Косовскиот министер за внатрешни работи и поранешен премиер, Хашим Тачи, тврди дека изјавата на албанскиот премиер Еди Рама за неизбежното обединување на Албанија и Косово е погрешно протолкувана, како и дека Рама всушност говорел за бришење на границите откако двете земји ќе станат членки на Европската унија, која претходно во средата ги осуди изјавите на двајцата албански челници.

„Лично бев со албанскиот премиер Еди Рама кога го даваше тоа интервју (за телевизијата Клан Косова во Приштина – з.м.) и можам да кажам дека неговата изјава е погрешно интерпретирана“, изјави шефот на косовската дипломатија Хашим Тачи на заедничката прес-конференција во Загреб по средбата со неговата хрватска колешка Весна Пусиќ.

Тачи изјави дека Рама е „реформаторски“ настроен политичар, кој има јасна перспектива за патот на неговата земја, како и дека силно го поддржал дијалогот за нормализација на односите Косово и Србија. Истакна и дека Албанија и Косово ја споделуваат истата визија за регионот ја југоисточна Европа кој ќе биде „отворен, со отворени граници и меѓусебно слободно движење според европскиот модел“.

„Во ниеден случај не зборуваме за промена на границите, туку за намалувањето на видливоста на тие граници, каде што луѓето ќе може слободно да се движат, согласно европскиот модел, бидејќи, на крајот, сите ќе бидеме дел од европското семејство“, изјави.

На прашање на новинар за „планот Б“ на Рама, односно за класичното спојување на Косово со Албанија, пренесува агенцијата Hina, Тачи одговори дека тој не е портпарол на албанскиот премиер и повтори дека Косово целосно го поддржува официјалниот став на Албанија во кој не се поттикнувало на менување на границите, туку се сакало да се отвори можност со надминување на секоја поделба да се оствари напредок во сите сфери. „Доколку зборуваме за конкретното интервју, можам да кажам дека никој не зборуваше за ткн ‘национално обединување’, ниту за промени на границите“, рече Тачи.

Неговата домаќинка, Пусиќ, пак, рече дека не може да се каже што точно мислел албанскиот премиер, но дека интерпретацијата на Тачи „се чини позитивна“.

„Во Европа нема промени на границите. Границите не се менуваат, но со членството во ЕУ тие, секако, се либерализираат и им се намалува важноста“, рече шефицата на хрватската дипломатија. Истакна, меѓутоа, и дека на тој начин „подеднакво се намалува важноста на границата меѓу Косово и Албанија, како и границата меѓу Косово и Србија или Косово и Македонија или која и да е друга земја“./крај/мф/сн

Извор: Макфакс