Иако бројот на новозаразени со Ковид-19 е во постојан пораст Комисијата за заразни болести нема да препорача дополнителни мерки, но од следната недела во Скопје почнуваат со работа пет нови ковид-амбуланти.

Доктор Злате Мехмедовиќ, портпарол на Комисијата за заразни болести, извести дека на денешниот состанок заклучиле дека болничките капацитети за ковид-пациенти не се оптоварени, се наоѓаме во зелена зона и состојбата е стабилна, но големо оптоварување има кај матичните лекари.

„Најголемото оптоварување е на грбот на матичните лекари и поради тоа Комисијата работи на систем кој ќе биде во насока да се зајакне примарниот дел од здравствениот систем. Точно ги дефиниравме просторот, опремата и кадарот за реорганизирање и од наредната недела почнуваат со работа пет ковид-амбуланти во Скопје, градот кој е најзасегнат со број на заразени. Ковид-амбулантите ќе бидат во Здравствените домови Идадија, Јане Сандански, Ѓорче Петров, Ченто и Чаир“, најави доктор Мехмедовиќ.

Ковид-амбулантите ќе имаат работно време од 7:30 до 19:30, а во нив ќе работат матичните лекари на принцип на ротација, за што вели дека добиле согласност од нив.

„Ова е во координација со матичните лекари. Има нивен претставник во Комисијата за заразни болести кој доби задача да направи анкета. Одговорот беше позитивен, поголем дел сакаат да има ковид- амбуланти со едно дежурство. Дежурствата ќе бидат поретки, едно во два месеца. Дали ќе бидат дополнително платени не е побарано и не дискутирано, доколку побараат ќе биде дискутирано“, рече доктор Мехмедовиќ.

Тој очекува со новите амбуланти здравствените услуги да им бидат подостапни на заразените со Ковид-19, да се избегне недостатокот од термини за тестирање оти во овие амбуланти ќе се прават брзите тестови за Ковид-19.