во Белград му го продолжи притворот за уште 60 дена на Владимир Кечмановиќ, таткото на момчето кое на 3 мај уби девет негови врсници и чувар во ОУ „Владислав Рибникар“.
На Владимир Кецмановиќ му е продолжен притворот поради сомнение дека доколку биде пуштен на слобода за краток временски период ќе го повтори кривичното дело, како и поради тоа што постои основано сомнение дека сторил кривично дело за кое е пропишана затворска казна над десет години, а начинот на извршување и сериозноста на последиците од кривичното дело доведоа до вознемиреност кај јавноста што може да го загрози непреченото и правично водење на кривичната постапка, соопштија од тој суд.
Во обвинението за тешко кривично дело против општата безбедност се товари Владимир К., а за сторено кривично дело недозволено изработување, држење, носење и тргување со оружје и распрскувачки материи, мајката на момчето Миљана К.
Регион
„Мислев дека регалот ќе падне врз мене“ – жена од Србија сведочи за силниот земјотрес
Земјотресот беше многу силен. Кратко, но силно, вели вознемирената Мила Петровиќ од Кладово – место кое утрово го погоди силен земјотрес.
Како што опишува преплашената жена, земјотресот ја исплашил и неа, но и останатите жители на Кладово.
„Мислев дека регалот ќе падне врз мене. Немаше време за бегство никаде. Сè се тресеше многу. За среќа, тоа беше кратко. Кога се смири, сите излегоа на улица“, раскажува таа за Телеграф.рс.
Земјотресот бил со јачина од 4,3 степени според Рихтеровата скала, на длабочина од 11 километри.
Колку бил силен, сведочи и фактот што бил почувствуван во Заечар, Неготин, Доњи Милановац, Бор и други градови на истокот на Србија, а некои граѓани го почувствувале и во Ниш.
„Почувствував земјотрес, се тресеше мебелот во куќата“, „Бев во кревет кога почна тресењето“, напишаа граѓаните.