Македонија
Спасовски: Исклучителни резултати во сообраќајната безбедност, борбата со трговијата со дрога и опремувањето на полицијата
Ова раководство на МВР во изминатите 100 дена работеше на континуирана реализација на приоритетот за создавање модерна, опремена, стручна, ефикасна, но и задоволна полиција, која на законит, стручен, транспарентен и одговорен начин ќе ја гарантира целосната лична и имотна сигурност на граѓаните, ќе продолжи одлучно и неселективно да се справува со организираниот криминал и корупцијата и успешно да работи на превенција од сите облици на тероризам и други противуставни дејства“, рече министерот за внатрешни работи, Оливер Спасовски, по повод сработеното во првите 100 дена од работењето на оваа Влада.
Спасовски потенцира дека оваа Влада и раководството на МВР се исклучително свесни дека за етаблирање на полицијата како гарант за заштита на законитоста во интерес на сите наши граѓани, континуирано мора да се вложува во нова генерација на комплетно опремени и задоволни полициски службеници.
„Трендот на квалитативно подобрување на условите за работа останува приоритет на ова раководство на МВР и за тековната 2022 година бидејќи секое вложување во полицијата значи задоволни полициски службеници, што за возврат претставува унапредување на севкупната безбедност на граѓаните. Така, во овие 100 дена се набавија нови 8.000 виндјакни за припадниците на полицијата, а кон крајот на првиот квартал беа испорачани вкупно 16.000 летни и зимски панталони и здолништа за припадниците на полицијата, со вредност од 31.008.559 денари, со вклучен ДДВ, во согласност со планот за јавни набавки на униформи за 2021 година“, истакна министерот Спасовски.
Тој дополни дека испорачаните униформи во текот на изминатите 100 дена вклучуваат по 6.452 машки зимски и летни панталони, по 758 женски зимски и летни панталони и по 790 зимски и летни здолништа, како и 10.000 кожени ремени за полицијата.
Во контекст на постојано унапредување на материјално-техничките услови за работа на полицијата, министерот истакна дека во овие 100 дена склучен е договор за набавка на соларни панели за 15 локации во државата во износ од 30 милиони денари, со вклучен ДДВ, како и промовирањето на трите реконструирани објекти – ОВР Прилеп, ЕВР Карпош, зградата на Шестата управа и ОВР Радовиш, како продолжение на низата од вкупно 73 досега реновирани објекти од страна на актуелното раководство на МВР.
„Во периодот од 100-те дена во областа на недозволената трговија со дрога се постигнати забележителни резултати, при што реализирани се повеќе случаи на заплена на наркотична дрога, сузбиени се осум организирани криминални групи составени од 33 лица (28 македонски државјани, четири косовски и еден албански државјанин), со кои се спречени четири меѓународни транспорти на марихуана, еден меѓународен транспорт на прекурсори, спречени се улични дилерства на кокаин во Тетово и на кокаин и марихуана на подрачјето на Кавадарци и Неготино, а откриена е и група што инсталирала нелегална лабораторија за производство на синтетички дроги во Р. Бугарија“, издвои дел од резултатите министерот Спасовски во борбата со недозволената трговија со дрога.
Спасовски додаде дека со цел сузбивање улично дилерство на наркотични и синтетички дроги и недозволена трговија со огнено оружје, врз основа на изготвен план, кон крајот на март извршени се претреси на вкупно 40 локации, на кои беа пронајдени и одземени поголема количина марихуана (околу три килограми), хероин, амфетамин и др., а беше пронајдена и импровизирана лабораторија за производство на канабис на подрачјето на ОВР Гевгелија, при што во текот на акцијата беа приведени над 20 лица.
Во делот на сообраќајната безбедност, ако 2021 година заврши како година со најмал број на жртви во сообраќајот во последните 15 години – 116, при што најголемо намалување на сообраќајните незгоди според местото на случување е забележано на подрачјето на СВР Скопје како подрачје со голема фреквенција на возила и учесници во сообраќот, податоците од првото тримесечје во 2022 година, односно од првите 100 дена на оваа Влада, покажуваат дека и оваа година продолжува трендот на намалување на бројот на жртви во сообраќајните несреќи.
„Во првите три месеци од 2022 година има 18 жртви, што е 10 помалку во споредба со истиот период лани, кога имало 28. Само во март 2022 година имаме четири жртви, а во март 2021 имало 16 – значи бројката е дури четирипати помала во март 2022. Резултат на зајакнатите контроли се регистрираните 54 илјади прекршоци во овие 100 дена, во најголем дел за брзо возење – 22 илјади прекршоци“, потсети министерот Спасовски.
Тој порача дека актуелното раководство на МВР продолжува со имплементација на стратешки поставените приоритети за опремена и мотивирана полиција во служба на граѓаните, безбедни сообраќајници за помалку жртви во сообраќајот, сузбивање на криминалот со дрога за безбедни генерации и законски реформи за поголема ефикасност на полицијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ДИК за одзивот до 15 часот: за претседателски избори гласале 33.73 отсто а за парламентарни 37.44 отсто од гласачите
До 15 часот како што информра ДИК биле пристигнати податоци за излезеност на гласачите за Претседателските избори од 2271 избирачки места.
Од вкупно запишани 1.172.912 гласачи на овие избирачки места, гласале 395.576 односно 33.73 %. Најголема излезеност во моментов, за Претседателските избори има во Новаци, со 52.32 %. Најмалата излезеност за претседателските избори е во Липково, со 3.60 %.
„Споредбено со вториот куг од Претседателските избори во 2019 година имаме зголемување на излезеноста од 3.39% на овие избори. Додека споредбено со првиот круг од Претседателските избори 2024 имаме намалување од 0.84%.
До 15 часот пристигнати се податоци за излезеност на гласачите за Парламентарните избори од 2136 избирачки места. Од вкупно запишани 1.113.441 гласачи на овие избирачки места, гласале 416.915 односно 37.44%.
Најголема излезеност во моментов, за парламентарните избори има во Крива Паланка, со 58.18 %. Најмалата излезеност за парламентарните избори е во Центар Жупа, со 13.74 %“, информира комисијата.
Споредбено со Парламентарните избори во 2020 година, на овие избори има зголемување на излезеноста од 5.66 % .
Излезеноста по изборни единици за парламентарните избори е следна: Изборна единица 1- 42.31 %; Изборна единица 2-36.69 %; Изборна единица 3- 41.02 %; Изборна единица 4-36.88 %; Изборна единица 5- 35.95 % ; Изборна Единица 6-29.14 % .
До овој момент до ДИК биле доставени вкупно 405 приговори за заштита на личното избирачко право.
„Од нив 176 приговори се усвоени и на избирачите им е овозможено да го остварат своето право на глас, 18 приговори се отфрлени како неуредни, а 58 приговори се одбиени. Останатите приговори се во обработка. Овој изборен ден го набљудуваат 1303 домашни набљудувачи, 860 меѓународни набљудувачи и 83 странски новинари. Активен е и бесплатниот телефонски број 0800 555 44, на кој заинтересираните граѓани можат да постават прашање или да пријават неправилности до Државната изборна комисија. Исто така активна е и видео кол линијата на број 076 488 360 преку која граѓаните со оштетен слух и говор ќе можат во текот на изборниот ден преку видео повик да постават прашање до Државната изборна комисија и да добијат одговор на знаковен јазик“, појаснуваaт од ДИК.
Македонија
Гласачите задолжително да се прашуваат дали ќе гласаат за претседателски или за парламентарни избори, Избирачките одбори да ги почитуваат законските одредби, апелира ДИК
Избирачките одбори да ги почитуваат законските одредби и задолжително да ги прашуваат гласачите дали ќе гласаат за претседателски или за парламентарни избори и тоа да го прават кон секој избирач, потенцираа од Државната изборна комисија.
Според комисијата на секој гласач тие треба да му ја објаснат процедурата на гласање.
Гласачот, како што прецизираа од ДИК, може да се појави на гласачкото место само еднаш и да го оствари своето право на глас.
„Не сакаме да ги исплашиме претседателите на изборните органи, но, доколку не се почитува правото на глас врз основа на Кривичниот законик, секој член на изборен орган кој го попречува гласањето или намерно го попречува гласањето на некој друг член ќе се казни со најмалку три години затвор“, рече Дитмире Шеху, потпретседателка на ДИК појаснувајќи дека од терен добиле информации дека дел од избирачките одбори не постапувале согласно нивните надлежности кои произлегуваат од Изборниот законик и подзаконските акти на Комисијата.
Потсети дека комисијата на вчерашна седница на јасен начин покажала кој е начинот на гласање и го презентирала упатството за начинот на гласање и за Парламентарни и за Претседателски избори.
„Од самото упатство, кое исто така, се наоѓа и во самите избирачки места се гледа начинот на кој гласачот треба да гласа, а исто така во тоа упатство е наведено и како гласачот и избирачкиот одбор треба да се однесува“, дополни Шеху.
Откако гласачот ќе се изјасни дали ќе гласа за едни или други избори, или пак и за Претседателските и за Парламентарните избори, тој оди на идентификација со биометрискиот уред, па го зема гласачкото ливче и се потпишува во избирачкиот список. Потоа го зема гласачкото ливче и нормално гласа сам зад параван, појасни.
„Затоа ги замолуваме сите избирачки одбори детално да ги почитуваат законот и сите наши подзаконски акти и да постапуваат врз основа на сите наши напатствија и наши подзаконски акти и согласно закконот“, рече таа.
Ова, како што рече, се однесува на неколку општини, неколку избирачки одбори, кај кои било реагирано.
Македонија
ДИК: До 13 часот за претседател гласале 302.158, на парламентарните 312.070 граѓани
До 13 часот пристигнати се податоци за одѕивот на гласачите за претседателските избори од 2.472 избирачки места. Од вкупно запишани 1.261.526 гласачи на овие избирачки места, гласале 302.158, односно 23,95 %.
Најголем одѕив во моментот за претседателските избори има во Крива Паланка – 46,44 %. Најмал одѕив за претседателските избори има во Липково – 3,28 %.
Во споредба со вториот куг од претседателските избори во 2019 година имаме зголемување на одѕивот од 3,49 % на овие избори, А во споредба со првиот круг од претседателските избори во 2024 имаме намалување од 0,7 %.
До 13 часот пристигнати се податоци за одѕивот на гласачите за парламентарните избори од 2.348 избирачки места. Од вкупно запишани 1.207.922 гласачи на овие избирачки места, гласале 312.070, односно 25,84 %.
Најголем одѕив во моментот за парламентарните избори има во Кривогаштани – 48,65 %. Најмал одѕив за парламентарните избори има во Маврово и Ростуше – 11,91 %.
Во споредба со парламентарните избори во 2020 година имаме зголемување на одѕивот од 2,03 % на овие избори.
Одѕивот по изборни единици за парламентарните избори е следен:
Изборна единица 1 – 31,18 %
Изборна единица 2 – 23,91 %
Изборна единица 3 – 29,18 %
Изборна единица 4 – 26,40 %
Изборна единица 5 – 25,04 %
Изборна единица 6 – 16,71 %
До овој момент до ДИК се доставени вкупно 313 приговори за заштита на личното избирачко право. Од нив, 105 приговори се усвоени и на избирачите им е овозможено да го остварат своето право на глас, 9 приговори се отфрлени како неуредни, а 40 приговори се одбиени. Другите приговори се во обработка.
Овој изборен ден го набљудуваат 1.303 домашни набљудувачи, 860 меѓународни набљудувачи и 83 странски новинари.
Активен е и бесплатниот телефонски број 0800 555 44, на кој заинтересираните граѓани може да постават прашање или да пријават неправилности до Државната изборна комисија.
Исто така, активна е и видеолинијата на бројот 076 488 360, преку која граѓаните со оштетен слух и говор ќе може во текот на изборниот ден преку видеоповик да постават прашање до Државната изборна комисија и да добијат одговор на знаковен јазик.