Македонија
Јолевски: Обвинители ќе се избираат откога ќе се изгласаат измените и ќе се смири ситуацијата во Собранието

Советот на јавните обвинители ќе избира обвинители во 11 обвинителства тогаш кога ќе се види дали пратениците ќе ги изгласаат измените на Законот за работните односи, со кој ќе се овозможи јавните обвинители, кои, според сегашниот закон треба да одат во пензија, да може да продолжат со работа. Втората причина поради која не се направи изборот е фактот што не е завршено оценувањето на кандидатите. Доколку Советот сега изберше нови обвинители од кандидатите, а Собранието ги изгласа измените, ќе има по двајца обвинители на иста позиција. За овој закон два дена се случуваше хаос во Собранието.
„Навремено објавивме оглас кога не постоеше предлогот за изменување на Законот за работните односи, каде што се дава можност за продолжување на мандатот. Сега со ова што се случува во Собранието, дали ќе се донесе или не, ќе биде преурането. Ако ние донесеме сега одлука за основен обвинител во Прилеп и се продолжи рокот за пензионирање на јавните обвинители, тогаш ќе имаме двајца основни обвинители. Затоа моравме да одложиме. Објавен е и оглас за сите обвинителства, сметавме дека најцелисходно е да се изврши извор одеднаш на сите обвинителства, да не одиме со цепкање на огласот. За законот ќе видиме утре“, рече Антонио Јолевски, претседател на Советот за јавните обвинители.
Тој вели дека 11 обвинители требало да бидат заминати, ако не им беше продолжен мандатот со одлука на Советот, а сега и работниот век, со законот што се чека пратениците да го гласаат на пленарна седница.
„Изборот беше закажан кога очекувавме да се направи оценувањето. Бидејќи настана процесен проблем со оценувањето, не ни се доставени навреме оцените и не е завршено оценувањето, особено за Вишото обвинителство во Штип, каде што кандидати се обвинители од тоа обвинителство, а и сегашниот јавен обвинител, кој по закон мора да прави оценување на другите“, изјави Јолевски.
До крајот на годината, ако не се изгласаат измените на Законот за работните односи, кој е со европско знаменце, во Собранието и се гласа по скратена постапка, ќе треба во пензија да заминат 13 обвинители.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Лажни налози и злоупотреба на печат – пријавен раководител од Шуто Оризари за измама од 3,6 милиони денари

Полицијата расчисти случај во врска со измама во службата, при што поднесе кривична пријава против Д.А. (51) вработен како раководител на сектор во општината Шуто Оризари, поради сума од 3.600.000 денари, односно над 58.000 евра.
„Имено, според сознанија од истрагата, осомничениот при крајот на 2023 година како раководител на сектор во општина Шуто Оризари со цел да прибави противправна имотна корист – од буџетската сметка на општината, по основ на одржување на училишни објекти, во пет наврати изготвил лажни налози за исплата на парични средства злоупотребувајќи печат на општината како и скратен потпис на актуелен градоначалник на истата“, велат од МВР.
Притоа откако ги пуштил паричните средства од тресорска сметка парите биле префрлени по основ на три налози кон правно лице од Скопје, а дополнително осомничениот формирал уште едно правно лице во кое тој бил сопственик каде што исто така пуштил уште два парични налози. На тој начин осомничениот Д.А. го оштетил буџетот на општина Шуто Оризари за 3.600.000 денари.
Македонија
УЈП спроведе 243 контроли за фискализација минатата недела: кај 37,4% од контролираните субјекти утврдени неправилности

Во периодот од 11.08.2025 – 17.08.2025 година, Управата за јавни приходи спроведе вкупно 243 теренски контроли за фискализација, насочени кон различни типови деловни субјекти, меѓу кои: ресторани, кафе барови, шанкови на плажа, хотели, бутици, колонијали, цвеќарници, месарници и други трговски објекти за продажба на мало.
Како што известува УЈП, контролите биле реализирани во повеќе градови низ државата, меѓу кои и туристичките места каде во летниот период има зголемена фреквенција на туристи. Од вкупно 243 контролирани субјекти, кај 37,4% односно 91 од контролираните субјекти биле констатирани неправилности согласно Законот за регистрирање на готовински промет. За утврдените неправилности донесени се 91 прекршочни санкции – глоби, кои ќе бидат одмерени согласно големината на субјектот.
За седум субјекти поради повторено неиздавање фискални сметки во рок од две години, изречена е мерка за привремена забрана за вршење дејност (запечатување). Анализата на спроведените контроли и утврдените неправилности по градови е следна:
· Во Скопје извршени се 31 контроли, а утврдени се 13 неправилности;
· Во Битола, Охрид, Струга, Демир Хисар и Ресен извршени се 67 контроли, а утврдени се 12 неправилности, од кои: 1 во Битола, 1 во Охрид, 6 во Струга, 1 во Демир Хисар, 3 во Ресен;
· Во Прилеп, Кавадарци, Велес и Кривогаштани извршени се 42 контроли, a утврдени се 12 неправилности, од кои 2 во Прилеп, 1 во Кавадарци, 7 во Велес и 2 во Кривогаштани;
· Во Тетово, Гостивар и Кичево извршени се 44 контроли, а утврдени се 29 неправилности, од кои: 17 во Тетово, 9 во Гостивар и 3 во Дебар;
· Во Куманово и Крива Паланка извршени се 16 контроли, а утврдени се 2 неправилности, од кои во Куманово не се утврдени неправилности, а 2 неправилности се утврдени во Крива Паланка;
· Струмица, Дојран, Гевгелија, Богданци, Василево, Пехчево и Берово извршени се 43 контроли, а утврдени се 23 неправилности, од кои: 12 во Струмица, 3 во Дојран, 4 во Гевгелија, Богданци без неправилности, 1 во Василево, 1 во Пехчево и 2 во Берово. Апелираме до сите даночни обврзници да постапуваат совесно и согласно законските прописи, со цел да придонесат кон зајакнување на даночната усогласеност и унапредување на даночната дисциплина во државата. Управата за јавни приходи врз основа на извршените контроли согласно Закон за регистрирање на готовински плаќања ќе врши вкрстени проверки со цел да ја провери веродостојноста на искажаните приходи кај даночните обврзници. Издавањето фискални сметки и користењето мобилни фискални апарати не претставуваат само законска обврска – туку и клучен чекор кон правично, транспарентно и одговорно деловно опкружување, се наведува во соопштението на УЈП.
Македонија
(Видео) Тошковски: Нова седма по ред канцеларија на Управни служби на МВР во Ропотово, ја враќаме довербата на граѓаните

Министерот за внатрешни работи Панче Тошковски заедно со дел од раководството на министерството денеска во Полициското одделение во Ропотово, Општина Долнени прилепско, пушти во употреба нова канцеларија на Управни служби на МВР која ќе ги опслужува жителите во Општина Долнени и околните населени места.
Министерот Тошковски потенцираше дека со овие седми по ред канцеларии за управни служби министерството за внатрешни работи ги доближува се повеќе своите услуги за граѓаните.
„Со оваа канцеларија во Долнени над 15.000 граѓани коишто припаѓаат на Општина Долнени заедно со граѓаните од дијаспората, ќе имаат право и можност сите услуги коишто се поврзани со управните служби како што е вадење на патна исправа, лична карта или возачка дозвола ќе можат да ги остварат во рамки на својата општина, многу поблиску до местото на живеење. Со што имаме двоен ефект, многу поблиска услуга до граѓаните од овој регион а и растеретување на канцеларијата во Прилеп која досега ги опслужуваше овие граѓани. Овие се седми по ред отворени канцеларии на управни служби и доколку има потреба од нови секако ќе реализираме. Ветивме дека ќе овозможиме подостоинствени, побрзи и подостапни услуги за граѓаните и тоа го остваруваме.“, потенцираше министерот Тошковски.
Министерот Тошковски истакна дека досегашните искуства од веќе отворените канцеларии се одлични, граѓаните се исклучително задоволни да можат да ја остварат својата услуга близу до својот дом, без да патуваат подолго и фактот што гужвите со тоа се намалени и услугите ги добиваат достоинствено и ефикасно.
Министерот Тошковски исто така го посети и ОВР Прилеп каде се запозна со фактичката состојба поврзана со безбедноста, условите и предизвиците на прилепската полиција.
„Има подобрување во делот на сообраќајот и вкупниот криминалитет, но и понатаму треба да се работи особено во делот на враќање на довербата на граѓаните во полицијата, којашто во изминатите години била целосно изгубена како резултат на спрегата со определени криминални структури“, истакна на крај, министерот Тошковски.