Спорт
Левандовски се премислува, ништо од трансферот во Барселона
Роберт Левандовски се премислува и по се изгледа нема да го реализира трансферот во Барселона. Германските и шпанските медиуми пишуваат дека, по изјавата на првиот човек на Ла Лига, Хавиер Тебас, тој наеднаш се „оладил“ од очекуваниот трансфер.
„Барселона многу добро знае какви се правилата на Ла Лига и каква е нивната финансиска состојба и што треба да направат за да доведат нови играчи. Не знам дали ќе го продадат Де Јонг или Педри, но знаат што треба да направат. Треба да ги зголемат приходите. Клубот последните години акумулираше загуби кои можеше да ги избегне доколку ги скалираше парите, како што тоа го праваше Реал. Наместо да го прави тоа Барселона ја празнеше касата. Затоа сега не може да го регистрира Левандовски“, изјави Тебас минатата недела.
На оваа изјава реагираше претседателот на Барселона, Џоан Лапорта.
„Тебас треба да се воздржи од вакви коментари дали Барселона може или не може да донесе играч бидејќи тоа му штети на интересите на нашиот клуб. Тој го прави токму тоа, им штети на интересите на Барселона“.
Сепак, факт е дека Барселона се уште не може да ги регистрира Франк Кеси и Андреас Кристенсен, играчи кои дојдоа во клубот без обештетување.
За да го направи тоа мора да продаде дел од играчите од актуелниот ростер.
„Мундо Депортиво“ пишува дека по оваа објава на претседателот на Ла Лига, Левандовски му се јавил на менаџерот, Пини Захави. Побарал детално да се информира за она што го зборувал првиот човек на Ла Лига. Овој медиум додава дека Левандовски наеднаш се оладил од Барса откако го прочитал објаснувањето на Тебас.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Ландо Норис го победи Ферстапен на ГН на Мајами
Ландо Норис ја забележа првата победа во кариерата. Возачот на Мекларен победи на трката за Големата награда на Мајами. Ова е прва победа за Мекларен од 2021 година кога Даниел Рикардо победи во Монца. Норис во Мајами победи пред Макс Ферстапен (Ред Бул) и Шарл Леклер (Ферари).
Норис, трката во Мајами ја стартуваше од петтата позиција, која ја загуби на стартот, но како што одминуваа круговите тој беше најбрзиот човек на патеката. Најбрзиот круг го возеше во 25 круг, кога дел од неговите конкуренти ги сменија гумите.
За одличното возење го „погледна и среќата“. Поради инцидентот меѓу Магнусен и Сарџент, во 28.круг на патеката излезе возилото за безбедност. Норис го искорсти влезе во боксот и се врати на челната позиција.
Откако возилото за безбедност ја напушти патеката, Норис на чиста брзина ја доби борбата со Ферстапен.
Британецот со деби победата ја прекина доминацијата на Ферстапен во Мајами, кој имаше шест последовни победи на оваа патека.
Бодови во Мајами освоија: Карлос Саинц (Ферари), Серхио Перез (Ред Бул), Луис Хамилтон (Мерцедес), Јуки Цунода (РБ), Џорџ Расел (Мерцедес), Фернандо Алонсо (Астон Мартин) и Естебан Окон (Алпин).
Спорт
Реми во дербито меѓу Рома и Јувентус
Рома и Јувентус освоија по еден бод, откако во дербито на 35.коло одиграа 1:1, на „Олимпико“ во Рим.
Рома никако не може да биде здоволна со бодот бидејќи си го компромитира пласманот во Лигата на шампионите. Италија наредната сезона ќе има пет екипи во Лигата на шампионите, а Рома на петтото место има три бода и два натпревари повеќе од Аталанта.
Натпреварот почна добро за Рома, Лукаку се најде на вистинското место во вистинско време и му донесе водство на својот тим во 15. минута.
Јувентус после тоа не сакаше да тактизира, избраниците на Масимилијано Алегри тргнаа во напад, а во 31.минута ја искористија грешката во одбраната на Рома. Резултатот го изедначи Бремер.
До крајот на мечот Јуве беа поблуску до победата. Киеза ја погоди стативата во 47.минута, а потоа голманот Свилар имаше две добри интервенции.
Спорт
Рубљов го освои Мастерсот во Мадрид
Рускиот тенисер Андреј Рубљов победи на Мастерсот во Мадрид.
Рубљов во финалето го совлада Канаѓанецот Феликс Оѓер-Алиасим по три сета, со пресврт 4:6, 7:5, 7:5 по два часа и 49 минути игра.
Рускиот тенисер во главниот град на Шпанија ја освои втората титула од серијата 1000, а воедно осмиот тенисер во светот стана првиот во кариерата кој победил на Мастерсот во Мадрид и во сингл и во двојки.
Русинот лани во Монте Карло го освои првиот трофеј на турнирите од серијата 1000, а за 27-годишниот Русин ова е 16. титула во кариерата, втора во 2024 година.