Македонија
(Видео) Фон дер Лаен: Вашето место е во ЕУ, нема сомнеж дека македонскиот јазик е ваш јазик
Претседателката на Европската комисија, Урсула фон дер Лаен, побара да се прифати францускиот предлог. Таа ги убедуваше пратениците дека местото на Македонија ѝ е во Европската Унија, дека со францускиот предлог не се задира во идентитеските прашања, а јазикот е македонски без фусноти. Таа посочи дека го разбира револтот што го има кај некои од пратениците бидејќи Македонија не ги почна преговорите по договорот со Грција, но го поздравува тоа што државата не се откажала од оваа цел.
„Пратеници, многумина од вас ќе бидат разбирливо фрустрирани што вашата држава сè уште не ги почнала пристапните преговори. И да ви кажам, и јас сум. Комисијата препорачува отворање на преговорите во последните 13 години. И, се разбира, ќе бидете фрустирани што отворањето на преговорите со ЕУ не се случи веднаш по договорот од Преспа. Ова беше горчливо. Но, никогаш не се откажавте, а и ние заедно никогаш не се откажавме. Заедно го следевме нашиот сон за една ЕУ. Заедно ќе го претвориме овој сон во реалност. Сите мора да го свртиме погледот напред, мора да ја искористиме можноста што е пред нас и да ги почнеме пристапните преговори, да работиме на патот што ве води во ЕУ. Тоа може да го направиме веќе следната недела, следната седмица, со преземање на првиот чекор од ревидираниот француски предлог. Сите сте свесни и запознаени со овој ревидиран предлог. Ги зема предвид грижите на сите страни. Бидете уверени дека Комисијата секогаш била покрај оваа држава, на ваша страна, продолжува да го прави тоа, да стои на ваша страна, да стои таму, како утре, така и задутре. Убедени сме дека ова е од историско значење. Но, одлуката е ваша и само ваша. На крајот на краиштата, станува збор за патот што вие го избравте, како што го избравте и претходно со Охридскиот рамоквен договор градењето на демократијата. Доколку го одобрите ревидираниот француски предлог, доколку го прифатите францускиот предлог, ќе го преземеме првиот чекор во преговарачкиот процес. Нема сомнеж дека македонскиот јазик е ваш јазик. Предлогот го прифаќа и вашиот национален идентитет. Можете да сметате на мене како претседател на ЕК дека ќе се осигурам оти процесот на пристапување ќе ги почитува европските принципи и стандарди. Идентитеските прашања не се дел од пристапните преговори“, посочи претседателката на Европската комисија, Урсула фон дер Лаен.
Според неа, ако се прифати францускиот предлог, кој ги штител македонските интереси, веднаш ќе се почне со скрининг-процесот.
„Сакав да бидам овде за да ви се обратам директно, за од мене да слушнете како Европа ве чека. Чекајќи и надевајќи се дека ќе направите уште еден чекор кон нашата Унија. Вашата држава е кандидат да стане членка на ЕУ од 2005 година. Многу од вас овде и многу други што се отсутни – работевте напорно за да станете членка на ЕУ. Четири години подоцна, во 2009 година, ЕК препорача да ги отвориме пристапните преговори со вас. Од тогаш постојано сме покрај вас. И, сега, конечно, би можеле да бидеме на прагот на еден одлучувачки чекор напред. Овде сум денеска бидејќи верувам дека ова е моментот да продолжите напред кон нашата заедничка иднина. Кон нашата заедничка иднина, во ЕУ, со Северна Македонија како полнопоравна членка. Повторно покажавте смелост, покажавте и решителност. Договорат од Преспа беше пример за храброст, две земји што се согласија да одат напред. Ова ви го отвори патот кон членството на НАТО. По повеќе од две години, Северна Македонија покажа дека е партнер од доверба, која обезбедува безбедност за алијансата. Јас знам дека истото ова ќе се случи кога вие ќе станете членка на ЕУ. Го знам ова бидејќи покажавте витален капацитет да го промените вашето општество кон подобро. Вашите напори за борбата против корупцијата се за пофалба. Воспоставивте силно досие за човековите права, имате слободни медиуми, имате енергично граѓанско општество, вие сте успешен модел за мултиетничко општество, кои со охридскиот Рамковен договор го избравте патот на мирот наместо конфликт“, посочи Фон дер Лаен.
Таа повика да се размисли пред да се донесе одлука. Ги посочи придобивките и потсети дека во светот има војна и пандемија.
„Некои велат дека е подобро нов договор отколку овој на Франција. Ваше право е тоа. Но, размислете колку се обидувавме да дојдеме до овде. Ве охрабрувам да ја искористите оваа можност. Со отворањето на оваа врата сега, Северна Македонија се зајакнува што ќе биде дел од преговарачкиот процес, ќе имате придобивки. Јас имам деца, некои имаат внуци и сите заедно сакаме едно нешто и споделуваме еден сон: еден ден да погледнеме назад и да кажеме дека сите наши деца и внуци се дел од исто европско семејство. Ова е иднината за која одлучувате овде, тука, денес, утре и во деновите што се пред вас. Пратеници, живееме во тешки времиња. Бидејќи пандемијата на Ковид-19 се протега во третата година, нејзините ефекти катастрофално влијаат, руската војна предизвика глобална криза во Украина, растат цените на енергентите. Се бориме со влошената климатска криза. Ова се предизвици со кои мора да се соочиме. Мора да ги совладаме. Вашата држава дорасна на задачата, стоите цврсто со Унијата, вие сте партнер од доверба, ви благодарам. Заслужувате да се движите напред. Сега е на вас да направите чекор“, посочи таа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Членството во ЕУ го чекаме од 2005 година, охрабрувани со рефренот: „уште само овој услов“, „уште само оваа отстапка“, рече Сиљановска Давкова во ОН
Претседателката Гордана Сиљановска Давкова се обрати на Генералната дебата на 79. сесија на Генералното собрание на Обединетите нации, што се одржува на тема „Не оставајќи никого зад себе: дејствувајќи заедно за унапредување на мирот, одржливиот развој и човечкото достоинство за сегашната и за идните генерации“.
„Поупатените во македонскиот случај знаат за сцилите и харибдите низ кои помина и сè уште минува мојата татковина, малата балканска држава, којашто иако индиректно, како една од шесте конститутивни југословенски републики учествуваше во создавањето на Обединетите нации, при приемот во ОН во 1993 година, се соочи со голема неправда.
Имено, таа беше примена под привремената референца, поранешна југословенска Република Македонија, но и со дополнителен услов да преговара за изнаоѓање конечно решение за спорот за името.
Во 2018 година беше потпишан и ратификуван Преспанскиот договор, по што следуваа неуспешен референдум и уставни измени со кои Република Македонија формално правно стана Република Северна Македонија.
Како професорка по уставно право и како поранешна членка на Венецијанската комисија, знам дека она што е легално не секогаш е праведно и легитимно, оти во случајот на мојата држава, не се постапуваше во согласност со меѓународното и националното право, односно „се заборави“ правото на самоопределување на секој народ, загарантирано со Повелбата на ООН и уставот на СФРЈ од 1974 година“, рече Претседателката Гордана Сиљановска Давкова.
„Линијата којашто го двои легалното од праведното, понекогаш е само пукнатина, но друг пат е длабок јаз, па дури и бездна. Тој јаз, таа бездна најчесто и најтешко ги погодува малите народи и држави коишто се први жртви на судирот меѓу силата и правдата, оти може да биде непремостлива препрека за остварување на правото на прогрес.
Се разбира, новото име е формално-правна реалност и мојата држава Република Северна Македонија, како одговорна земја членка на Обединетите нации и на НАТО, ги исполнува меѓународните обврски. Но, членството во ЕУ, заради кое го прави тоа, не само што не се оствари, туку македонските граѓани сега се пред нов, повторно „последен услов“ за уште една уставна измена, но, не за членство, туку за почеток на преговорите и тоа по втор пат!
За нас, членството во ЕУ, по 20 години преговори и дури 16 позитивни извештаи од Европската комисија, наликува на господинот Годо, оти го чекаме од 2005 година, охрабрувани од меѓународните претставници со рефренот: „уште само овој услов“, „уште само оваа отстапка“, „уште само оваа уставна измена“. Така, станавме „sui generis” држава, со 36 уставни измени за 30 години, закотвена во геополитичкиот регион наречен „Западен Балкан“!
Како мирољубива држава, посветена на добрососедството и на регионалната соработка, очекуваме разбирање и соработка со нашите соседи, без закана со вето, зошто каде што има вето, честопати, нема правда. Ветото стана инструмент за билатерализација на евроинтеграцијата, односно нејзина стагнација. Во услови на конфликт на европското тло, стагнацијата на евроинтеграцијата не само што ги демотивира македонските граѓани и ги забавува реформите, туку и го дестабилизира регионот на Југоисточна Европа, оставајќи простор за продор на малигни империјални и великодржавни влијанија.
Проширувањето мора да се врзе за меритократските Копенхагенски критериуми и да се ослободи од ветоизацијата врзана за обидот за ревизија на историјата и непочитување на националниот и културниот идентитет.
Од нашите европски и стратешки партнери очекуваме разбирање и праведно деблокирање на процесот на преговорите за членство во Европската Унија, отфрлање на двојните стандарди и почитување на сопствените принципи и вредности, вградени во основните уставни документи.
Европската реунификација е како недовршена симфонија без нас. Европската Унија не е само политички систем, туку и политичка филозофија во која веруваат најголемиот број македонски и балкански политички актери и граѓани. Интеграцијата е моќен мотив и клучна сила за демократскиот развој. Целосната интеграција на Балканот во ЕУ ќе стави крај на бескрајното прекројување на границите и на балканизацијата како феномен. Но, се разбира, балканските држави мора да се однесуваат според европските стандарди, регионално поврзувајќи се и соработувајќи. Драгоцено е искуството и очекувана е помошта на земјите од регионот кои станаа дел од ЕУ, но и на оние коишто се на трасираниот европски пат. Мора да научиме да се поддржуваме едни со други, како во случајот со ковидот, поплавите и пожарите, наместо да се блокираме на европскиот пат. Homo Balkanicus може да биде Homo Europicus, кога сака!“, кажа Претседателката Гордана Сиљановска Давкова во своето обраќање на Генералната дебата на 79. сесија на Генералното собрание на Обединетите нации.
Македонија
Тошковски: Нов софтвер за менаџмент на воздухопловни полициски операции, дигитализација на процесите за модерна и ефикасна полиција
Министерот за внатрешни работи Панче Тошковски денеска во Центарот за обука на МВР во Идризово присуствуваше на презентација на најновиот софтвер за менаџмент на воздухопловни операции специјално дизајниран за потребите на хеликоптерските единици во состав на Министерството за внатрешни работи.
Министерот Тошковски истакна дека операциите со хеликоптери се од клучна важност за МВР било да станува збор за спасување, транспорт, гасење пожари, полициски операции или цивилни задачи и заради тоа се наметнува потребата од висок степен на организација, координација и сигурност при изведувањето на мисиите.
„Сложеноста на операциите во хеликоптерските единици бараат постојана адаптација и брза реакција во секој момент. Креиравме софтвер кој ќе ги обедини сите аспекти, интегрирано управување, автоматизација на процесите, со цел подобра координација и поддршка за носење на брзи одлуки. Ја видовме важноста на хеликоптерските единици во справување со пожарите и колку брзата и професионална реакција е важна за обезбедување на безбедноста на граѓаните и од овој аспект. Еден од стратешките планови на новото раководство на МВР, вклучително и Владата е дигитализација на процесите со цел побрзи и подобри услуги за граѓаните, унапредување на процесите во полицијата кои ќе креираат модерна и ефективна полиција која успешно ќе се бори со сите видови криминал и корупција и ќе ја гарантира безбедноста на секој граѓанин и државата“, потенцираше министерот Тошковски.
Македонија
(Видео) Орбан пристигна во Македонија
Унгарскиот премиер Виктор Орбан ја започна официјалната посета на Република Северна Македонија.
„Горди на можноста да ја зајакнеме соработката помеѓу нашите две земји. Веруваме дека оваа посета ќе отвори нови патишта за економска и културна размена и ќе ја зајакне нашата пријателска врска“, кажа премиерот Христијан Мицкоски.
Тој додаде дека очекува плодни разговори и заеднички иницијативи.