Вчера, околу полноќ, полициски службеници го приведоа Н.А. (44) од Велес, кој е осомничен дека на улицата Христо Татарчев турнал 38-годишна жена и ѝ ја одзел ташната со пари.

Парите и ташната веднаш беа пронајдени и враќени на сопственичката. Н.А. е приведен во полициска станица, а за случајот е известен јавен обвинител, соопшти МВР.

Откако ќе се заврши целосната истрага, против него ќе биде поднесена соодветна пријава.

Вчера во 15.30 и во 22.55 часот полициски службеници од СВР Тетово и ПО Камењане во с.Горно Седларце и во Тетово ги лишиле од слобода А.Е.(18) и малолетник, двајцата од Тетово, постапувајќи по пријава од 37-годишна жена од Тетово.

Имено според полицијата, тие во неколку наврати извршиле обљуба врз двете малолетни ќерки, а притоа и снимале со мобилен телефон и едната малолетничка ја принудувале на сексуален однос со други лица.

Полицијата соопшти дека е известен јавен обвинител и по документирање на случајот ќе бидат поднесени соодветни пријави.

Вчера во 14 часот во Радовиш, полициски службеници од СВР Струмица- ОВР Радовиш го лишиле од слобода 45-годишниот Р.И. од Радовиш.

Тој околу 13 часот на место викано „Градска река“, атар на Радовиш, користел апарат за заварување и со искрите предизвикал пожар на сува трева, кој брзо се проширил и зафатил нискостеблеста шума.

По интервенција на Територијалната противпожарна единица Радовиш пожарот бил изгаснат. Запознаен е јавен обвинител од Основното јавно обвинителство Радовиш, а по документирање на случајот против Р.И. ќе биде поднесен соодветен поднесок.