Спорт
Ексклузивно интервју со Калин Ивановски: Верувам дека в недела можам да го освојам Вимблдон
Од Лондон, Ненад Живановски
Калин Ивановски, осумнаесетгодишниот русокос скопјанец, веќе втора година по ред како единствен ја претставува Македонија на најпрестижниот тениски турнир во светот, Вимблдон. И тоа добро го прави. Минатата година стигна до осминафиналето во јуниорска конкуренција, а денеска тој успех го надмина со пласман во четврт-финалето. Меѓутоа, оваа година амбициите му се многу поголеми – сака да одигра што повеќе мечеви, па и да заигра во неделното финале.
„Се чувствувам самоуверено, имам самодоверба и кој и да ми дојде до финалето, верувам дека ќе можам да го победам со мојата игра, која се темели на сигурни сервиси, бекхенди и форхенди. Мислам дека ги имам сите удари и можам да победам било кого до неделното финале. Единствен противник можам да бидам сам на себе и тоа да ме спречи да го остварам зацртаното. Сепак, верувам дека оваа година можам да го освојам Вимблдон во јуниорска конкуренција“.
На патот до финалето, на Калин му претстојат уште два меча. Утрешниот противник во четфртфиналето му е Шпанецот Педро Роденас, добар познаник на нашиот репрезентативец.
„Пред два дена тренирав со него. Знае да игра, има опасен сервис, не можеш да го читаш толку лесно… Згора на тоа е и левучар и има рамен бекхенд, што на тревнат терен знае да биде незгодно бидејќи топчето не отскокнува како на другите подлоги“.

За претходните мечеви на турнирот, кои за гледачите изгледаа дека релативно лесно ги добива, Калин ги објаснува на следниот начин:
„Првиот меч кога играв против домашниот претставник Лука Поу, вообичаено имав трема, затоа што е прв настап, додека се снајдеш ти треба време да се загрееш. Изгубив сет и гем и дури тогаш се смирив и најдов решение со поагресивна игра да продолжам да играм. Третиот сет веќе играв моја игра, опуштено и го добив последниот сет со 6-2. Во второто коло, против Мексиканецот Родриго Мендес, кој иако е 11-ти носител, влегов како фаворит, а така покажа и резултатот, 6-1 и 6-2. Денеска играв против осмиот носител, Литванецот Едас Бутвилис, кој има доста добри резултати оваа година, стигна до осминафинале на Австралија Опен и трето коло на Ролан Гарос. Со него сум играл повеќе пати, и досегашниот резултат е 4-1 за мене“.
Статистиката од првите два меча покажува интересна коинциденција, и во двата натпревари Калин имаше ист број на асови – по девет и по 35 „винери“, што го наметнува прашањето кој сегмент во играта му е најквалитетен?
„Сервисот и првата топка. Генерално ги правам поените со форхенд, но и бекхендот ми е солиден со кого можам да направам поен. Исто така, доста сум креативен во играта, за противникот во секој момент можам непредвидливо да изиграм и да го сменам ритамот“.

Кога правиме рекапитулација за досегашните настапи на Вимблдон, не можеме да го одминеме и моментот од мечот против Мендес, кога победничкиот поен и воедно ас, Калин го отсервира во стилот на Ник Кириос со твинер сервис. Овој поен не остана незабележан и од страна на организаторот на Вимблдон, така што снимката беше објавена и на официјалната Инстаграм страница на Вимблдон (https://www.instagram.com/p/CfottSQDqrt/), и со 45 илјади лајкови е за 20 илјади повеќе од првата наредна снимка со кралските наследници Принцот Вилијам и Принцезата Кејт Мидлтон.
„Искрено, не го направив тоа за да го имитирам Кирјос, бидејќи не сум негов фан. Едноставно, водев 6-1 и 5-2, бев опуштен и си викам ајде ќе го пробам на меч топка, па, да видиме како ќе испадне“.
Ако не Кирјос, тогаш кој му е омилен тенисер од повозрасните колеги?
„Новак Ѓоковиќ. Најмногу затоа што е ментално силен. И не се срами да покаже дека има став. Баш го има она нашето, балканското. Надал сите го сакаат, но тој е мирен, нема таков темперамент како Ѓоковиќ. Друго се тие од Шпанија, друго сме ние од Македонија, Србија, Хрватска. Затоа најмногу ми се допаѓа Ноле. Секако дека ми се допаѓаат и Надал и Федерер како играат, но Ноле ми е најомилен“.
Нема сомнеж дека на Калин му претстои блескава иднината во тенисот, која во недела може преку ноќ да му постане стварност и да го лансира во тениското соѕвездие. Но, и ако тоа не се случи, тој цврсто верува дека евентуалниот неуспех нема да го поколеба да верува во себе или да потклекне пред разните искушенија кои ги носи младоста.
„Тенисот ми е приоритет во животот. Не знам што друго би правел, ако не играм тенис. Така што, нема опасност интересот да ми отиде во некоја друга насока “.

А, и вистинска штета би било тоа, ако се има во предвид колку години посветил на тенисот, од какви сè задоволства се откажувал во детството за да дојде до денешната позиција да важи за еден од фаворитите на Вимблдон. Затоа, на крајот, се навративме на почетокот:
„Јас почнав да играм тенис на четири години. Пред тоа играв фудбал, но бидејќи сестра ми тренираше тенис и јас се префрлив на него. Сериозно почнав да тренирам на девет години, кога се преселив во Виена, каде имав два тренери Иван Галиќ и Вјеран Фришчиќ. На 12 години отидов во близина на Кан во Франција, на академијата Муратоглу и таму останав две години. Потоа се преселив во Сплит, Хрватска и таму останав една и пол година со тренерот Марин Брадариќ. Од Сплит се преселив во Загреб и го сменив тренерот со Иван Цинкуш, кој пред мене му беше тренер на Марин Чилиќ, а и сега му е тренер. Мојот сегашен тренер, е поранешен тренер на Бернард Томиќ, Зофко“ – го заврши Калин, како што ни објасни, своето прво интервју на Вимблдон.
Го очекуваме второто-победничко, в недела!
Текст и фото од Вимблдон: Ненад Живановски
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Тудор добил понуда за работа Англија
Игор Тудор пред десет дена доби отказ во Јувентус, а веќе добил понуда за нова работа.
Според медиумите на Англија, Тудор добил повик од Вулверхемптон, кој неодамна го отпушти Витор Переира.
Главен ривал на Тудор за работата ќе биде уште еден поранешен тренер на Јувентус, Тијаго Мота. Интересно е што двајцата се уште прмаат плата во Јувентус. Тоа ќе биде така се додека не најдат клуб.
Мота има договор до 30 јуни 2027 година, вреден околу 5,5 милиони евра по сезона, на што треба да се додадат уште два милиони бруто за неговиот тренерски персонал.
Договорот на Тудор е малку помал, а неговата вкупна бруто цена за Јувентус е приближно половина од онаа на Мота, односно околу осум милиони евра.
„Волците“ се најлошиот тим во Премиер лигата оваа сезона, со само два освоени бода и без ниту една победа во првите 10 кола.
Спорт
Осмајиќ доби долга суспензија поради расизам
Фудбалерот на Престон, Милутин Осмајиќ, е суспендиран на девет натпревари, бидејќи како што утврди ФА, на расна основа го навредил играчот од средниот ред на Барнли, Ханибал Межбри.
Инцидентот се случил за време на натпреварот без голови помеѓу Престон и Барнли во февруари, во Чемпионшип.
Осмајиќ ќе ја отслужи казната до 29 декември, кога неговиот Престон ќе гостува кај Рексам. Напаѓачот е казнет и со парична казна од 21.000 фунти.
Црногорецот ги негираше обвиненијата, по истрагата што беше започната во март, додека рочиштето беше одржано во септември.
ФА објави дека по рочиштето е докажано дека имало прекршување на правилата, бидејќи Осмајиќ користел „навредливи и/или погрдни зборови што се однесувале на бојата на кожата и/или расата“ на Межбри.
Престон објави дека е многу разочаран од пресудата и ја повтори својата осуда на сите форми на дискриминација.
Контроверзниот натпревар беше прекинат неколку минути во второто полувреме, кога Межбри реагираше бурно на нешто што му го кажал Осмајиќ. Потоа, тој имаше долг разговор со судијата Ендру Кичен.
Две недели подоцна, тимовите повторно се сретнаа во петтото коло од ФА Купот, каде што Осмајиќ го постигна вториот гол за Престон и гестикулираше кон навивачите на Барнли во знак на прослава.
Ханибал не беше во тимот на Барнли за тој натпревар по одлука на тренерот Скот Паркер, а играчите на актуелниот член на Премиер лигата одбија да се ракуваат со Осмајиќ пред почетокот на натпреварот во кој Престон победи со 3:0.
Ова е втора долга суспензија за Осмајиќ во претходниот период: во сезоната 2024/25 беше суспендиран на осум натпревари, откко го гризна на играчот на Блекбурн Роверс, Овен Бек, во септември 2024 година.
Тогаш ја призна вината по обвинението за насилно однесување, а беше казнет и со 15.000 фунти.
Осмајиќ е член на англискиот клуб од летото 2023 година.
Спорт
Претседателот на Наполи: Стадионот „Марадона“ е депонија
Претседателот на Наполи, Аурелио де Лаурентис, даде интересна изјава зборувајќи за стадионот „Диего Армандо Марадона“, каде што игра актуелниот шампион на Италија.
Де Лаурентис го нарече стадионот „депонија“, тврдејќи дека на Неапол му е потребен нов и модерен стадион, но дека градските власти го блокираат тоа.
Тој ги спореди приходите од натпреварите на Наполи со оние на клубовите од Милано, велејќи дека Милан и Интер би можеле да заработат 14 милиони евра од Лигата на шампионите, додека приходите на неговиот тим се многу поограничени.
„Можеме да добиеме само до три милиони во таа депонија на Марадона. Тоа е голема разлика, нели?“ рече Де Лаурентис.
Италија работи напорно на реновирање на постојните или изградба на нови стадиони за Европското првенство во 2032 година, кое ќе биде ко-домаќин со Турција.
Наполи, кој двапати беше шампион на Италија во последните три сезони, има стара зграда, која е реновирана шест полни години, но сепак е непрофитабилна.
„Би сакал стадион со 70.000 седишта, 120 ВИП ложи и 8.000 паркинг места. Ни требаат 30 хектари за да изградиме прекрасен стадион“, заклучи Де Лаурентис.

