Македонија
Трет триумф на Марко Блажевски во Twingo Cup

Актуелниот лидер во првенството на Македонија во Twingo Cup, Марко Блажевски со нов триумф на патеката Гробник, Хрватска го зголеми водството во генерален пласман и направи серија од три победи по ред. Во конкуренција на 36 возачи, на трката на Гробник од шест земји Марко Блажевски се до последниот свиок беше во водство и блиску до триумф во генерален пласман, но „заробен“ од неколку Словенци немаше шанса на последниот правец пред целта да ја задржи брзината и во фотофиниш сепак му избега подиумот.
Првите шест возачи во генерален пласман што се бодуваше и за ЦЕЗ и за првенството на Словенија, беа во временска разлика од помалку од една секунда и целата трка беше возбудлива, па дури и безбедносното возило излезе на патеката на 13 минути пред крајот. Туркања, престигнување, интересни дуели имаше во текот на целата трка, нешто по што Twingo Cup е препознатлив и поради што има и толку натпреварувачи.
Покрај Марко Блажевски кој победи, на пиедесталот во бодувањето за првенството на Македонија се најдоа и Давид Малинковски кој беше второпласиран и Зоран Мираковски како третопласиран. Со триумфот на Гробник сега Блажевски има 75 бода, десет повеќе од актуелниот првак Давид Малинковски кој има 65 бод аи на трката беше второпласиран. Зоран Мираковски по третпат се искачува на пиедесталот сезонава и со новите 12 бода сега има 46 бодови во генерален пласман.
На Гробник беа планирани две трки од Twingo Cup; но вториот натпреварувачки ден беше целосно откажан по инцидентот со фатални последици што се случи на едночасовната трка на издржливост Endurance. Организаторот реши да ги откаже сите трки од неделата, меѓу кои и оние од Twingo Cup.
На патеката на Гробник имаше пријавено рекордни 38 возачи, а се појавија вкупно 36 од шест земји. Осуммина Македонци имаше на стартот и во квалификациите. Блажевски во квалификациите го освои седмото место и беше наш најдобра возач, а очекуваше и подобар резултат, но поради екстремно жешкото време имаше проблеми со притисокот во гумите. Поради многуте возила на патеката тешко беше да се постигне најдобро време бидејќи имаше многу сообраќај и требаше многу знаење па и среќа да се најде идеалната линија за постигнување најбрзо време.
Од самиот почеток се создавање мешаница на патеката но Блажевски остана на седмото место и после неколку кругови веќе напредуваше неколку места, па и привремено беше и лидер. Многу туркање, возење еден зад друг, а Блажевски изби напред и притискаше да стигне како првопласиран. Последните кругови возеше на првото место, одлично се држеше но возилото немаше доволно сила на им се спротивстави на ривалите особено на долгите правци. Затоа и на стартно-целната рамнина беше престигнат, а победникот беше решен со фотофиниш.
Но, и покрај тоа четвртото место е одличен успех за Блажевски кој покажува дека има потенцијали и квалитет да биде во самиот врв на колоната. На втората трка требаше да тргне од четвртото место, но таа трка беше откажана.
Давид Малинковски за малку не влезе во Топ-10 на трката, но важно е што немаше сериозни инциденти, беше избегната мешаница, а напредуваше десетина места во однос на стартот. Уште од самиот старт престигна неколку возила, и полека напредуваше. Сега е втор во генерален пласман на Македонија, и веднаш зад Блажевски. Планот на Малинковски беше оваа трка да ја извози сигурно, да биде што е можно повисоко пласиран, и на втората трка утре да брка висок пласман.
Зоран Мираковски заврши како третопласиран во првенството на Македонија, и по третпат сезонава се искачува на пиедесталот. Трката ја заврши со оштетување на десниот браник, но сепак стигна на целта и освои бодови со кои останува во борба за првите три места во генерален пласман во првенството на Македонија.
Поради мало излетување во почетните кругови Владимир Тренески од 12. место падна меѓу последните. Во прилог му одеше излегувањето на безбедносното возило, но немаше доволно време да направи поголем пресврт па стигна како 20 на целта, односно 6. во првенството на Македонија.
На трката во Хрватска дебитираше и Бојан Костовски, помладиот брат на ланскиот вицепрвак Мартин Костовски. Младиот Бојан не ја заврши трката поради проблеми со моторот и прегрејување.
Генерален пласман по пет трки во Twingo Cup во првенството на Македонија: Марко Блажевски 75 бода, Давид Малинковски 65, Владимир Тренески 49, Ангелче Стојковски 48, Слободан Трајковски 46, Зоран Мираковски 46, Борис Стојменов 19, Ненанд Костовски 12, Мурис Камзиќ 8 бодови.
Следен тркачки викенд оној што треба да се вози на патеката кај Брно, Чешка од 9 до 11 септември.
ПР
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Филипче: Граѓаните се жртви на неспособноста на Мицкоски, народот брои денови до плата

„Граѓаните пред 4 години поверуваа во лажниот маркетинг за подобар живот. Очекуваа подобар живот, а добија влада што живее во луксуз и во лажен маркетинг, далеку од народот. “, рече вечерва од Чучер Сандево претседателот на СДСМ Венко Филипче.
Тој на граѓанската трибина „Се бориме за нашиот дом“ рече дека наместо граѓаните да имаат повисоки плати и повеќе удобности тие бројат денови до следната плата.
„Пензионерите ги излажаа со формули и ветувања, работниците ги оставија без покачувања на платите, земјоделците без поддршка. Сметките растат, цените дивеат, младите си заминуваат. Секој ден е потежок од претходниот. И додека народот брои денови до следната плата, тие се расфрлаат со државни пари, летаат со приватни авиони и купуваат вина по институции. Ова не е визија, ова е небрежност и неодговорност“, рече Филипче.
Претседателот на СДСМ пред граѓаните зборуваше и за т.н економски „успеси“ на власта кои според него, граѓаните во реалноста ниту ги гледаат, ниту ги чувствуваат. Но се осврна и на економската состојба за која рече дека е сериозно загрижувачка.
„Го слушате премиерот Мицкоски од митинг на митинг зборува за некакви си економски „успеси“, мислејќи дека граѓаните не ја чувствуваат и не ја гледаат реалноста. Буџетот на државата е загрижувачки, приходите се реализирани само 70,78% од планираното, а расходите веќе достигнаа 72,82%. Ова значи дека до крајот на годината ќе недостигаат околу 1,4 милијарди евра, што значи повторно задолжување, нови оптоварувања за граѓаните или кратење на јавни услуги. Капиталните инвестиции се историско најниска реализација од и ова ќе биде повторно изгубена година за проекти кои требаше да создаваат работни места и економски раст. Јавниот загрижувачки долг расте, веќе достигна 62,9% од БДП, и во последните 14 месеци државата се задолжи за над 1,86 милијарди евра. А меѓу овие задолжувања се и 950 милиони евра коишто треба да се земат“, истакна Филипче.
За него, реалноста на граѓаните е безидејна, благодарение, како што додаде, на неспособноста на Мицкоски и неговата влада.
„По тоа и ќе остане запаметен неговиот мандат, по заеми, високи цени, ниски плати, пензии и студентски оброк. Владата се фали со бројки и ПР, но реалниот живот за семејствата и бизнисите е поинаков“, рече Филипче во Чучер Сандево.
Филипче на трибината рече дека пензионерите се најголемата жртва на лагите на ВМРО-ДПМНЕ, исто како и земјоделците, лозарите, работниците.
„Предизборно ја направија најголемата измама. Ќе растеле платите, пензиите, ќе го врателе името, ќе репреговарале за подобри позиции во Преговарачката рамка. Ветија гордост и достоинственост, а донесоа беда, сиромаштија и ја вратија режимската матрица. Пензионерите се најголема жртва на ВМРО-ДПМНЕ. И тие како и работниците, земјоделците, лозарите се измамени. Овој месец на сметките им легна покачување од само 1000 денари, што значи дека дури 90% од сите пензионери не добија 2000 кои што требаше да ги добијат со нашиот систем на пресметка. Е тоа е ВМРО-ДПМНЕ, партија на манипулатори и ПР трикови. Земјоделците ги оставија без навремени субвенции, ги скратија субвенциите, каснат со исплати, откупните цени се ниски. Фирмите чекаат поврат на ДДВ, пари кои државата мора да им ги врати. Ова не е грижа за народот. Ова е приватизација на државата“, рече Филипче.
Македонија
Меџити: Чаир не е средство за враќање на власт на оние кои денес тагуваат во опозиција и мислат дека преку победа ќе се вратат во владата

Кандидатот на коалицијата ВЛЕН за градоначалник на општина Чаир, Изет Меџити, вечерва на централниот митинг во Чаир им се заблагодари на сите активисти и граѓани за нивната постојана поддршка за време на целата изборна кампања.
„Вечерва не сум тука ниту да зборувам за нашите проекти во Чаир, затоа што, каде и да се движите низ Чаир, зборува нашата работа, зборуваат машините кои работат во нашиот Чаир. Затоа, сè што би рекол за тоа што правиме за нашиот Чаир би било помалку од она што реално се случува како промена денес во Чаир.
Вечерва на завршницата на оваа кампања, сум овде за да ви кажам дека оваа битка ги надмина димензиите на една обична локална изборна трка. Нашите политички противници сакаа да нè предизвикаат во Чаир, да нè поразат во Чаир, мислејќи дека ќе се повлечеме. Иако имавме многу момци и девојки кои ќе ја водеа оваа битка со успех, како и секогаш, јас ја прифатив оваа одговорност и побарав разбирање од пријателите во ВЛЕН за да се кандидирам лично.
Сакав честа на Чаир да ја преземам врз себе и да им покажеме на сите дека Чаир не е трамполина за спас на политичките кариери на истрошените политичари од Зајас. Чаир не е ниту средство за враќање на власт на оние кои денес тагуваат во опозиција и мислат дека преку победа во Чаир ќе се вратат во владата“
На 19 октомври, порача Меџити, некои од нив ќе бидат испратени во политичка пензија, а некои во историјата.
„Нашата победа во Чаир има врска со честа на Чаир. Затоа што јас не сум во трка со Бујар
Османи, туку со Али Ахмети од Зајас.
Втората работа што сакам да ви ја кажам е дека се вратив да се кандидирам во Чаир за да ја претворам нивната замисла за Чаир како запоставена гето општина, во Чаир од нашите соништа. Во изминатите 15 месеци во извршната власт, владата ВЛЕН насочи кон Чаир десетици проекти и околу 100 милиони евра инвестиции, со што Чаир од периферија го претвораме во центар на градот.
Битката во Чаир не е само борба за тоа кој ќе ја управува оваа општина во следните четири години. Оваа битка ќе ја одреди и политичката иднина на Албанците: дали ќе се вратат оние што владееја со ароганција и завршија на црните листи или ќе продолжиме ние да владееме со елеганција и да бидеме на светлите страници на нашата историја“, кажа Меџити.
Во Чаир, како што истакна, се води битка за сите населени места, од Липково до Струга.
„Затоа оваа кампања ја водев внимателно, со идеи и програма, а не со навреди и омаловажувања. Ја прифатив улогата на слуга на народот и подготвен сум до крај да работиме“.
Македонија
Марковски: Можеме да ставиме крај на хаосот, партизацијата, безредието и апатијата во Скопје

„Диши, диши – јавно здравје во хаотичен град“ беше последното предавање во рамки на кампањата за овие локални избори на Горан Марковски, независен кандидат за градоначалник на Скопје, поддржан од граѓанската платформа „Независни заедно“.
На овој час се дискутираше за аерозагадувањето како еден од најгорливите проблеми во Скопје.
Ирина Ангеловска, специјалист пулмолог, се осврна на причините за аерозагадувањето и последиците по општото здравје. Таа ја истакна и потребата од преземање на континуирани мерки од институциите, но и од секој поединец: носење маски, намалена употреба на штетни возила, да не се гори отпад, контрола на квалитетот на воздухот, доследно спроведување на законските решенија.
Марковски ги претстави дел од мерките за справување со овој проблем. Според него, аерозагадувањето не може да се реши преку ноќ, но можеме да преземеме мерки и политики кои ќе ни помогнат во негово намалување.
– Скопје мора да стимулира алтернативен превоз, а не возење на автомобили. Планираме воведување и набавка на еко – автобуси и такси возила. Исто така, по одредени студии имаме околу 80.000 домаќинства кои се греат на горива кои загадуваат. Овие граѓани, домаќинства мора да ги поддржиме во промената на начинот на греење, но да не ги заборавиме и другите загадувачи: индустрија, возила и сл.
Вера Јовановска Типко, специјалист психијатар се осврна на менталното здравје во еден хаотичен град. Таа истакна дека сообраќајниот хаос е еден од главните стресогени фактори и затоа е потребно дестимулирање на возењето автомобили на дневно ниво.
– Хаос, катастрофа, лудило, немир, недоверба, гнев, страв, нема спас се само дел од зборовите и фразите кои ги користат граѓаните на дневно ниво за да го опишат своето живеење во Скопје, посочи Јовановска Типко.
„Во недела можеме да ставиме крај на хаосот, партизацијата, безредието и апатијата. Гласај за 128 за градоначалник на Скопје – Горан Марковски и 35 за советничката листа за Скопје предводена од Јана Белчева Андреевска“.