Македонија
Одложено рочиштето на кое се бара Бојан Јовановски да го врати милионот

Судењето на кое се бара Бојан Јовановски-Боки 13, Катица Јанева и државата да му вратат дел од 1,5 милион евра на бизнисменот Орце Камчев се одложи. Бидејќи беше предвидено да се сослушаат како сведоци сметководителката во фирмите на Камчеви, Мирјана Бошковска, сопругата на бизнисменот, Ана Камчева, мајката Ратка Куновска-Камчева и сестрата Кристина Камчева-Стојческа. Ниту еден од нив не се појави на судењето. Судијата Андреј Димовски рече дека поштарот не ги нашол на адресите. Тужениот Бојан Јовановски беше спроведен во судот од затворот „Идризово“, но по завршување на рочиштето.
„Не се присутни сведоците за кои судот донесе решение да бидат сослушани – Мијана Бошковска, Ана Камчева, Ратка Куновска-Камчева и Кристина Камчева-Стојческа. Овие адреси се разликуваат од првите адреси. Кај Мирјана Бошковска доставувачот образложил дека немало никој дома. За Ана Камчева, обезбедувањето рекло дека е иселена од комплексот „Св. Јован“. Поканата не ѝ е доставена ниту на Ратка Куновска-Камчева за која доставувачот рече дека не била дома и била на работа. Кристина исто така не била дома“, рече судијата Андреј Димовски.
Адвокатот Александар Михајловски рече дека кога дознал дека Граѓанскиот суд имал проблем со доставување на поканите, дал нови адреси. Дополнително, побара задолжително да се земат списи од предметот „Рекет“, кои се во Апелациониот и во Врховниот суд. Меѓу другото, и записниците од сослушување на сведоците во претходните постапки.
„Мене не ми дадоа да направам увид во кривичниот предмет за да видам што докази има таму. Затоа побарав само дел од материјалите. Мене ми се врзани рацете. Единствен начин да направам увид е преку овој суд. И на распитот имаше прашања што не можеа да се постават. Тука ми беше оневозможен начинот на постапување на прашањата. Ако направевме увид, ќе можевме да прашаме и за аудиоснимките објавени во јавност, каде што се слушаат Боки 13 и Катица. Јас немам што да направам“, образложи адвокатот барајќи ги списите.
Врховниот суд досега нема постапено по ургенциите и по барањето, посочи судијата Димовски.
На рочиштето беше спроведен и Бојан Јовановски-Боки 13, кој во судот пристигна кога заврши рочиштето. Тој остана пред судот бидејќи не стигна на време да биде спроведен во судницата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) ВМРО-ДПМНЕ ги објави имињата на уште осум кандидати за градоначалници

Извршниот комитет на ВМРО-ДПМНЕ, вечерва во Штип определи уште осум кандидати за градоначалници за претстојните локални избори.
ВМРО-ДПМНЕ донесе одлука да му предложи на Централниот комитет.
1. Македонски Брод – Жарко Ристески.
2. Могила – Драганчо Саботковски
3. Пробиштип – Тони Тоневски
4.Богданци – Марјан Пеев
5. Демир Капија – Наталија Димитриева
6. Росоман – Ѓорги Крстевски
7. Новаци – Стевче Стевановски
8. Дебарца – Златко Силјановски
Пратеникот Антонијо Милошоски по состанокот изјави дека овие 8 кандидати за градоначалници се одговорни, исполнителни личности кои што својата активност ја докажале не само во рамките на коалицијата на ВМРО-ДПМНЕ туку имаат углед и во самите општини. Ним ќе им биде препорачано во следниот период, да си отворат што поголема комуникација со локалните граѓани во општините за да може да поработат директно на терен за составување на програмата која што е потребна за локални избори.
Централниот штаб ќе биде на располагање заедно со еден тим кој што ќе биде формиран за локалните избори, да им помогне за одредени проекти, кој што се од поголемо капитално значење за Македонски брод, Могила, Новаци, Пробиштип, Богданци, Демир Капија, Росоман и Дебарца.
„Цениме дека со овие 8 вечерва објавени кандидати за градоначалници и претходните 25, ВМРО-ДПМНЕ со самодоверба чекори кон локалните избори бидејќи сме единствената партија која што во моментов има обзнането имиња на 33 кандидати за градоначалници за кои што сметаме дека се на добар пат и да ја добијат довербата на граѓаните“, рече Милошоски.
За оние кои што се актуелни градоначалници, партијата смета дека дека со досегашната работа, ќе имаат добар кредит да ја добијат и понатамошната доверба.
Македонија
СДСМ: Јавното обвинителство се обиде да ја релативизира одговорноста на актуелните функционери

Според СДСМ, со денешната прес-конференција, Јавното обвинителство уште еднаш потврдило дека постои сериозен обид да се минимизира и релативизира одговорноста на носителите на актуелни функции и институции поврзани со трагедијата во Кочани.
Од опозициската партија велат дека наместо да се лоцира институционалната одговорност и да се повикаат на одговорност директорите на Државниот пазарен инспекторат, УЈП и други релевантни органи кои имаа обврска да постапуваат, фокусот се префрла на индивидуални случаи и на маргинални групи, избегнувајќи ја суштината – зошто и како фирма увезувала и со месеци продавала опасна пиротехника без дозвола, и кој тоа го дозволил.
Дополнително, како што се додава, наместо да се отворат посебни истраги за секој аспект од случајот – за незаконскиот увоз, за институционалниот надзор, за реакцијата на полицијата и за конкретните пропусти на диското, Обвинителството сѐ спакува во еден предмет, со што ризикува да се развлекува постапката со години, па дури и децении. Со ваков пристап, правдата станува недостижна – а тоа е неприфатливо.
„Сериозно прашање е и одлуката приведените полицајци и полициски функционери, кои биле одговорни кобната вечер, да се пуштат на слобода со мерки за претпазливост. Особено загрижува фактот дека двајца од нив биле пресретнати на пат кон граница со Бугарија, што отвора сомнеж за можно бегство и криење на вината.
СДСМ уште еднаш потенцира – без целосна и непристрасна истрага, без одговорност за институциите и носителите на функции кои затаиле, нема да има вистинска правда за жртвите и нивните семејства.
Граѓаните гледаат. И со право очекуваат правда“, се додава во партиското соопштение.
Македонија
(Видео) Во Гази Баба се гради огромна дива депонија без никакви дозволи, објави Арсовска

Во општина Гази Баба, фирма затекната од инспекторат на град Скопје при вршење нелегални активности, правење огромна дива депонија со градежен и опасен отпад и бесправна експлоатација на земјиште, без лиценци, елаборати, дозволи и одобренија, што претставува сериозна опасност по здравјето на граѓаните и животната средина, објави градоначалничката на Град Скопје, Данела Арсовска.
„Апелираме до Министерството за внатрешни работи да постапи, бидејќи неказнивоста и непостапувањето предизвикува сторителите на вакви дела да мислат дека се недопирливи пред законот. Фирмата која прави дива депонија и каде се експлоатира, го има поткопано 110kV кабловски и воздушен далновод кој го напојува со електрична енергија градот Скопје. На ова земјиште сопственост на Република Македонија се прави сериозна штета на главниот далновод, известени се сите надлежни институции за кои очекуваме да не се кријат и да постапуваат“, вели Арсовска.