Регион
На последниот собир на приврзаниците на Ердоган се очекуваат милиони Турци
Милиони Турци се очекува во неделата да излезат на улиците на Истанбул со што ќе го одбележат завршувањето на тринеделната мобилизација за демократијата, на повикот на претседателот Реџеп Тајип Ердоган по неуспешниот обид за воен преврат од ноќта од 15-ти кон 16-ти јули.
„Собир за демократијата и мачениците“ е владина иницијатива на којашто ќе ѝ се приклучат и главните опозициски парти,а официјално е претставена како „предавање на дипломата на школата за демократија“.
Во мегалополисот Истанбул, главната турска метропола и политичкиот бастион на претседателот Реџеп Тајип Ердоган, собирот е закажан за 17 часот по локално време, и на него се очекува да се соберат многу голем број луѓе,а ќе биде пренесуван преку големи екрани во 80 турски покраини.
На пространиот плоштад Јеникапи, на брегот од Мраморното Море, се очекуваат стотици илјади луѓе, можеби и 3,5 милиони пренесува во неделата електронското издание на дневниот весник Hurriyet.
Подготвени се 1,5 милиони капчиња, 2,5 милиони турски знамиња и 5 милиони шишиња со вода за митингот на Јеникапи, а тим од 300 лица од саботата ги подготвува просторот на кој треба да се одржи собирот, пишува весникот.
Безбедносните мерки се многу заострени во Истанбул, имајќи предвид дека градот беше честа цел на смртоносни напади изминатите месеци. Поставени се 22 рентген апарати, 165 капии со детектори за метал во областа на плоштадот, додека 13.000 луѓе, вклучително и полициски службеници, ќе бидат вклучени во обезбедувањето на собирот.
Претседателот Ердоган, премиерот Бинали Јилдирим и опозициските челници ќе присуствуваат на собирот.
Главната опозициска партија Републиканската народна партија (CHP) беше иницијатор на сличниот собир за поддршка на демократијата во земјата на 24-ти јули на плоштадот Таксим во Истанбул, на кој се приклучи и владејачката Партија на правото и развојот (AKP), кога беше објавена декларацијата за демократијата, правата и владеењето. На повикот на Ердоган и Јилдирим во неделата се одѕва и опозициската Партијата на националистичкото движење (MHP), по телефонскиот разговор меѓу партискиот челник Девлет Бахчели и шефот на државата.
Прокурдската Народна демократска партија (HDP) во северниот истанбулски кварт, исто така, на 24-ти јули организираше масовен собир против неуспешниот обид за воен удар во Турција под мотото „Не за пучистите“, но таа е исклучена од повикот, бидејќи според владата ја поддржува забранетата герилска Работничка партија на Курдистан (PKK).
Ердоган претходно им се заблагодари на тројцата партиски челници за заедничкиот став против воениот удар и почитувањето на активностите на Фетулахистичката терористичката организација (FETO), како што турските власти ги означуваат следбениците на исламистичкиот проповедник Фетулах Ѓулен за кого тврдат дека стои зад неуспешниот пуч, и кон кои се спроведува масовна чистка од државните институции.
Во обидот за државен удар загинале 273 цивили, несметајќи ги стотината жртви на страната на пучистите, а во речиси дванаесетте часа колку што траеше обидот за преврат беа ранети околу две илјади лица. Потоа следуваа масовни чистки во армијата, правосудството, образованието, медиумите и локалните власти, за коишто претседателот Ердоган рече дека „само што започнале“, навестувајќи подлабоки промени.
По пучот приврзаниците на Ердоган секоја вечер мобилизираат на плоштадот Таксим во Истанбул и на Казилај во Анкара десетици илјади Турција кои носат турски знамиња и го скандираат неговото име.
„Собирот на Јеникапи ќе го зајакне нашето единство. Задоволен сум што таму ќе дојдат и политичките челници“, реле Ердоган во саботата во телевизиското обраќање.
„Голем екран ќе биде поставен и на едно друго место. Знаете ли каде? Во Пенсилванија. Пораката ќе стаса и таму“, рече претходно во петокот Ердоган, алудирајќи на американската сојузна држава во којашто од 1999 година во доброволен егзил живее Ѓулен чиешто предавање го бара Анкара.
Ѓулен негира дека има вмешаност во споменатите настани и истакнува дека е против воено менување на власта, додека Вашингтон од турската страна бара, како што вели, уверливи докази против него за да одговори на барањето за негова екстрадиција./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
На таткото на момчето убиец од Србија му е продолжен притворот за уште 60 дена, има сомнение дека може да го повтори делото
Вишиот суд во Белград му го продолжи притворот за уште 60 дена на Владимир Кечмановиќ, таткото на момчето кое на 3 мај уби девет негови врсници и чувар во ОУ „Владислав Рибникар“.
На Владимир Кецмановиќ му е продолжен притворот поради сомнение дека доколку биде пуштен на слобода за краток временски период ќе го повтори кривичното дело, како и поради тоа што постои основано сомнение дека сторил кривично дело за кое е пропишана затворска казна над десет години, а начинот на извршување и сериозноста на последиците од кривичното дело доведоа до вознемиреност кај јавноста што може да го загрози непреченото и правично водење на кривичната постапка, соопштија од тој суд.
Во обвинението за тешко кривично дело против општата безбедност се товари Владимир К., а за сторено кривично дело недозволено изработување, држење, носење и тргување со оружје и распрскувачки материи, мајката на момчето Миљана К.
Регион
„Мислев дека регалот ќе падне врз мене“ – жена од Србија сведочи за силниот земјотрес
Земјотресот беше многу силен. Кратко, но силно, вели вознемирената Мила Петровиќ од Кладово – место кое утрово го погоди силен земјотрес.
Како што опишува преплашената жена, земјотресот ја исплашил и неа, но и останатите жители на Кладово.
„Мислев дека регалот ќе падне врз мене. Немаше време за бегство никаде. Сè се тресеше многу. За среќа, тоа беше кратко. Кога се смири, сите излегоа на улица“, раскажува таа за Телеграф.рс.
Земјотресот бил со јачина од 4,3 степени според Рихтеровата скала, на длабочина од 11 километри.
Колку бил силен, сведочи и фактот што бил почувствуван во Заечар, Неготин, Доњи Милановац, Бор и други градови на истокот на Србија, а некои граѓани го почувствувале и во Ниш.
„Почувствував земјотрес, се тресеше мебелот во куќата“, „Бев во кревет кога почна тресењето“, напишаа граѓаните.
Регион
Земјотрес од 4,3 степени утрово во Србија
Утрово земјотрес со јачина од 4,3 степени според Рихтеровата скала е регистриран во регионот на Кладово, соопшти Републичкиот сеизмолошки завод.
Земјотресите со ваков интензитет можат да предизвикаат помали оштетувања на зградите во епицентралното подрачје, јавуваат српските медиуми.
Засега нема извештаи за евентуална штета.