Советот на амбасадорите, по повод францускиот предлог за деблокирање на пристапниот пат на Северна Македонија кон ЕУ, смета дека членството во ЕУ нема алтернативи и е не само од стратешко значење за нашата држава туку е и безбедносно прашање за целиот регион.

Советот, како што велат од таму, ги поздравува напорите на претседателот Макрон и на канцеларот Шолц, како и на другите лидери и дипломати на ЕУ и САД, кои активно ја подржуваат интеграцијата на Северна Македонија во ЕУ.

Во отсуство на јавна објава на интегралниот текст на францускиот предлог, кој ја бранува македонската јавност и создава многубројни негативни реакции, кои ги јакнат евроскептицизмот и национализмот во државата, Советот на амбасадорите смета дека треба најнапред да се добие целиот текст, внимателно да се анализира, а потоа да се заземат соодветни позиции, кои ќе ги одразуваат долгорочните национални интереси на државата и нејзините граѓани.

Советот на амбасадорите смета дека преговарачката рамка претставува мултилатерален документ, чија намена е да послужи како водилка за темелно реформирање и пристапување на државата кандидат кон Европската Унија.

Изразуваат надеж дека земјите членки на ЕУ ќе усвојат рамка, која ќе го отсликува мултилатералниот карактер на документот, а Бугарија ќе биде на ниво на пријателска држава, во чиј национален интерес е соседната држава Северна Македонија да стане полноправна членка на ЕУ.

Советот смета дека утврдувањето на преговарачката рамка и управувањето со механизамите за нејзино спроведување треба да биде реализирано од Брисел, а не од Софија. На тој начин, како што оценуваат, ќе се намали можноста за зачестени блокади на пристапниот процес, од што најмногу стравуваат граѓаните на нашата држава.

Советот се надева и очекува ЕУ да има доволно чувство за реална процена на политичката состојба во Северна Македонија и да не го условува почетокот на преговорите со донесувањето на уставните промени, туку таквиот процес да биде поместен кога тоа ќе го дозволат политичките и општествените услови.

„Советот на амбасадорите уште еднаш истакнува дека сегашниот консензуален начин на донесување одлуки ги блокира процесите на одлучување во Унијата и неодамнешната констатација на канцеларот Олаф Шолц дека ‘ЕУ треба да ги модернизира структурите и процесите за носење одлуки’ го смета за вистински исчекор кон нејзино реформирање“, е потенцирано во нивната реакција.

Апелираат до Владата да го сочува достоинството на граѓаните и да ги почитува и да опстои на црвените линии за зачувување на идентитетот и интегритетот на Република Северна Македонија.