Македонија
Ковачки: Владата под итно треба да го отфрли овој предлог за кој најпрвин глумеше дека го одбила
Пратеникот од ВМРО-ДПМНЕ, Драган Ковачки, на прес-конференција порача дека Владата под итно треба да го отфрли францускиот предлог.
„Македонскиот народ во изминатите 8 дена јасно кажа НЕ на асимилаторскиот и понижувачки предлог со кој се блокира македонската интеграција во ЕУ. Секојдневната масовна поддршка од интелектуалци, експерти за ЕУ интеграции, уметници, лекари, адвокати, припадници на безбедносните сили, односно од целиот македонски народ, е јасен сигнал што треба да направи Владата на Ковачевски. Владата под итно треба да го отфрли овој предлог за кој најпрвин глумеше дека го одбила, за да после тоа на невидено да го прифати и да глуми некакви консултации со самопрогласени владини експерти кои се платени токму од Владата, односно од народот“, порача Ковачки.
Тој обвини дека притисоците на МВР се зголемуваат, а полицијата спротивно на закон поднесува пријави на лица кои учествуваат мирно и достоинствено во протестите и на блокадите.
Овие притисоци, вели Ковачки, нема да им поминат, затоа што народот храбро стои зад ставот НЕ на ултиматумите и уцените.
„ВМРО-ДПМНЕ ќе им излезе во пресрет со правна помош на граѓаните кои по овој основ добиваат пријави по насока од Спасовски. Впрочем, од притисоците на Спасовски страдаат и припадници на МВР кои изминатите денови се прераспределуваат и казнуваат затоа што одбиваат да учествуваат во сценариото на власта за малтретирање на сопствениот народ. ВМРО-ДПМНЕ ги охрабрува припадниците на МВР да постапуваат по законот и да пркосат на заканите и уцените на раководството на МВР кои незаконски им ги упатуваат“, рече Ковачки.
Што се однесува до доставениот лист хартија во Собрание, ВМРО-ДПМНЕ го повика Талат Џафери како и до сега што враќаше предлози на закони за погрешна запирка или фрлаше амандмани на опозицијата во канта, да го врати листот хартија во Влада како некомплетен и понижувачки.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Телефонски разговор Муцунски – Липавски: Регионот на Западен Балкан што поскоро треба да биде дел од ЕУ семејството
Министерот за надворешни работи и надворешна трговија, Тумчо Муцунски, денес оствари телефонски разговор со министерот за надворешни работи на Република Чешка, Јан Липавски.
Министерот Липавски упати честитки до министерот Муцунски за назначувањето на фукцијата, посакувајќи му успех во извешувањето на задачите.
Министрите се осврнаа на јубилејот 30-години од воспоставувањето на дипломатските односи, нагласувајќи ги заемните заложби за натамошно зајакнување на соработката.
Муцунски изрази благодарност за недвосмислената и гласна поддршка на Република Чешка за пристапните преговори на нашата држава со Европската унија, притоа реафирмирајќи ја нашата определба за зајакнување на економската соработка и поддршката во мултилатералните организации.
Соговорниците изразија очекување за забрзување на евроинтеграцискиот процес и успешно спроведување на започнатите реформи, истовремено потенцирајќи ја важноста дека Регионот на Западен Балкан што поскоро треба да биде дел од ЕУ семејството.
За време на разговорот беа разменети мислења и за актуелните меѓународни и регионални прашања, како и за соработката и предизвиците во рамките на мултилатерални формати со крајна цел, зачувувањето на безбедноста, мирот на европскиот континент.
Македонија
(Видео) Паднати дрва, скинати проводници, поплавени куќи по невремето во Скопската котлина
Како резултат на силното невреме што ја зафати Скопската котлина во попладневните часови, преку eдинствениот број за итни повици 112 во ЦУК, биле добиени пријави и известувања за причинети штети.
Жители на Бутел преку видео ја опишуваат состојбата по невремето во оваа скопска општина.
Според ЦУК на бројот за итни повици биле добиени пријави за паднати и навалени дрва, како и скршени гранки, скинати проводници, навалени бандери и други проблеми со електрични, интернет и телефонски кабли.
Имало пријави за поплавени куќи, поплавени подрумски простории и гаражи, поплавени улици, проблеми во снабдувањето со електрична енергија, оштетени покриви, скршени стакла и откачени лимови и олуци од куќи и згради, оштетени патнички моторни возила, паднати огради, блокирани улици и слични случаи предизвикани од невремето.
Македонија
Зголемувањето на пензиите ќе се разгледува утре на владина седница
Претседателот на Владата Христијан Мицкоски, оствари работна средба со министерката за финансии, Гордана Димитриевска Кочовска и со министерот за социјална политика, демографија и млади Фатмир Лимани, на која беше финализирана конструкцијата на проектот за зголемување на пензиите.
Со овој проект, повеќе од 300 илјади македонски пензионери ќе добијат повисоки пензии почнувајќи од оваа година.
Ваквото изборно ветување кое доби своја конечна форма ќе биде разгледано на првата седница на Владата, која ќе се одржи на 28.6.2024 година во петок.
Новата Влада останува посветена на исполнувањето на своите ветувања и продолжува да работи со посветеност за добробит на сите граѓани.