Македонија
Отворен реновираниот Хируршки ургентен центар во Скопје
Заменичката на претседателот на Владата задолжена за политики за добро владеење, Славица Грковска, заедно со министерот за здравство, Беким Сали, и министерот за внатрешни работи, Оливер Спасовски, го отвори реновираниот Хируршки ургентен центар во Скопје.
Заедно со директорот на ЈЗУ УК ТОАРИЛУЦ, Александар Трајановски, ја потенцира важноста од инвестициите во осовременување на здравствените установи во земјата сѐ со цел подобри услуги за граѓаните. Станува збор за целосна реконструкција на 400 квадратни метри на Хируршкиот ургентен центар за што се одвоени 8 милиони денари буџетски средства и средства од донации.
Вицепремиерката Грковска истакна дека инвестициите во јавното здравство значат мотивирани здравствени работници, но и задоволни граѓани.
„Добриот начин на управување и стратешкиот пристап даваат добри и видливи резултати. Создаваат услови за квалитетни услуги на граѓаните, што мора да биде најголем приоритет за сите носители на јавни функции. Со оваа и со сите претходни инвестиции создадена е обновена, модерна и, пред сѐ, високопрофесионална клиника, која продолжува да се развива по сите светски стандарди во најдобрите традиции на професионализмот, знаењето и стручноста. Со овие вложувања Владата ја искажува својата цврста решеност да продолжи да инвестира во здравствениот систем, што подразбира поквалитетен живот и подолг животен век на секој граѓанин. Вложуваме и во човечкиот капитал, се внесуваат современи методи за интервенции, вложуваме во набавка на лекови, капитални инвестиции, опрема, накусо – правиме крупни реформи во здравството. За две години, дадени се повеќе од 5.000 согласности за вработувања во јавното здравство. Во услови на пандемија реализирани се 446 нови вработувања во јавното здравство, и тоа 164 доктори, 247 медицински сестри и 35 специјалисти добија статус на вработени на неопределено време. Тоа овозможи за најмалку 10 проценти зголемување на капацитетот со човечки капитал во секоја јавно-здравствена установа, а во изминатиот период имаме и рекорден пораст на платите“, рече Грковска.
Министерот Сали истакна дека првпат по 30 години комплетното се реновираат просториите на Хируршкиот ургентен центар, а реализирана е и набавка на медицински инвентар и опрема за центарот.
„Со ваквите настани одбележуваме унапредување на условите за третман на пациентите, кои се особено значајни за мене како министер за здравство, но и како пациент, земајќи предвид дека речиси секој од нас се нашол во ситуација да побара здравствена услуга тука на Ургентниот центар. Фактот дека во оваа установа имаме комплетна реконструкција на простор на површина од 400 квадратни метри е показател за успешното менаџирање на оваа клиника, чие раководство и во сензитивни услови на пандемија успева значително да ги унапреди условите за третман на пациентите и да ја промени сликата и првиот впечаток што го стекнуваат пациентите при барањето медицинска помош тука на Ургентниот центар. Конкретно, реновиран е делот во кој се сместени приемното одделение, собата за реанимација, собата за тријажа, операционата сала, асептичната соба, помошните простории и санитарните јазли. За оваа цел, издвоени се осум милиони денари буџетски средства и средства од донации“, рече Сали.
Директорот на ЈЗУ УК ТОАРИЛУЦ, Трајановски, во својата изјава за медиумите истакна дека се работи за комплетна реконструкција на простор првпат по 30 години со површина од 400 квадратни метри.
„По целосната реконструкцијата на Клиниката за ортопедски болести, ова е уште еден проект во ЈЗУ УК ТОАРИЛУЦ Скопје, кој ја измени комплетно сликата на оваа здравствена установа и ќе понуди нов квалитет на услугите за пациентите што овде се лекуваат. Во состав на Ургентниот центар има апарат за компјутерска томографија и РГТ-апарат, со што пациентите добиваат целосна дијагностика по приемот во болницата. Ургентниот хируршки центар е најголема здравствена установа во земјата, која дава ваков тип медицински услуги. Годишно 35.000 пациенти се примаат на Ургентниот центар од целата територија на Северна Македонија. Некои од нив се згрижуваат на Ургентниот центар, каде што им се дава неопходната медицинска помош, а други се згрижуваат на преостанатите клиники за понатамошен третман“, рече Трајановски и најави идни уште поголеми и успешни проекти, пред сѐ, во интерес на пациентите и здравствената услуга што тие ја добиваат.
На настанот беа доделени и благодарници на УНХЦР, Црвениот крст и на една приватна општествено одговорна компанија, кои го поддржаа реновирањето на Ургентниот хируршки центар.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Санкционирани 156 непрописно паркирани возила на територија на општина Центар
ЈП Паркинзи на Општина Центар и Општина Центар во соработка со Сообраќајната полиција-Скопје во периодот од 23.09. до 29.09.2024 година, со помош на специјалните возила „Пајак“ отстранија 156 непрописно паркирани возила кои го попречувале нормалното и безбедно одвивање на сообраќајот.
„За трајно решение на сообраќајниот метеж и проблемот со неправилното паркирање неопходна е поголема сообраќајна култура, затоа ЈП ПОЦ и СВР Скопје во наредниот период ќе продолжат со секојдневно отстранување на сите непрописно и несовесно паркирани автомобили во Општина Центар со цел да се подигне сообраќајната свест на повисоко ниво и да се зголеми безбедноста во сообраќајот“, соопшти ПОЦ.
Македонија
ЦУК: Спасителна акција на Дојранско Езеро
Центарот за управување со кризи (ЦУК) информира дека вчера имаше спасителна акција на Дојранско Езеро што заврши успешно.
На 112 во ЦУК околу 16.30 часот е барано помош за лице коешто пливало во езерото заради лошото време со ветер, бранови и езерски струи кај месноста „Калдрма“ во Дојранско Езеро. Лицето е пронајдено живо од страна на полициски службеници од ПС Дојран. Конкретно од СВР Струмица известија дека лицето испливало до брегот во близина на грчката граница.
Истото од таму е земено од страна на припадниците од МВР и е надвор од животна опасност. Инаку, полицајците од ПС Дојран со чамец на концесионерот на езерото беа излезени на теренот при силен ветер и бранови и вршеа пребарување на Дојранското Езерото на местото каде што било забележано лицето. ДЗС немаше чамец на Дојранско Езеро, извести ЦУК.
Македонија
Без знаци на живот утрово пронајдена планинарка, извести ЦУК
Регионалниот ЦУК Тетово, извести дека преку Единствениот повикувачки број за итни случаи 112 во 11.57 часот, вчера беше примен повик за исчезната повозрасна планинарка (72-годишна) на Шар Планина во реон на Љуботен, по што беше организирана потрага што продолжи и денеска од утрово, кога се раздени.
Во потрагата беа вклучени ренџери од НП „Шар Планина“ заедно со нивниот директор, 12 специјалци од МВР, 5 полициски службеници од ПС Теарце. Утрово, од НП „Шар Планина“ известија дека денеска во 07.30 часот е пронајдена жената во месноста „Ружен Камен“, но без знаци на живот. За извлекување на настраданата жена од тежок и непристапен терен се интервенира и од страна на алпинистот Надир Мурсели, којшто помага при вакви случаи на Шар Планина. Увид на местото ќе изврши екипа од СВР Тетово, а е известен и Јавен обвинител, извести ЦУК.