Македонија
Маричиќ – Кравињо: Напредокот кон ЕУ носи развој, но и предизвици, кои заедно ќе ги надминуваме
Заменик-претседателот на Владата задолжен за европски прашања, Бојан Маричиќ, денес имаше средба со министерот за надворешни работи на Португалија, Жоао Гомес Кравињо, на која разговараа за отворањето на пристапните преговори за членство на Северна Македонија во ЕУ, како и предизвиците што ја очекуваат земјава во претстојниот период.
Португалија е земја која апсолутно и недвосмислено нè поддржува на европскиот пат уште од самиот почеток. Пред нас се многу предизвици, безбедносна, енергетска и економска, но и секоја друга криза што сега имаме можност заедно да ја решаваме со нашите партнери во Унијата. Затоа е важно Северна Македонија цврсто да чекори на европскиот пат, рече вицепремиерот Маричиќ на средбата.
Соговорниците имаат ист став дека на 19 јули се случи историски исчекор во нашиот евроинтеграциски процес, со одржувањето на првата меѓувладина седница и почнувањето на скрининг-процесот, што е од големо значење и за ЕУ и за регионот.
„Во наредниот период остануваме посветени на одржување на позитивното портфолио – како што е потврдено во најновите извештаи на ЕК за земјите, но и во меѓународни рангирања, како што се ГРЕКО, ‘Фридом хаус’, ‘Транспаренси интернешнл’ и други“, рече Маричиќ додавајќи дека нивото на транспонирање на правото на ЕУ сега изнесува 45 отсто.
„Нашите напори за обезбедување непречено одвивање на преговарачкиот процес во сите негови аспекти ќе ги насочиме преку ревизија на преговарачката структура, изнаоѓање модел за учество на граѓанското општество во процесот, дополнително ќе ги зголемиме нашите капацитети за преведување на правото на ЕУ на македонски јазик во наредниот период – вклучително и лингвистичка, стручна и правна ревизија и верификација на преведените акти на ЕУ, а предвидено е и создавање механизми за транспарентна и навремена комуникација со нашите граѓани“, истакна вицепремиерот Маричиќ.
На состанокот Маричиќ и Кравињо разговараа за унапредување и продлабочување на билатералната соработка во пристапниот процес, споделување искуства и добри практики од страна на Португалија во процесот на водење преговори и беше потврдено дека Португалија останува силен поддржувач за полноправно членство на Северна Македонија во ЕУ.
Ова е прва официјална посета на земјата на министерот за надоворешни работи на Португалија, г. Жоао Гомес Кравињо, во чии рамки оствари средби и со својот хомолог Османи, претседателот на Владата, Димитар Ковачевски, и со претседателот на државата, Стево Пендаровски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Сиљановска-Давкова по повод Светскиот ден на ромскиот јазик прими припадници на ромската заедница
По повод 5 Ноември, Светскиот ден на ромскиот јазик, претседателката Сиљановска-Давкова, денеска прими претставници на Ромите: средношколци од Скопје, медиумски и просветни работници, како и поети.
Соговорниците постигнаа консензус за потребата од кодификација на ромскиот јазик, отворање катедра за ромски јазик и овозможување на учениците Роми, да го изучуваат ромскиот јазик не само во училиштата во Скопје, туку и ширум републиката.
На настанот беше прочитан дел од предговорот од првата ромска граматика од Шаип Јусуф. Исто така, беа прочитани стихови од делото „Бели патишта“ на авторот Селим Азис. Авторот Сафет Камбер прочита стихови од делото ,,Слово на душата”, меѓу кои: „Kana ka dikhe chorole sijam, numaj ki atma phiravaja barvalipe. Kamipe bizo sharti isi amen thaj sakoneske daja ole“. („Сиромашни сме по изглед, но во душата носиме богатство. Љубов безусловна имаме и секому ја даруваме”).
Претседателката изрази особено задоволство што првата граматика на ромски јазик, којашто е од непроценлива вредност за милиони Роми ширум светот, е создадена на македонско тло од професорот Шаип Јусуф.
Таа упати порака учениците да си го сакаат, почитуваат и учат ромскиот јазик, како незаменлива ромска татковина.
Македонија
Алиу: Континуирано ги унапредуваме здравствените услуги во Клиничката болница во Битола
Министерот за здравство Азир Алиу денеска беше во посета на Клиничката болница „Д-р Трифун Пановски“–Битола.
Со цел обезбедување квалитетна и достапна здравствена грижа, во болницата се вработени четворица нови специјалисти кои од приватниот сектор преминаа во јавното здравство – интервентен кардиолог, инфектолог, интернист и дерматовенеролог. Со тоа е комплетиран тимот за кардиологија, а во план е развој на клиничка електрофизиологија со имплантација на пејсмејкери, соопштија надлежните.
– Битола е првата болница во државата која почна со децентрализација на онколошката терапија – секоја недела лекар од Клиниката за радиотерапија и онкологија работи со пациентите во Битола, со што се намалува потребата тие да патуваат во Скопје за консултации и контроли. Во рамки на поддршката од Владата и Министерството за здравство, болницата е зајакната со нова медицинска опрема, меѓу која нов дигитален рендген апарат, биохемиски и имунолошки анализатори, современ апарат за ФАКО метода и нов ехо апарат за офталмологија, како и нов дигестор за одделот за патологија“, посочи Алиу.
Во изминатиот период, како што беше истакнато, примени се 11 приватни специјализанти, а целосно е реализиран и огласот за вработување на 53 лица медицински персонал, со што се подобрува функционалноста на сите оддели и одговорот на потребите на пациентите.
-Нашата цел е секој регион да добие болница со современи услови, мотивиран кадар и највисок стандард на здравствена грижа. Клиничката болница во Битола е пример како со посветеност, вложувања и стратегија, можеме да создадеме модерен регионален центар кој е поблиску до граѓаните и ги нуди сите потребни услуги на место, изјави Алиу.
Со овие инвестиции, велат од министерството, Клиничка болница „Д-р Трифун Пановски“–Битола станува модерен регионален центар, со силен кадар, современа опрема и системска грижа која ја приближува здравствената услуга до секој пациент.
Македонија
Утре променливо облачно со сончеви периоди, во вечерните часови ќе има повремени локални врнежи од дожд
Времето утре, променливо облачно со сончеви периоди. Во вечерните часови и во текот на ноќта во северните делови ќе има повремени локални врнежи од дожд. Ќе дува слаб променлив ветер. Минималната температура ќе биде во интервал од 4 до 9, а максималната ќе достигне од 11 до 17 степени.
Во Скопје, ќе биде променливо облачно, во вечерните часови и во текот на ноќта ќе има повремен дожд. Ќе дува слаб северен ветер.
Минималната температура ќе се спушти до 7, а максималната ќе достигне до 15 степени.
Под влијание на серија влажни воздушни бранови од утре во вечерните часови до понеделник следува период на променливо облачно време со повремени локални врнежи од дожд. Наместа врнежите ќе бидат поројни и пообилни и во текот на 24 часа се очекува да наврне поголема количина дожд (над 30 l/m²).

