Градоначалничката на град Скопје, Данела Арсовска, со директорот на ЈП „Улици и патишта“, Борис Настов, денеска изврши увид во почетокот на реконструкцијата на пешачките патеки во првиот дел од Градскиот парк.

„Во успешно завршената реконструкција на пешачките патеки во вториот дел од паркот, каде што веќе се реконструирани над 12.000 квадратни метри, продолжуваме со реконструирање на сите други пешачки површини во Градскиот парк. Со реконструкцијата во оваа фаза предвидено е да бидат опфатени пешачки патеки на вкупна површина од 12.500 квадратни метри во првиот дел од Градскиот парк. Од вкупната површина, 7.500 квадратни метри се пешачки патеки, кои се покриени со ризла и кои ќе бидат асфалтирани, а 5.000 квадратни метри пешачки патеки, кои се затекнати во лоша состојба со големи оштетувања, ќе бидат санирани со нова асфалтна маса“, истакна Арсовска.

Екипите на ЈП „Улици и патишта“, по налог на Град Скопје, во текот на изминатите денови веќе ги почнаа активностите за реконструкција на патеките во близина на малиот лавиринт во првиот дел од паркот и дополнително уредување на зеленилото.

„Во активностите во оваа фаза на реконструкција на патеките во првиот дел од Градскиот парк, ЈП ‘Улици и патишта’ во изминатите денови веќе почнаа со целосна реконструкција на пешачките патеки со ризла, потоа следува фаза на реконструкција на оштетените асфалтни патеки и нивна санација, кои ќе бидат обновени со нова асфалтна маса“, посочи директорот Настов.

Реконструкција на пешачките патеки, обнова за зеленилото, поставување нови садови за отпадоци, нова урбана опрема и санација на постојната урбана опрема, како и реконструирање плочници и тековно одржување на парковата опрема е дел од активностите што Град Скопје ги презема за обновување на Градскиот парк во корист на сите генерации.