Европа
Макрон и Фон дер Лаен се заложија за промени во ЕУ, ќе се разгледува и укинување на правото на вето
Францускиот претседател, Емануел Макрон и претседателката на ЕК, Урсула фон дер Лаен, на завршната церемонија во Стразбур по повод завршувањето на Конференцијата за иднината на Европа, повикаа да се измени Договорот за ЕУ за да се одговори на барањата на граѓаните како што е укинувањето на правото на вето на земјите-членки во надворешната политика, пренесува хрватски „Индекс“.
Некои од предлозите на Конференцијата за иднината на Европа, како што е укинувањето на ветото во надворешната и безбедносната политика, бараат измена на Договорот за ЕУ, поради што Европскиот парламент повика на конвенција на која ќе се расправа за овие прашања.
Францускиот претседател Макрон рече дека Европската унија мора да биде ефикасна и суверена за да одговори на глобалните предизвици, што е тешко да се постигне во сегашниот контекст.
„Соочени со ова, ние треба да ги реформираме договорите, тоа е јасно“, рече тој, додавајќи дека еден начин да се направи тоа е да се свика конвенција за промена на договорот.
„Ова е предлог на Европскиот парламент и јас го одобрувам“, рече францускиот претседател, додавајќи дека ова прашање ќе го постави на Европскиот совет во наредните недели и дека на конвенцијата треба да се расправа и за реформа на изборите за Европскиот парламент, давање законодавна иницијатива на Европскиот парламент итн.
„Тоа значи поедноставување на работите и повеќе користење на гласањето со квалификувано мнозинство за главните јавни политики“, објасни Макрон.
АФП наведува дека Франција, Италија, Шпанија, Белгија, Холандија и Луксембург изразиле поддршка за промена на договорот.
Потребно е мнозинство за да се започне дебата по ова прашање во Советот, а сите земји-членки мора да дадат согласност за промена на Договорот.
Претседателката на Европската комисија, Урсула фон дер Лаен, рече дека се покажало оти Унијата може многу да направи со постоечките овластувања, па веднаш може да одговори на некои од препораките на Конференцијата за иднината на Европа.
„Меѓутоа, треба да одиме понатаму. На пример, јас секогаш тврдев дека едногласните одлуки во некои клучни области едноставно веќе немаат смисла ако сакаме да постигнеме побрз напредок и дека Европа треба да игра поголема улога во здравството или одбраната по искуствата во изминатите две години“, рече таа.
Фон дер Лаен додаде дека во септември ќе ги претстави првите предлози како одговор на препораките на Конференцијата за иднината на Европа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Русија почна со вежби со тактичко нуклеарно оружје
Руските сили ја почнаа првата фаза од вежбите кои вклучуваат „практична обука за подготовка и употреба на нестратешко нуклеарно оружје“, соопшти денеска руското Министерство за одбрана.
Претседателот Владимир Путин ги нареди вежбите претходно овој месец. Москва ги поврза со, како што ги нарече, „милитантните изјави“ на западните официјални лица за кои рече дека претставуваат безбедносна закана за Русија.
Предупредување на Путин до Западот
Руското Министерство за надворешни работи ги цитираше коментарите на францускиот претседател Емануел Макрон, кој ја покрена можноста за испраќање европски сили да се борат против Русија во Украина, и британскиот министер за надворешни работи Дејвид Камерон, кој рече дека Украина има право да користи оружје обезбедено од Лондон за напад на цели во Русија.
Безбедносните аналитичари велат дека вежбата е предупредување на Путин до Западот повеќе да не се вклучува во војната во Украина, на која и испорачува оружје и разузнавачки информации, но се воздржа од испраќање војници.
Министерството за одбрана соопшти дека во првата фаза од вежбата се вклучени ракетите Искандер и Кинжал.
Вежбите се одржуваат во Јужниот воен округ на Русија долж украинската граница и делови од Украина под контрола на Русија.
Белорусија, каде Русија распореди тактичко нуклеарно оружје минатата година, исто така ќе биде вклучена во вежбите, соопштија двете земји.
Тактичкото или нестратешкото нуклеарно оружје е помалку моќно од стратешкото оружје дизајнирано да избрише цели непријателски градови, но сепак има огромен деструктивен потенцијал.
Европа
(Видео) Тежок скандал во романскиот парламент: пратеникот обвини поранешен сопартиец дека го удрил со колено во носот
Сериозен скандал денеска се случи во романскиот парламент – пратеникот на ПНЛ, Флорин Роман изјави дека добил „удар со колено во носот“ пред пленарната сала на Собранието, од поранешен сопартиец, сега независен пратеник Дан Вилчеану, инаку поранешен министер за финансии, пренесува Либертатеа.
„Го прекорив независниот пратеник Дан Вилчеану за прекршување на правилата поради неговото присуство во клупите на групата ПНЛ. Неговиот проблем во парламентот беше да дознае колку градоначалници отишле во Калараши. Следеше вербална расправија, по што физички насилно бев исфрлен од пленумот“, напиша Флорин Роман на Фејсбук.
„Надвор од пленумската сала повторно бев физички нападнат, насилнички, со колено во носот“, тврди Роман, прецизирајќи дека тој не возвратил, туку дека ќе поднесе „кривична пријава против пратеникот хулиган“.
Претседателот на ПНЛ и на парламентот, Николае Чиука, рече дека „физичкото насилство е неприфатливо, особено кога тоа се случува овде, во зградата на парламентот“ и побара од раководството на Претставничкиот дом да преземе мерки против либералниот Дан Вилчеану.
Европа
ЕУ одлучи да ги искористи замрзнатите руски средства за вооружување на Украина
Советот на Европската унија денеска усвои низа правни акти за да се осигура дека нето добивката од неочекуваните пари и вонредните приходи од замрзнатите руски средства се користат за воена поддршка за Украина, како и за зајакнување на капацитетот на нејзината одбранбена индустрија и реконструкција.
Тоа значи дека финансиските институции кои чуваат руски замрзнати средства на своите сметки во износ од повеќе од еден милион евра ќе дадат финансиски придонес од нивната нето добивка акумулирана од 15 февруари годинава.
На 12 февруари 2024 година, Советот на ЕУ одлучи дека финансиските институции кои поседуваат повеќе од еден милион евра во средства и резерви на Руската централна банка, која е имобилизирана со низа рестриктивни мерки од страна на ЕУ, мора да ги издвојат вонредните средства што се акумулираат поради овие мерки и дека не можат да располагаат со нето добивката што произлегува од тоа.
Одлуката денеска и формално ја потврди Советот откако на почетокот на месецов беше постигнат договорот на амбасадорско ниво.
Според таа одлука, 90 отсто од овие средства ќе одат во фондот на ЕУ за воена помош за Украина, а останатите 10 отсто за нејзината одбранбена индустрија и одбрана.
Според проценките на ЕУ, замрзнатите руски средства би можеле да донесат меѓу 15 и 20 милијарди евра до 2027 година.