Култура
Вечерва почнува Културно лето 2022 во општина Кисела Вода
Денеска, 29 јуни, па сè до 2 јули, почнува богатата и забавна програма на Културно лето 2022, кое ќе се одржи во склоп на неколкудневното одбележување на роденденот на општината, „67 години моја Кисела Вода“. На самата четиридневна манифестација ќе настапат голем број македонски музички ѕвезди, кои ќе бидат задолжени сите посетители да си поминат незаборавно, a влезот за сите настани е бесплатен.
Со почеток од 18 часот, во паркот „Шопен’, со хуманитарна коријада, официјално ќе почне годинешното Културно лето 2022. Традицонално, голем број пензионери од оваа општина со подготовка на домашни печива собираат средства, наменети за хуманитарни цели, а за време на целиот настан ќе се пеат познати македонски народни песни, кои ќе ја збогатат роденденската атмосфера. За време на хуманитарната коријада, во организација на Црвниот крст Кисела Вода, ќе има и лекарски тим, кој бесплатно ќе мери притисок и ќе мери шеќер во крвта, информираат од Општината.
Вечерва, со почеток во 20.10 часот, забавата продолжува во паркот „Македонија“, лоциран непосредно до Домот на културата „Билјана Беличанец“ (старото кино), каде што ќе почне првиот музички настап во склоп на Културното лето 2022 – концерт на чалгиска музика со Филип Шурбевски и „Езгија квартет“. Кулминацијата на македонскатата фолк-музика ќе се долови со еден од најголемите синоними на македонската народна музика – Ефто Пупиноски. Првата вечер ќе заврши со познатите хитови на македонската поп-ѕвезда Влатко Лозаноски – Лозано.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
„Браќа Манаки“: „Состојба на умот“ од кинематограферот Душан Кардалевски и во режија на Александра Кардалевска денеска во киното „Манаки“
„Состојба на умот“, штотуку го започна своето фестивалско патување, досега имаше повеќе од 15 селекции и две награди за најдобра кинематографија за Душан Кардалевски на фестивали во Романија и Бразил.
Краткометражниот филм „Состојба на умот“ („Frame of Mind”), ќе биде прикажан денеска во 17 часот во киното „Манаки“, како дел официјалната краткометражна програма во компетиција за наградата „Златна камера 300“.
„Состојба на умот“, штотуку го започна своето фестивалско патување, досега имаше повеќе од 15 селекции и две награди за најдобра кинематографија за Душан Кардалевски на фестивали во Романија и Бразил.
„Чест е да се има ова дело на токму ваков фестивал што ги вреднува кинематографските квалитети што веќе беа воочени во други земји. Филмот зборува за едноставна, но универзална приказна, за љубовта, загубата..“, велат авторите.
На денешната краткометражна програма ќе бидат прикажани и „Вистинската вистина за борбата“ на Алана Мехиа Гонзалес, „Овца“ на Адиб Собхани. „Оддалечување“ Петер Колањи и „Добро момче“ на Кинан Масарани.
По проекциите публиката ќе има можност за дискусија (Q&A).
Култура
Почина оперската првенка Ирена Кавкалевска
Почина оперската првенка Ирена Кавкалевска, мецосопран (1973 – 2024), објави НУ Национална опера и Балет.
Ирена Кавкалевска, мецосопран, добитничка на многу награди, се школувала во Македониіа, Софиjа, Грац, Загреб.
Кавкалевска дебитира на сцената на МОБ во 1996 година со улогата на Мадалена во „Риголето“. Настапувала на многу фестивали и оперски сцени, а незиниот репертоар зборува за успешни креации во „Кармен“, „Аида“, „Набуко“, „Моќта на судбината“, „Сестра Анџелика“, „Лули Цезар во Египет“, „Севилскиот берберин“, „Лилјакот“, „Иван Сусањин“, „Цар Самуил“.
„Уште со својата прва појава Ирена Кавкалевска беше вистинско олицетворение на Кармен, бескрупулозната заводничка. Таа апсолутно пленеше со сценичноста, владееше со целото дејство, очигледно се чувствуваше удобно во улогата што ја толкува. Комотна и самоуверена на сцената, мошне маркантно ja долови фаталната женска привлечност“, зборува музичката критика за креацијата на нашата уметница во познатата опера на Жорж Бизе.
„Нејзината појава беше особено ретка како на сцената така и во приватниот живот. Зрачејќи со својата елеганција, нежност и благородност, остави голема трага во срцата на публиката и колегите. Истовремено, беше и силен борец во сите животни премрежиња.
Прераната смрт на почитуваната и драга Ирена Кавкалевска за Македонската опера и Балет и воопшто за севкупниот културен живот претставува огромна загуба. Таа имаше и можеше да подари уште многу сценски и концертни креации…“, велат од Националната опера и Балет.
Култура
Самостојна изложба на Емил Шулајковски во Чифте амам
Во Чифте амам, на 1 октомври 2024 (вторник), во 20 часот ќе биде отворена самостојната изложба на Емил Шулајковски под наслов „Сенки во облаците“.
Во најновата изложба на Емил Шулајковски под наслов „Сенки во облаците“ (2024), со која на извесен начин се одбележува и тридецениското творештво на овој автор, не може да се избегне импресијата според која тој својот карактеристичен ликовен ракопис го заснова и дефинира преку бојата како основен сликарски постулат. Како една од основните карактеристики на сликарството на Емил Шулaјковски за почеток може да ја издвоиме доследноста на константата која подразбира визуелизација на доживувањата преку експресионистичка изразност со боја врз платно, при што авторот ги спојува лирската апстракција и апстрактниот експресивен гест во динамични ликовни форми со пантеистичка животна и уметничка филозофија.
Изложбата насловена „Сенки во облаците“, е составена од пет одвоени циклуси, создадени во период помеѓу 2022 – 2024 година (при што доминираат слики од 2023 и 2024 година, но се претставени и неколку дела од 2019 година), со издвоени наслови „Градина на задоволствата“ (2019-2023), „Трансформација на симболите“ (2023), „Рефлексии на моментот“ (2023-2024), „Виор во мислите“ (2023-2024) и „Сенки во облаците“ (2023-2024), изведени во техниките масло и акрил на платно, како и акварел на хартија, што од своја страна претставува увид во еден опсежен творечки континуум, во кој на извесен начин се сублимирани „состојбите“ на емоциите и свеста, односно личната естетиката на создавањето.
Во обид формалнистички да се расчленат и анализираат претставените циклуси, работени во речиси ист временски период, ќе започнеме од „Градина на задоволствата„ во која разновидните бои се базираат на пастелност и светлина, во „Рефлексии на моментот“ боените партии сугерираат несвесен виор со форми во различни бои и дрипинг моменти, „Трансформацијата на симболите“ е динамичен спој на контрастни јаки бои, кои продолжуваат асоцијативни форми во „Виор во мислите“, додека комплетната сфумато смиреност ја достигнува во последниот циклус „Сенки во облаците“. Токму овој последен циклус манифестира значителна смиреност во однос на претходните циклуси, при што боите се сублимирани и доведени до степен на симплифицираност и прочистеност на ниво на сенка и светло, без оглед дали изборот на бои е со ладен или топол фон, а самото естетско доживување се движи од асоцијативна лирска апстракција до магичен реализам.
Емил Шулајковски е роден 1969 во Скопје, Македонија, дипломира и магистрира на Факултетот за ликовни уметности – Скопје. Реализирал 28 самостојни изложби во Скопје, Кавадарци, Куманово, Тетово, Битола, Охрид, Белград, Ниш, Подгорица, Љубљана, Силер Сити, Лексингтон, Њујорк, а учествувал на преку седумдесет групни изложби. Неговите дела се застапени во приватни и јавни колекции во Македонија, Србија, Словенија, Хрватска, БиХ, Грција, Кипар, Албанија, Бугарија, Италија, Ватикан, Франција, Германија, Шпанија, Португалија, Англија, Ирска, Полска, Чешка, Финска, Швајцарија, Белгија, Холандија, Луксембург, Норвешка, Русија, Турција, САД, Канада, Кина, Сингапур, Јапонија и Австралија. Добитник е на четири национални награди за сликарство.
Куратор на изложбата е Маја Чанкуловска Михајловска, виш кустос, и истата ќе биде поставена до 20 октомври 2024.