Македонија
Петровска со амбасадорите на земјите членки на НАТО: Најголемата сила на алијансата се заедништвото и одлучноста
Министерката за одбрана, Славјанка Петровска, денеска имаше работен состанок со амбасадорите и одбранбените аташеи на земјите членки на НАТО и земјите поканети за членство во алијансата, Шведска и Финска, со фокус на клучните одлуки од Самитот на НАТО во Мадрид.
Министерката Петровска нагласи дека донесувањето на новиот Стратешки концепт, засилувањето на заедничката одбрана и одвраќањето, како и силната политичка и практична поддршка за Украина ќе овозможат прилагодување на новата безбедносна реалност на континентот со цел НАТО да продолжи да биде гарант на мирот и безбедноста на своите земји членки и да ги штити вредностите, слободата и безбедноста на сегашните и идните генерации.
„Заложбата на сите е дека треба одлучно да се брани и одбрани меѓународниот поредок заснован на правила, демократија, индивидуални слободи и човекови права. И покрај разликите, сојузниците отсекогаш можеле да се обединат околу основната цел: да се бранат едни со други и да ги чуваат луѓето безбедни“, рече Петровска.
Петровска потенцираше дека руската инвазија врз Украина го наруши мирот во Европа, но ги сплоти сојузниците, додавајќи дека во ера на променета безбедносна архитектура на европскиот континент историските одлуки на Шведска и Финска за влез во НАТО, само ќе ја зајакнат алијансата и евроатланската безбедност.
Од страна на сојузниците беше нагласено дека за секоја одлука ќе имаат кохерентен и комплементарен пристап со цел заемно зајакнување на меѓународниот мир и безбедност. Земјите членки ќе бидат фокусирани на стабилноста на евро-атланската област преку воената мобилност, отпорноста, влијанието на климата, Агендата за жени, мир и безбедност, како и борбата против кибер и хибридните закани и преку решавање на системските предизвици со кои се соочува алијансата. НАТО треба да остане кредибилна организација, која ќе биде подготвена во секое време да ги штити интересите и вредностите на нејзините членки.
„Во ера на стратешки натпревар, додека авторитарните режими ги оспоруваат основните принципи за нашата безбедност, алијансата мора да соработува уште поблиску со истомислениците, заедно со 32 нации на масата ние ќе бидеме уште посилни а нашите народи уште побезбедни” – заклучи Петровска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Директорот на Царинска управа од Софија: Силно сме посветени во остварување на заедничките цели во борбата со нелегалната трговија со дрога
Царинските управи имаат важна водечка улога за националната безбедност, но и меѓународната безбедност. Легалните аеродроми во моментов се таргет за криминалците, при што целта им е забранетите супстанци да стигнат на таргетираните аеродроми и потоа да ја дистрибуираат на разни пазари. Наша задача е преку зголемена соработка, размена на искуства и вложување во зајакнување на институционалните капацитети да ги сузбиеме криминалните мрежи.
Притоа фокус треба да ни бидат карго пратките земајќи ги предвид количините кои подлежат на контрола, како и повеќекратните чекори во синџирот на снабдување, истакна директорот Бобан Николовски на дводневниот настан за зголемување на регионална соработка и борба со трговијата со дрога по воздушен пат во организација на Групацијата за меѓународна соработка на Советот на Европа за дроги и зависности и националната Царинска агенција на Бугарија позната како Помпиду групација. Настанот беше организиран како дел од 10тиот состанок на Организацијата за соработка на аеродроми во Југоисточна Европа во рамки на Помпиду Групацијата (AIRSEE). На настанот учествуваа високи претставници на царински управи, гранични полиции, министерства за внатрешни работи, СЕЛЕК, како високи претставници од Групацијата за меѓународна соработка на Советот на Европа за дроги и зависности.
„Силно сме посветени во остварување на заедничките цели во борбата со нелегалната трговија со дрога преку зголемување на соработката, размена на знаења и искуства, заеднички обуки како и размена на разузнавачки информации во реално време“, рече Николовски истакнувајќи дека Царинската управа оди чекор напред при што имплементира системи со високо интелигентни аналитички функции, а како дел од определбата и цврстата решеност за побрза интеграција кон единствениот пазар на ЕУ.
Во рамки на настанот учесниците разменија искуства во делот на утврдување на процена на ризик и користење на интелигентни системи за сузбивање на криминалот.
Oд аспект на преземените активности како дел од постојаната борба со трговијата со дрога и други забранети супстанци по воздушен пат, Николовски го истакна случајот во кој царинските службеници на царинска испостава Меѓународен Аеродром Скопје спречија меѓународен канал на нелегална трговија со анаболични стероиди за што беше добиено и признание од Светската антидопинг агенција.
Во рамки на настанот учесниците во Организацијата за соработка на аеродроми во Југоисточна Европа ја усвоија заедничката декларација со што се согласија да ја зајакнат улогата на Организацијата како регионална платформа за начин на дејствување, да се работи на развој на и усогласување на алатки и системи за подобрување на откривањето дрога на аеродромите во Југоисточна Европа, да се подобруваат оперативните капацитети преку специфични технички состаноци како и оперативните резултати поврзани со борбата против недозволена трговија со дрога преку навремена размена на информации, да се продолжи со спроведувањето на заедничките операции насочени кон недозволено снабдување со дрога и забранети супстанци, како и да се воспостават заеднички индикатори за идентификување на трендовите и ризиците на регионално ниво.
На маргините на настанот директорот оствари средби со директори и заменици директори на Царински управи од Југоисточна Европа, на коишто беше истакната потребата од зголемување на меѓусебната соработка со цел олеснување на легалната трговија и сузбивање на криминалот, но и унапредување на царинските постапки.
Скопје
Расчистени обемни диви депонии во општините Центар, Чаир и Бутел
Во текот на вчерашниот ден и минатата ноќ, екипите на ЈП Комунална хигиена-Скопје подигнаа и транспортираа приближно 60 кубни метри отпад од неколку диви депонии лоцирани во скопските општини Чаир, Центар и Бутел.
Отстранети се 20 кубни метри отпад од обемна дива депонија лоцирана на улицата Џон Кенеди, во непосредна близина на ООУ „Васил Главинов“, како и големо количество органски отпад и отпад од картонска амбалажа на улицата Васил Ѓорѓов во населбата Капиштец, во општината Центар.
Воедно, во рамките на третата смена е расчистена и обемна дива депонија лоцирана во скопската општина Бутел, во непосредна близина на Прифатниот центар за поддржано живеење за бездомни семејства во населбата Визбегово, велат од Комунална хигиена-Скопје.
Македонија
СДСМ бара оставка од Сања Божиновска по серијата скандали
Социјалдемократскиот сојуз на Македонија бара оставка од министерката Сања Божиновска поради, како што појаснуваат, серијата скандали и лажните изјави во јавноста за нејзиното бугарско државјанство.
„Божиновска го излажа народот, прикривајќи информации за своето бугарско државјанство.
Иако тврдеше дека се откажала од пасошот и бугарското државјанство јавноста од бугарските медиуми дозна дека не само што не се откажала туку дека и целото нејзино семејство има бугарско државјанство.
Криење факти и лажење на јавноста од страна на министер е спротивно на сите етички принципи во политиката. Граѓаните не може да веруваат во Божиновска и во она што го говори кога избра да не им ја каже вистината.
Божиновска не даде одговори ниту за информациите за долгот од 1 милион евра ниту за сомнителните бизнис зделки со „картелско здружување“, истакнуваат од оваа партија.
Последните информации кои се уште СДСМ ги проверува, како што додаваатм се дека најавената инвестиција од кинсека компанија за ветерниот парк во Штип исто така е на сомнителен начин поврзана со нејзините претходни бизнис партнери.
Поради сите етички прекршоци СДСМ повикува на нејзина морална оставка и соодветна истрага од надлежните институции.